Canvass ng 2022 election votes para sa pangulo at VP, tapos na.. Marcos at Sara, iprinoklama — NBOC

ni Lolet Abania | May 25, 2022

Tinapos na ng Congress, tumatayong National Board of Canvassers (NBOC), ang opisyal na tallying of votes para sa pangulo at pangalawang pangulo sa 2022 national and local elections.

Idineklara ng Joint Canvassing Committee (JCC), na co-chaired nina Senate Majority Leader Juan Miguel Zubiri at House Majority Leader Martin Romualdez, ang completion ng proseso ng certificates of canvass (COCs) ng alas-3:33 ng hapon ngayong Miyerkules.

Ang canvassing ay tinapos na nila kahit wala pa ang canvassing ng overseas absentee voting (OAV) ng mga boto mula sa Argentina at Syria, kung saan ang mga ballot boxes sa naturang mga bansa ay hindi pa dumating.

Isang report ng canvass ang ihahanda ng JCC at isusumite ito sa Joint Public Session ng House of Representatives at ng Senate of the Philippines. Batay sa rules, “the JCC report shall be approved by a majority of votes of all its members, each panel voting separately. The report shall be signed by the majority of the members of each panel.”

Matapos nito, ang mga chairpersons ng JCC ay ipiprisinta at i-sponsor ang report, habang sinasamahan ito ng Resolution of Both Houses na magpoproklama sa duly-elected president at vice president.

Sa adoption ng Resolution of Both Houses, sina Senate President Vicente Sotto III at Speaker Lord Allan Velasco ay ipoproklama na ang mga nahalal at iluluklok na pangulo at pangalawang pangulo.

Base sa partial at unofficial tally, si dating Senator Ferdinand “Bongbong” Marcos Jr. ang nanguna sa 2022 elections sa presidential race na may 31,104,175 votes, kasunod ni Vice President Leni Robredo na may 14,822,051 votes.

Para sa vice-presidential race nanguna si Davao City Mayor Sara Duterte, ang anak ni outgoing President Rodrigo Duterte, na may 31,561,948 votes, kasunod si Senator Francis Pangilinan na may 9,232,883 votes.

Ayon sa GMA News Research, ang napipintong proklamasyon ni Marcos, ang pinakamabilis na presidential proclamation matapos ang 1986 EDSA Revolution.

Noong 1992, ang proklamasyon ni dating Pangulong Fidel V. Ramos ay inabot ng 42 araw matapos ang eleksyon; 18 araw para sa proklamasyon kay dating Pangulong Joseph Estrada noong 1998; 45 araw para sa proclamation ni dating Pangulo Gloria Macapagal-Arroyo; 30 araw para sa proklamasyon ng yumaong dating Pangulong Benigno Aquino III; at 21 araw para sa proklamasyon ni outgoing President Rodrigo Duterte. Umabot lamang ng 16 araw ang proklamasyon ni Marcos matapos ang May 9 national at local elections.

Marcos, nakidalamhati sa pamilya ni Susan Roces

ni Lolet Abania | May 24, 2022

Nagbigay ng pagrespeto si presumptive President Ferdinand Marcos Jr. at kanyang asawa na si Lisa Araneta Marcos sa yumaong Queen of Philippine Movies na si Susan Roces, ngayong Martes ng gabi.

Sa ulat, dumating sina Marcos bandang alas-7:20 ng gabi sa Heritage Park sa Taguig City para makidalamhati sa naiwang pamilya ni Susan, ang anak nitong si Senator Grace Poe at anak ng senadora na si Brian.

Personal namang tinanggap ni Poe si Marcos sa loob ng chapel. Sina Poe at Marcos ay magkasama sa Senate bago iniwan ni Marcos ang chamber noong 2016, nang pinili nitong tumakbo sa pagka-bise presidente sa halip na reelection.

Bukod kay Marcos, ang mga personalidad na bumisita ngayong Martes sa burol ni Susan ay sina dating Congresswoman Gina de Venecia, Ogie Alcasid, Pops Fernandez, at Eric Quizon.

Hanggang Miyerkules, Mayo 25, ang public viewing para kay Susan. Nakatakda ang interment sa Huwebes, Mayo 26, sa Manila North Cemetery, kung saan si Susan ililibing sa tabi ng kanyang asawa na si King of Philippine Movies Fernando Poe, Jr.

Miting nina P-Du30 at Marcos, wala pang iskedyul — Malacañang

ni Lolet Abania | May 24, 2022

Wala pang itinakdang pag-uusap kina Pangulong Rodrigo Duterte at presumptive President Ferdinand “Bongbong” Marcos Jr., kung saan isang buwan pa bago magsimula ang susunod na administrasyon, ayon sa Malacañang.

“Wala pang sinasabi [ang Pangulo]. We will wait for further announcement,” pahayag ni acting Presidential Spokesperson Martin Andanar sa isang press briefing ngayong Martes. “I don’t have information on that and we could know more after the Cabinet meeting next week,” dagdag niya.

Ayon kay Andanar, inatasan na ni Pangulong Duterte ang iba’t ibang ahensiya ng gobyerno na maghanda sa tinatawag na “professional” transition of power para sa susunod na administrasyon.

“Ang marching orders na ng Presidente 2 iyon – iyong una ay doon sa inauguration; pangalawa, iyong kani-kanyang transition ng iba’t ibang departamento or iyong mga Cabinet portfolios,” sabi ni Andanar. “So far, iyon lang naman ang transition orders na binigay sa amin. As to the mode of transition, we are given freehand,” aniya pa.

Una nang inanunsiyo ng Malacañang ang tungkol sa pagbuo ng “transition team” upang pangasiwaan ang pag-turnover ng gobyerno sa mga susunod na lider ng bansa. Subalit, ayon kay Andanar, ang transition team ay hindi pa rin nakikipag-usap sa mga representatives ni Marcos.

“Ang alam ko ay hinihintay pa natin ang official proclamation,” ani Andanar. Binanggit naman ni Andanar, walang ibinigay na komento si Pangulong Duterte hinggil sa mga napili ni Marcos na bubuo sa kanyang gabinete.

Kabilang sa mga napili ni Marcos sa kanyang gabinete ay sina presumptive Vice President Sara Duterte-Carpio, bilang Department of Education (DepEd) secretary; dating MMDA chief Benhur Abalos bilang Department of the Interior and Local Government (DILG) secretary; dating spokesperson at abogadong si Vic Rodriguez bilang Executive Secretary, dating Aquino administration National Economic Development Authority (NEDA) chief Arsenio Balisacan na ibinalik din sa kanyang puwesto; Cavite Congressman Jesus Crispin Remulla bilang Department of Justice (DOJ) chief, dating Department of Labor and Employment (DOLE) Undersecretary Susan Ople bilang secretary ng Department of Migrant Workers at si Bienvenido Laguesma bilang DOLE chief.

“Kung anuman ang mga naka-schedule sa kalendaryo ng ating Pangulo, lahat ng mga opisyal na mga events, lahat ng mga dapat niyang i-meet, lahat ng mga dapat niyang pirmahan ay the President will manage the Executive Branch until June 30, 2022 at 12 noon,” saad pa ni Andanar.