Suspensyon sa dagdag-hulog sa PhilHealth, inaaral pa ni PBBM

ni Angela Fernando - Trainee @News | February 24, 2024

Inaaral pa rin ni Pangulong Ferdinand "Bongbong" Marcos Jr. ang hirit na suspindihin ang itinataguyod na 5% pagtaas ng premium rates sa PhilHealth.

Ayon sa Presidential Communications Office Secretary na si Cheloy Garafil, hindi pa nagbababa ng desisyon ang Presidente ukol dito.

Saad ni Garafil, nais tiyakin ng Pangulo na ang pagtaas ng PhilHealth premium ay makakadagdag din sa mga benepisyo at coverage ng mga miyembro ng ahensya.

Ito ay matapos ihirit ni Health Sec. Ted Herbosa kay Marcos na ipagpaliban muna ang PhilHealth Premium hike upang mabawasan ang dinadala ng mga miyembro sa gitna ng pagtaas ng presyo ng mga bilihin sa merkado.

Bongbong, Liza, may Valentine’s greetings sa publiko

ni Eli San Miguel - Trainee @News | February 14, 2024

Bumati si Pangulong Ferdinand “Bongbong” Marcos Jr. at First Lady Liza Araneta-Marcos sa publiko para sa Valentine’s Day.

Ibinahagi ni Marcos ang isang larawan kung saan nakayakap siya sa kanyang asawa na may caption na, “Happy Heart’s Day, whether you’re celebrating love for yourself or for another!”

Nag-post rin ang First Lady ng kanyang pagbati na nagsasabing, “As they say... love conquers all.”

Sinabi rin ng mag-asawa na nagluluto ang Pangulo sa bahay, at nagkakaroon sila ng date nights tuwing Miyerkules kung pahihintulutan ng kanilang schedule.

P-BBM, aprub sa 10-year maritime plan

ni Eli San Miguel - Trainee @News | February 13, 2024

Inaprubahan ni Pangulong Ferdinand Marcos Jr. ang isang 10-year plan para sa pagpapabuti ng maritime industry sa bansa, ayon sa Palasyo ngayong Martes.

Sa Executive Order (EO) No. 55, sinabi ni Marcos na dapat isakatuparan ang Maritime Industry Development Plan 2028 (MIDP) upang palakihin ang buong potensyal ng bansa.

“To fully realize our potential as a maritime nation, the country requires a clearly defined and coordinated roadmap that shall accelerate the integrated development of the Philippine Maritime Industry,” saad ni Marcos sa EO.

Nilagdaan ni Executive Secretary Lucas Bersamin ang EO noong Pebrero 8, na inilabas sa media ngayong Martes.

Inoobliga ng bagong EO ang MARINA board na ipatupad ang MIDP, na kung saan kabilang ang modernisasyon at pagpapalawak ng domestic shipping, pati na rin ang pagpapalakas sa overseas shipping industry.

Kasama rin sa plano ang pagpapabuti ng ship-building at repair industry, training ng maritime workers, at pagtataguyod ng eco-friendly maritime practices.

Inutusan din ni Marcos ang lahat ng mga ahensya ng gobyerno na baguhin ang kanilang mga patakaran ayon sa bagong EO.