Fishing ban sa 6 na bayan sa Oriental Mindoro, tuloy — BFAR

ni Mai Ancheta | May 25, 2023

Nais ng Bureau of Fisheries and Aquatic Resources (BFAR) na mapanatili ang fishing ban sa anim na bayan sa Oriental Mindoro dahil sa patuloy na presensiya ng langis, grasa at nakalalasong kemikal sa karagatan mula sa epekto ng oil spill ng MT Princess Empress.

Batay sa inilabas na bulletin update ng BFAR, inirekomenda ng ahensya na magpatuloy ang ban sa pangingisda sa mga bayan ng Calapan, Pola, Bansud, Gloria at Pinamalayan dahil sa peligro ng kontaminasyon.

Lumitaw sa water sampling test at fish samples na nakitaan pa rin ng langis, grasa at polycyclic aroma hydrocarbons (PHA) ang mga ito mula sa anim na bayan.

Pasado naman sa sampling test ang mga bayan ng Bongabong, Bulalacao, Mansalay, Roxas, Baco, Puerto Galera at San Teodoro at maaari nang makapangisda ang mga mamamayan.

Red tide alert

ni Mai Ancheta | May 21, 2023

Limang baybayin sa Visayas at Mindanao ang tinamaan ng red tide matapos magpositibo ang water samples na sinuri ng Bureau of Fisheries and Aquatic Resources (BFAR).

Ayon sa BFAR, ang mga nagpositibo sa paralytic shellfish poisoning toxin o red tide ay ang mga baybaying sakop ng San Pedro sa Basey, Samar; Dauis at Tagbiliran sa Bohol; Lianga bay sa Surigao del Sur at Dumanquillas sa Zamboanga del Sur.

Dahil sa kontaminasyon, nagbabala ang BFAR sa publiko na iwasan muna ang pagbili at pagkain ng shellfish gaya ng tahong at talaba gayundin ang alamang o hipon mula sa mga lugar na natukoy ang kontaminasyon ng red tide.

Pinayuhan naman ng ahensya ang mamamayan na hugasan at lutuing mabuti ang iba pang lamang-dagat na nakukuha sa mga nabanggit na karagatan gaya ng isda, pusit at alimango para makasiguro ng kaligtasan.

Ang red tide ay nagmumula sa hindi normal na paglaki ng algae na nagtataglay ng lason at pumapatay ng mga isda at naaapektuhan ang mga shellfish na delikado kapag nakain ng mga tao.

Kalimitang sintomas kapag nakakain ng kontaminado sa red tide ay pag-ubo, pagbahing at nagluluha.

Red Tide Alert

ni Lolet Abania | July 3, 2022

Nagpositibo sa toxic red tide ang limang lugar sa bansa habang pinapayuhan ang publiko na huwag kumain ng anumang makokolektang shellfish mula dito, ayon sa Bureau of Fisheries and Aquatic Resources (BFAR).

Ang mga lugar na lumabas na may paralytic shellfish poison (PSP) o toxic red tide na lampas sa regulatory limit nitong Hunyo 30, base na rin sa laboratory results na isinagawa ng BFAR at local government units (LGUs) ay ang mga sumusunod:

• coastal waters ng Milagros sa Masbate

• coastal waters ng Dauis at Tagbilaran City sa Bohol

• Dumanquillas Bay sa Zamboanga del Sur

• Litalit Bay, San Benito sa Surigao del Norte

• Lianga Bay in Surigao del Sur

Ayon sa BFAR, ang shellfish at alamang (Acetes sp.) na makukuha sa mga nabanggit na lugar anila, “are NOT SAFE for human consumption.”

Gayunman, ang mga isda, pusit, hipon at crab na mahuhuli mula sa mga nasabing lugar ay ligtas namang kainin subalit dapat na linising mabuti, at tanggalin ang kanilang mga laman-loob bago ito lutuin.