PhilHealth funds, para sa pasyente, hindi sa ibang proyekto

ni Bong Go @Bisyo Magserbisyo | February 6, 2026

Bilang isang health reforms crusader, mahalaga sa akin ang sapat, maayos at napapanahong pagbabayad ng benepisyo ng Philippine Health Insurance Corporation (PhilHealth) para sa ating mga kababayan. Malaking tulong sa mga Pilipino, lalo na ang mga mahihirap, ang iniulat ng PhilHealth na marami umanong benefit claims ang napakinabangan ng mga pasyente nitong nakaraang taon.

Lagi kong sinasabi, ang pondo ng PhilHealth ay dapat gamitin sa health. Pera ito ng taumbayan at dapat lamang na ibalik sa kanila sa pamamagitan ng maayos na serbisyong medikal. Karapatan ng mga pasyente na maramdaman ang ginhawang dulot kapag nababawasan ang pasanin sa gastos. Sa panig ng mga ospital, mahalaga ang tuluy-tuloy na daloy ng pondo upang maipagpatuloy ang serbisyong medikal.

Sa sesyon ng Senado nitong Martes, muli tayong nanawagan para matugunan ang tinatawag kong "double whammy" sa pondo ng PhilHealth noong isang taon – ang P60 bilyong "excess funds" na ilegal at imoral na kinuha sa PhilHealth para gamitin sa ibang proyekto, at ang zero budget ng ahensya sa 2025.

Salamat sa Supreme Court dahil ipinag-utos na ibalik sa PhilHealth ang P60 bilyon. Pero paano naman ang pondong ipinagkait sa mga pasyente dahil sa zero budget allocation noong isang taon? Napakarami sanang Pilipinong may sakit ang natulungan nito, napakaraming buhay sana ang naisalba. Mariin ang ating panawagan na maibalik ito sa taumbayan.

Bilang inyong senador, patuloy kong isusulong ang mga batas, programa, at reporma na mangangalaga sa kalusugan ng mga Pilipino lalo na ng mahihirap nating mga kababayan.

Samantala, tuluy-tuloy ang pagbibigay-tulong natin sa mga kababayan nating nangangailangan. Nitong January 28, personal tayong nagtungo sa Makati City para maghatid ng assistance sa mga pamilyang nasunugan doon. Nakasama ko rin ang mga barangay officials sa pag-iikot sa lugar ng insidente. Sa sumunod na araw, January 29, binigyang-pugay natin ang mga Barangay Health Workers nang dumalo tayo sa UNI Global Union Philippine Liaison Council (UNI-PLC) BHW Island Cluster Training and Planning Session sa B Hotel, Quezon City.

Personal din nating binisita ang mga residenteng nasunugan sa Barangay 139, Zone 15, Pasay City at nagbigay ng tulong sa mga ito. 

Nagpatuloy rin ang aking team sa pagbibigay ng agarang tulong sa mga biktima ng sunog sa Quezon City; Manay, Davao Oriental; Puerto Princesa City, Palawan; Sta. Rosa, Laguna; at Iligan City, Lanao del Norte. Nagbigay rin kami ng tulong sa ilang indigent na residente sa Macabebe, Pampanga. Bukod dito, naghatid din kami ng ayuda sa mga biktima ng lindol sa Lebak, Sultan Kudarat.

Nagpaabot din tayo ng pakikiramay at tulong sa mga naiwang pamilya ng mga sundalong killed in action (KIA) na sina Sgt. Gilbert P. Arnoza, Sgt. Junel M. Calgas, Pfc. Sean Mark A. Laniton, at Ssg. Diosito A. Araya, na nasawi sa isang ambush incident noong January 23 habang ginagampanan ang kanilang tungkulin.

Kaugnay ng parehong insidente, kinamusta rin natin ang wounded-in-action (WIA) na si Cpl. Rollen dela Cruz ng 10th Infantry Battalion sa Camp Evangelista, Cagayan de Oro City, bilang pagpapakita ng malasakit, pagkilala sa kanilang sakripisyo, at pagbibigay-diin sa kanyang patuloy na suporta at panalangin para sa mga uniformed personnel at kanilang mga pamilya.

Bilang mambabatas, gagawin ko ang aking trabaho sa abot ng aking makakaya upang mapabuti ang buhay ng ating mga kababayan dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagkilala sa mga sakripisyo at kabayanihan ng ating mga sundalo

ni Bong Go @Bisyo Magserbisyo | January 30, 2026

Muli kong ipinapaabot ang taos-pusong pakikiramay sa mga naiwang pamilya ng apat na sundalong nasawi sa naganap na engkuwentro sa Munai, Lanao del Norte noong Biyernes ng umaga, January 23.

Saludo kami sa katapangan at kabayanihan nina SSgt Diosito A. Araya ng 1st Civil Military Operations Battalion, Sgt Gilbert P. Arnoza ng 106th Infantry Battalion, Sgt Junel M. Calgas ng 97th Infantry Battalion, at Pvt Sean Mark Laniton ng 44th Infantry Battalion ng Philippine Army. Maraming salamat sa inyong serbisyo at sakripisyo.

Sa ganitong mga pagkakataon, hindi maiiwasang maalala ang sakripisyo ng SAF 44 na nasawi sa Mamasapano noong 2015. Dahil sa bigat ng trahedyang iyon, idineklara ang ika-25 ng Enero bilang National Day of Remembrance for the Heroic Sacrifice of the SAF 44 sa bisa ng Proclamation No. 164 na nilagdaan noong 2017 sa ilalim ng administrasyon ni dating Pangulong Rodrigo Duterte.

Ang proklamasyong ito ay paalala na ang paggunita sa mga nasawi sa linya ng tungkulin ay hindi lamang usapin ng alaala kundi ng pagkilala sa tunay na halaga ng kanilang sakripisyo.

Noong panahon ni dating Pangulong Rodrigo Duterte noong 2018, dinoble natin ang sahod ng entry level na mga pulis, sundalo, at iba pang uniformed personnel—kabilang ang Coast Guard, Bureau of Fire Protection, at Bureau of Jail Management and Penology—bilang pagkilala sa bigat ng kanilang responsibilidad at panganib na kaakibat ng kanilang tungkulin. Ipinakita nito ang malinaw na paninindigan ng pamahalaan na suportahan ang ating mga tagapagtanggol ng bayan, at patuloy ang panawagan ng buong suporta para sa lahat ng ating uniformed personnel.

Dahil sa sakripisyo ng mga uniformed personnel na handang magbuwis ng buhay, hangad natin na mapangalagaan ang kapakanan ng kanilang mga mahal sa buhay. Malaking bahagi nito ang edukasyon ng kanilang mga anak, na posibleng mangulila dahil sa tungkulin ng ating mga men and women in uniform.

Sa pagsisimula ng 20th Congress, naghain ako ng Senate Bill No. 684, o ang Scholarship for Children of Fallen MUP Bill. Layunin ng panukalang ito na mabigyan ng tuluy-tuloy na tulong-edukasyon ang mga anak ng mga sundalo at uniformed personnel na nasawi o permanenteng na-disable sa linya ng tungkulin.

Kung maisabatas, saklaw ng panukala ang iba’t ibang hanay ng military at uniformed personnel, kabilang ang Armed Forces of the Philippines (AFP), Philippine National Police (PNP), National Bureau of Investigation (NBI), Philippine Coast Guard (PCG), Bureau of Fire Protection (BFP), Philippine Drug Enforcement Agency (PDEA), at Bureau of Jail Management and Penology (BJMP).

Bukod sa SBN 684, patuloy kong sinuportahan ang mga panukala at batas na naglalayong mapabuti ang kalagayan ng ating mga uniformed personnel. Isa ako sa principal authors at co-sponsors ng Republic Act No. 12177, o ang Free Legal Assistance for Military and Uniformed Personnel Act, na nagtatatag ng libreng serbisyong legal para sa mga kasong may kaugnayan sa kanilang serbisyo.

Kabilang din ako sa mga co-authors ng Republic Act No. 11549 na nagbaba ng height requirement sa PNP upang mas maraming kwalipikadong aplikante ang mabigyan ng pagkakataon, at sinuportahan ko ang Republic Act No. 11200 na nag-ayos ng rank classification ng PNP upang mas maging malinaw ang operasyon at pamumuno.

Sa pagpapatuloy ng mga repormang ito, naghain din ako ng Senate Bill No. 682, ang panukalang Philippine Coast Guard Modernization bill, na layuning maglatag ng sampung taong programa para sa modernisasyon ng kagamitan, pasilidad, at kakayahan ng PCG.

Samantala, noong nakaraang linggo, tatlong magkakasunod na araw tayong bumisita sa iba’t ibang pamilyang naapektuhan ng sunog. Noong January 21, personal akong nagtungo sa Barangay Addition Hills sa Mandaluyong City upang magbigay ng tulong sa kabuuang 193 biktima ng sunog.

Noong January 22, pumunta naman ako sa Barangay NBBS sa Navotas City upang maghatid ng ayuda sa 40 benepisyaryo. At noong January 23, sa Barangay 607 sa Sta. Mesa, Maynila, personal na naghatid tayo ng tulong sa 172 biktima ng sunog. Nitong January 28, personal din tayong nagbigay ng tulong sa 335 pamilyang nasunugan mula sa Tejeros at Sta. Cruz, Makati City.

Nagpatuloy rin ang aking team sa pagbibigay ng agarang tulong sa mga biktima sa Davao City, at Manay, Davao Oriental. Nagbigay rin kami ng tulong sa ilang indigent na residente sa Macabebe, Pampanga. Bukod dito, naghatid din kami ng ayuda sa mga biktima ng lindol sa San Isidro at Governor Generoso sa Davao Oriental.

Dumalo rin ang aking team sa inagurasyon ng Super Health Center sa Barangay Talon-Talon sa Zamboanga City.

Bilang mambabatas, gagawin ko ang aking trabaho sa abot ng aking makakaya upang mapabuti ang buhay ng ating mga kababayan dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Oportunidad para sa mga kapwa Pilipinong walang trabaho

ni Bong Go @Bisyo Magserbisyo | January 23, 2026

Mahigit dalawang milyong Pilipino ang nananatiling walang trabaho batay sa pinakahuling datos ng Philippine Statistics Authority. Katumbas nito ay marami pa ring pamilya ang patuloy na naghahanap ng hanapbuhay at sapat na kita para matugunan ang araw-araw na pangangailangan. Marami ring mga kababayan natin ang may trabaho nga, ngunit kapos pa rin.

Sa huling bahagi ng 2025, kahit papaano ay bumaba ang unemployment rate. Bilang senador, mahalaga sa akin na maisulong ang mga programa at batas na susuporta sa pamilyang Pilipino para magkaroon ng sapat na budget sa upa sa bahay, pagkain, kuryente, tubig, gamot at iba pang mga pangangailangan. Madalas kong sabihin na kung may trabaho ang tao at sapat ang sahod, mas nagiging matatag ang pamilya. Kaya mahalaga ang tuluy-tuloy na paglikha ng trabaho at ang pagtiyak na ang kita ay hindi kinakain ng inflation.

Ngayong 20th Congress, inihain ko ang Senate Bill No. 175, na naglalayong magtakda ng P100 na dagdag sa arawang minimum wage sa buong bansa. Para sa akin, ito ay praktikal na tugon sa tumataas na presyo ng bilihin. Umaasa tayo na makakatulong ito para makahabol ang sahod sa gastusin ng mga manggagawa.

Kasabay nito, isinusulong ko rin ang Senate Bill No. 174, o ang panukalang Indigent Jobseekers Assistance, na layong magbigay ng subsidiya sa mga mahihirap na naghahanap ng trabaho. Marami sa kanila ay pinoproblema ang pamasahe, gastos sa mga dokumento, at iba pa. Kung matutulungan natin sila sa bahaging iyon, mas nagiging bukas ang pinto ng oportunidad.

Para naman sa mga nasa kanayunan at mga pansamantalang nawalan ng hanapbuhay, ipaglalaban ko ang Senate Bill No. 177, o ang Rural Employment Assistance o TUPAD bill, upang ma-institutionalize ang mga pansamantalang trabaho para sa displaced workers sa mga rural communities. Sa ganitong paraan, may agarang tulong habang naghahanap ng mas pangmatagalang pagkakakitaan.

Sa tulong ng mga kapwa ko mambabatas, magtatrabaho ako para sa kapakanan ng karaniwang manggagawa sa abot ng aking makakaya at tututukan ko ang kanilang sektor dahil naniniwala ako na ang trabaho at disenteng kita ang pundasyon ng maayos na buhay ng bawat pamilyang Pilipino.

Samantala, bilang suporta sa ating mga manggagawa, namigay rin tayo ng karagdagang tulong noong nakaraang linggo sa mga displaced workers sa Moalboal, Alegria, Carcar City, at San Fernando sa Cebu, gayundin sa Tagbilaran City, Bohol. Ang mga displaced workers na ito ay nabigyan ng pansamantalang trabaho mula sa national government.

Patuloy din na naghatid ng tulong ang aming team sa iba’t ibang panig ng bansa habang tumulong sila sa mga biktima ng sunog sa Biñan City, Laguna; Cebu City; Sto. Tomas, Pampanga; Pasay City; at Davao City.

Makakaasa kayo na patuloy akong magsisikap sa abot ng aking makakaya, dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.