Tuluy-tuloy na serbisyo para sa mga Pilipino

ni Bong Go @Bisyo Magserbisyo | April 8, 2026

Pagkatapos ng Semana Santa, balik na naman tayo sa normal na takbo ng buhay. Trapik, biyahe, trabaho, gastos—lahat sabay-sabay bumabalik. Pero hindi lang basta pagbabalik ang kinakaharap ng marami nating kababayan ngayon. Kasabay nito ang patuloy na pagtaas ng presyo ng langis na direktang tumatama sa pamasahe, sa presyo ng pagkain, at sa pang-araw-araw na gastusin.

Bilang lingkod-bayan, malinaw sa akin na ang pinakaapektado rito ay ang mga ordinaryong Pilipino—mga manggagawa, tsuper, maliliit na negosyante, at mga pamilyang kapos na nga, lalo pang pinipiga ng sitwasyon. Lagi kong sinasabi na para sa akin, ang mahalaga ay ang kapakanan ng mga walang-wala sa buhay. Hindi puwedeng ipagwalang-bahala ang laman ng sikmura ng ating mga kababayan.

Ngayong tapos na ang panahon ng pagninilay, dala pa rin natin ang bigat ng krisis sa langis. Kaya mahalaga na may malinaw at konkretong mga hakbang na ginagawa para makatulong sa mga Pilipino na nahihirapan.

Hindi sapat ang pansamantalang solusyon. Kailangan tuluy-tuloy ang suporta, lalo na sa mga sektor na direktang naaapektuhan. Ang mga tsuper na araw-araw nakikipagsapalaran sa kalsada, ang mga manggagawang umaasa sa arawang kita, at ang mga pamilyang nagtitipid para lang makaraos—sila ang dapat unang maramdaman ang tulong. Dapat maramdaman nila na may umaalalay sa kanila sa ganitong panahon. Higit sa lahat, dapat walang sektor na maiwan. Kaya nananawagan ako sa Executive Department na maglatag ng kongkretong plano para tumugon sa matinding epekto ng krisis sa langis sa pamumuhay ng mga Pilipino, lalo na ang mga mahihirap.

Sa abot ng aking makakaya bilang mambabatas, anumang programa o batas na kailangang isulong para maibsan ang paghihirap ng ating mga kababayan ay susuportahan at ipaglalaban ko.

Samantala, noong April 6, personal na dinaluhan natin ang turn-over ng bagong Super Health Center sa Tulunan, Cotabato. Sa parehong araw, dumalo rin tayo sa turn-over ng isa pa sa San Fernando, Bukidnon. Bilang Vice Chairperson ng Senate Committee on Health, patuloy kong susuportahan ang mga programang makakapaglapit ng serbisyo medikal sa ating mga kababayan.

Kinabukasan naman, April 7, nakibahagi tayo sa 109th founding anniversary ng bayan ng Manolo Fortich sa Bukidnon. Kasabay rin nito ang pagdiriwang na kanilang Banog-Banog Festival.

Sinundan ito ng pagdalo natin sa turn-over naman ng bagong pedestrian overpass sa Kibawe sa parehong probinsya. Ang proyektong ito ay sinuportahan natin bilang Vice Chairperson ng Senate Committee on Finance. Muli kong pinapaalalahanan ang kababayan natin, mag-ingat po tayo palagi sa ating pagbyahe!

Noong nakaraang linggo rin, tumulong ang aking team sa iba’t ibang kababayan, kabilang ang mga biktima ng sunog sa Malabon City; Bacoor City, Cavite; Pasay City; at Parañaque City. Tumulong din tayo sa mga tricycle drivers sa Dinalupihan, Bataan.

Nagbigay rin ng suporta ang aking team sa mga nagsipagtapos mula sa Basilan National High School sa kanilang Commencement Exercises. Namahagi rin tayo ng assistance sa mga TESDA graduates sa Iligan City, Lanao del Norte.

Sa mga susunod na araw, patuloy nating babantayan ang pagbibigay ng tulong sa mga sektor na direktang naaapektuhan ng mga hamong pang-ekonomiya. Mananatili ang aking paninindigan na magtrabaho at tumulong sa mga nangangailangan, dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyon sa kabuhayan at kalusugan ng mga Pilipino sa panahon ng krisis

ni Bong Go @Bisyo Magserbisyo | March 26, 2026

Nitong mga nakaraang linggo, hindi natin maikakaila ang bigat na dala ng patuloy na pagtaas ng presyo ng produktong petrolyo. Dahil sa tensyon sa Middle East, apektado ang pandaigdigang suplay ng langis at tayo sa Pilipinas ay direktang tinatamaan nito.

Bilang inyong lingkod na nakatuon sa aking health reforms crusade, alam ko na ang bawat pisong dagdag sa krudo ay may epekto sa kalusugan at nutrisyon ng pamilyang Pilipino dahil sa pagmahal ng mga bilihin.

Sa gitna ng krisis na ito, nananawagan ako ng mabilis at konkretong aksyon. Sabi ko nga noon pa, domino effect talaga ito. Kaya naman kaming mga mambabatas sa Senado ay handang tumulong. Kung kailangan nating i-suspend ang excise tax kapag umabot na sa $100 ang bawat bariles ng langis sa world market, dapat natin itong gawin upang maibsan ang hirap ng ating mga kababayan.

Ang aking layunin ay simple: dapat lang ibalik sa taumbayan ang pera nila ngayong panahon ng krisis. Pondo naman ng Pilipino ‘yan, kaya nararapat lang na ito ay mapakinabangan nila nang direkta. Hindi katanggap-tanggap ang mga ulat na maraming tsuper, halimbawa, ang hindi pa rin nabibigyan ng kanilang fuel subsidy dahil sa bagal ng proseso o dahil wala sila sa listahan.

Umaapela ako sa mga ahensya ng gobyerno, lalo na sa DOE, DA, at DOTr, na bilisan at ayusin ang inyong mga fuel discounts at subsidy programs. Unahin po ninyo ang mga mahihirap nating kababayan—iyung mga driver na “isang kahig, isang tuka” na siyang pinakaapektado sa bawat paggalaw ng presyo ng langis. Hindi puwedeng nakabinbin ang tulong habang patuloy na tumataas ang presyo ng petrolyo.

Bilang inyong senador, kasama ng mga kapwa ko mambabatas, patuloy kong isusulong ang mga hakbang na layuning magpapagaan sa pasanin ng pamilyang Pilipino. Ang bawat polisiya at tulong ay dapat magresulta sa mas maayos na buhay at kalusugan para sa lahat.

Patuloy akong magseserbisyo at tutulong nang may malasakit sa kapwa sa abot ng aking makakaya dahil ang kapakanan ng bawat Pilipino ang aking prayoridad.

Samantala, patuloy ang ating suporta sa mga kababayan nating Pilipino. Noong March 20, kasabay ng pagdiriwang natin ng Women’s Month at bilang Chairperson ng Senate Committee on Sports, dumalo tayo sa All-Women Sports Awards sa Philippine International Convention Center, Pasay City, kung saan binigyang-pugay natin ang dedikasyon at kahusayan ng mga atletang Pilipina na patuloy na nagbibigay ng inspirasyon sa ating mga kababayan.

Binisita rin natin ang 228 biktima ng sunog sa Agdao, Davao City. Kasabay ng Fire Prevention Month ngayong March, patuloy ang ating paalala na ang gamit, nabibili. Ang pera, kikitain. Subalit ‘yung pera na kikitain, hindi po nabibili ang buhay. A lost life is a lost life forever. Ang importante ay buhay tayo. Magtulungan lang po tayo. 

Kahapon naman ay dumalo ako sa Vice Mayors' League of the Philippines CARAGA Regional Chapter Legislative Congress 2026 fellowship night, kung saan nakasama ko ang mga local officials mula sa CARAGA. 

Samantala, nakiisa rin ang aking team sa Liga ng mga Barangay - Masbate Provincial Chapter Annual Congress 2026. Patuloy din ang ating pagtulong sa mga nangangailangan, tulad ng mga nasunugan sa Antipolo City; Bacoor City, Cavite; Cebu City; Orani, Bataan; Bacolod City; Pasay City; Puerto Princesa City, Palawan; at Loboc, Bohol. 

Nabigyan din ng tulong ang mga TESDA scholars mula sa Makati City. Tumulong din tayo sa mga mahihirap na kababayan natin sa Calauan, Laguna.

Bilang Mr. Malasakit, pahahalagahan ko ang tiwalang ibinigay ninyo sa akin. Magseserbisyo ako sa ating mga kapwa Pilipino sa abot ng aking makakaya, dail bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga kabataan, bibigyan ng mas malawak na suporta at oportunidad

ni Bong Go @Bisyo Magserbisyo | March 20, 2026

Bilang Chairman ng Senate Committees on Youth at on Sports, nagsagawa tayo ng pagdinig noong March 17 upang talakayin ang kalagayan ng kabataan—lalo na pagdating sa edukasyon, sports, at mental health. Mahalaga sa akin ang ganitong mga pag-uusap dahil malinaw na ang kinabukasan ng bansa ay nakasalalay sa kung paano natin inaalagaan ang ating mga kabataan ngayon.

Alam natin na ang kabataan ang pag-asa ng ating bayan. Sila ang susunod na mga lider, manggagawa, innovator, at lingkod-bayan. Kung anuman ang magiging direksyon ng bansa, doon din ito huhubog sa kung anong klaseng suporta, oportunidad, at gabay ang ibibigay natin sa kanila habang bata pa sila. Kaya bilang senador, hangad ko na ang bawat kabataang Pilipino ay may pagkakataong matuto, umunlad, at magtagumpay sa buhay.

Sa usapin ng edukasyon, patuloy kong isinusulong ang mas malawak na access para sa kabataan. Bilang isa sa mga may-akda at co-sponsor ng Senate Bill No. 514, itinutulak ko ang pagpapalakas ng Tertiary Education Subsidy upang matiyak na ang tulong ay napupunta sa mga estudyanteng tunay na nangangailangan, bilang pagpapatuloy ng libreng edukasyon sa kolehiyo na ipinaglaban ko noon at naisakatuparan sa ilalim ng Republic Act No. 10931 na nilagdaan ni dating Pangulong Rodrigo Duterte.

Naging malaking hakbang ang batas na ito tungo sa pantay na oportunidad at mas magandang kinabukasan para sa kabataang Pilipino. Milyun-milyong kabataan na po ang nag-benefit mula rito, at inaasahan natin na mas marami pang matutulungan by expanding the capacity of schools. 

Itong batas na ito, muntik na nga pong ma-veto, parati naman pong kumokontra ang mga finance managers tuwing may karagdagang gastos po ang gobyerno, pero bilang Special Assistant to the President noon, ipinaglaban natin ito at kinausap natin si Chairman Popoy de Vera na ipaglaban ito, dahil alam namin ang kahalagahan nito. Mayroon nga pong free tuition or scholarship sa Davao na isang siyudad, mas lalong importante ito sa buong Pilipinas.

Sa huli, nanaig po ang ating ipinaglaban.

Isa rin sa mga hakbang dito ang pagsusulong ng Senate Bill No. 1894 na layong palawakin pa ang free tertiary education. Layunin nito na ang mga mahihirap na estudyante ay awtomatikong makakakuha ng tertiary education subsidy, kahit pa sila ay mag-aral sa private higher education institutions kung walang available na pampublikong paaralan sa kanilang lugar.

Sa larangan naman ng sports, ipinaglaban natin bilang author at co-sponsor ang Republic Act No. 11470 na nagtatag sa National Academy of Sports, upang mabigyan ng pagkakataon ang mga student-athletes na pagsabayin ang pag-aaral at pagsasanay. Palagi nating paalala: Get into sports, stay away from drugs, to keep us healthy and fit!

Bilang health reforms crusader, mahalaga sa akin hindi lang ang physical kundi pati ang mental health ng ating kabataan.

Sinuportahan din natin ang RA 11036 o ang Philippine Mental Health Act, na naglalayong dalhin ang mental health services hanggang sa antas ng barangay at maisama ito sa mga programa sa paaralan at komunidad. Ngunit sa aktwal na implementasyon, nakikita pa rin ang kakulangan.

Kaya naman sinuportahan ko rin bilang isa sa mga authors at co-sponsor ang RA 12080 o Basic Education Mental Health and Well-Being Promotion Act na nag-uutos ng pagtatatag ng Care Centers sa bawat pampublikong paaralan upang mabantayan ang kalagayan ng mga estudyante. Mayroon din akong panukalang Senate Bill No. 176 na naglalayong magtatag ng Mental Health Offices sa lahat ng State Universities and Colleges (SUCs).

Dahil dito, tinalakay din natin ang SBN 258 at SBN 1948 na naglalayong itatag ang Youth Suicide Prevention Act. Kabilang sa mga panukala ang paglalagay ng Life Planning Education sa kurikulum at ang pagkakaroon ng psychologist sa bawat paaralan upang maagapan ang mga kabataang nangangailangan ng tulong.

Malaki pa ang kakulangan ng bansa sa mental health professionals. Nanawagan din tayo sa Department of Budget and Management na bigyang prayoridad ang pagpondo sa ganitong mga programa. Imbes na matulog lamang ang pondo ng National Youth Commission, sana ay magamit ito sa mga inisyatibang susuporta sa ating kabataan.

Pera po ng taumbayan ‘yan. Hindi natin pwedeng hayaang matulog o mawala nang hindi napapakinabangan.

Samantala, upang lalo pang makatulong sa mga Pilipinong nangangailangan, personal nating tinulungan ang 349 na pamilyang naapektuhan ng sunog sa Tondo, Maynila noong March 12, kung saan nagtungo tayo mismo sa ground zero at sinuri ang kalagayan ng mga pamilya.

Dahil ang March ay isang mahalagang panahon para sa pagpapalakas ng kamalayan sa fire prevention, hinihikayat ko ang mga lokal na pamahalaan at ang publiko na magtulungan sa pagpapatibay ng mga hakbang sa kaligtasan laban sa sunog. Sa pamamagitan ng tuluy-tuloy na pagsisikap at maagap na lehislasyon, layunin nating makabuo ng mas ligtas at mas handang bansa.

Maliban pa riyan, nakibahagi rin ako sa Liga ng mga Barangay Northern Samar Provincial Chapter Congress kung saan binigyang-diin ko ang kahalagahan ng maayos na pamamahala ng datos at digitalization para sa mas mabilis na serbisyo sa mga komunidad. 

Tuluy-tuloy din ang pagtulong ng aking team sa ating mga kababayan sa grassroots level habang umaalalay sila sa mga biktima ng sunog sa Pasay City at Quezon City.

Mayroon ding mga iskolar tayong natulungan mula sa Bacolod at Lala sa Lanao del Norte, at sa Kalayaan, Laguna.

Bukod dito, nabigyan din natin ng karagdagang tulong ang mga biktima ng ashfall mula sa Mt. Kanlaon sa La Carlota City at Bago City.

Ipagpapatuloy ko ang pagiging lingkod ninyo sa pagpapatupad ng mga programang makatutulong sa sambayanang Pilipino, dahil bisyo ko ang magserbisyo at naniniwala ako na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.