P-BBM at pamilya, titira sa Bahay Pangarap — Romuladez

ni Lolet Abania | July 1, 2022

Nagpasya si Pangulong Ferdinand “Bongbong” Marcos Jr. na piliin ang Bahay Pangarap na kanyang opisyal na tirahan, ayon kay Philippine Ambassador to the United States na si Jose Manuel Romualdez ngayong Biyernes. Nitong Huwebes, si Marcos ay nanumpa na bilang ika-17 pangulo ng Pilipinas.

“I think, from what I’ve told, the First Family will be staying in the Pangarap which is on the other side of the Palace. It’s been renovated right now, in the meantime they’re still staying in another place but Mrs. Marcos has always stayed in her own place all these years... I’m talking about Mrs. Imelda Marcos,” pahayag ni Romualdez, kaanak ni Pangulong Marcos, sa CNN Philippines.

Matatagpuan ang Bahay Pangarap sa loob ng Malacañang Park, na nasa kabilang bahagi ng Pasig River kaharap ng presidential palace.

Ang complex nito ay ginagamit noon na recreational retreat ng mga dating presidente, na unang na-introduce sa panahon ng yumaong Pangulong Manuel Quezon noong 1936.

Sa panahon ng kanilang panunungkulan, sina dating Pangulong Rodrigo Duterte at yumaong Pangulong Benigno Aquino III ay nanirahan sa Bahay Pangarap.

Career diplomat Enrique Manalo, itinalagang DFA chief

ni Lolet Abania | July 1, 2022

Itinalaga ni Pangulong Ferdinand “Bongbong” Marcos Jr. si career diplomat Enrique Manalo bilang kalihim ng Department of Foreign Affairs (DFA) kapalit ni Teodoro Locsin Jr. Nanumpa si Manalo kay Pangulong Marcos sa Malacañang ngayong Biyernes.

Si Manalo ang unang career diplomat na na-appoint bilang DFA chief ng halos dalawang dekada na matapos ni Delia Domingo Albert, ang kauna-unahang babaeng lider ng departamento.

Ang 69-anyos na si Manalo ay naging acting DFA secretary mula Marso 9 hanggang Mayo 17, 2017, matapos na si Perfecto Yasay ay nabigong makakuha ng confirmation ng bicameral Commission on Appointments (CA) bilang DFA secretary.

Si Manalo, na nagretiro mula sa Foreign Service noong 2018, ay nagsilbi bilang Philippine Permanent Representative to the United Nations sa New York sa ilalim ni dating Pangulong Rodrigo Duterte mula 2020 hanggang Hunyo 30, 2022.

Bago ang kanyang posisyon sa New York, si Manalo ay Undersecretary for Policy ng DFA. Isang experienced diplomat, si Manalo ay nagawa nang humarap sa mga diplomatic crises, kabilang na ang South China Sea disputes, na may impresibong kahinahunan.

Ang mabigat na trabahong ito ay muling iniatang kay Manalo kasabay ng mga hamon sa bagong administrasyon habang kayanin nitong makipagdayalogo sa patuloy na territorial disputes sa China kaugnay sa South China Sea.

P-BBM, pinanumpa na ang Cabinet members sa Malacañang

ni Lolet Abania | June 30, 2022

Tumanggap si Pangulong Ferdinand “Bongbong” Marcos Jr. ng military honors sa Malacañang Palace matapos ang kanyang inagurasyon sa National Museum of Fine Arts sa Manila habang pinangunahan ang oathtaking ng kanyang mga Cabinet members ngayong Huwebes.

Kasama ni P-BBM sina First Lady Liza Araneta-Marcos at kanilang mga anak na sina Ilocos Norte Representative Sandro Marcos, Simon Marcos, at Vincent Marcos sa Malacañang.

Pinanumpa naman ng bagong Chief Executive ang mga miyembro ng Cabinet niya na magsisilbi sa ilalim ng kanyang administrasyon, kabilang na si Vice President Sara Duterte na mangunguna sa Department of Education (DepEd).

“This is the first act of actual work that we will be doing for this administration. So let’s get the official part done so that we can get on with the job,” pahayag ni Pangulong Bongbong sa kanyang aides, ilang oras mtapos ang kanyang oathtaking bilang ika-17 pangulo ng Pilipinas.

Pinangalanan din ni P-BBM ang mga personalidad na hahawak ng mga government posts at tutulong sa kanyang pamamahala sa bansa na sina:

• Victor Rodriguez - Executive Secretary

• Vice President Sara Duterte - Department of Education

• Benjamin Diokno - Department of Finance

• Arsenio Balisacan - National Economic and Development Authority

• Jesus Crispin Remulla - Department of Justice

• Emmanuel Bonoan - Department of Public Works and Highways

• Bienvenido Laguesma - Department of Labor and Employment

• Susan Ople - Department of Migrant Workers

• Alfredo Pascual - Department of Trade and Industry

• Erwin Tulfo - Department of Social Welfare and Development

• Christina Garcia-Frasco - Department of Tourism

• Ivan John Enrile Uy - Department of Information and Communications Technology

• Benhur Abalos - Department of the Interior and Local Government

• Jaime Bautista - Department of Transportation

• Amenah Pangandaman - Department of Budget and Management

• Conrado Estrella III - Department of Agrarian Reform

• Jose Faustino Jr. - Department of National Defense

• Clarita Carlos - National Security Adviser

• Juan Ponce Enrile - Presidential Legal Counsel

• Menardo Guevarra - Office of the Solicitor General

• Felipe Medalla - Bangko Sentral ng Pilipinas

• Anton Lagdameo - Special Assistant to the President

• Maria Zenaida Angping - Presidential Management Staff

• Trixie Cruz-Angeles - Presidential Communications Operations Office

Isang araw bago ang inagurasyon, inanunsiyo naman ng kampo ni P-BBM na si outgoing Solicitor General Jose Calida ang uupong chairperson ng Commission on Audit (COA) sa bagong administrasyon habang si Jose Arnulfo “Wick” Veloso bilang pangulo ng Government Service Insurance System (GSIS).

Si Pangulong Bongbong din ang nag-administer ng oath of office ng kanyang anak na si Sandro bilang congressman ng First District ng Ilocos Norte. Habang ang ibang local officials mula sa Ilocos Norte ay pinanumpa rin ni P-BBM.