Apektado ang Pinoy sa pagkuha ng ibang imports sa B.League

by Anthony Servinio @Sports News | September 9, 2026

Photo: B.LEAGUE - Japan Professional Basketball League

Laro ngayong Huwebes - MOA

7 PM Hokkaido vs. Gunma

Malaki ang naging ambag ng mga Filipino sa nakamanghang pag-usbong ng Japan B.League sa nakalipas na 10 taon. Dahil sa mga kababayan, napalapit ang liga sa isa sa pinakamalaking merkado ng laro sa Asya. Palabas sa telebisyon at internet ang mga laro.

Lalong umiinit pagsapit ng finals kung saan nagdaraos ng mga espesyal na selebrasyon ang B.League sa mga mall. Maaaring kumuha ng isang manlalarong Asyano ang mga koponan bilang import.

Noong una ay ang Pilipinas, Tsina at Timog Korea ang mga pinagkukuhanan ng mga koponan subalit sa mga nakaraang taon ay binago ang patakaran at pinayagang kumuha mula sa mga ibang bansa tulad ng Lebanon, Indonesia, Chinese Taipei at iba pa.

Sa 2026-27 torneo na magbubukas sa Setyembre 22, may pinagsamang 11 Pinoy sa Division I at II. Ito ay sina Dwight Ramos, AJ Edu, Kiefer at Thirdy Ravena, Ray Parks, Quintin Millora-Brown, Francis Lopez, Mike Phillips, Roosevelt Adams, Jamie Malonzo at Matthew Wright.

Maaaring isama sa listahan si Matthew Aquino subalit nakalista siya bilang lokal dahil may lahing Hapon ang pamilya ng kanyang nanay. Naglaro noong nakaraang taon pero wala pang koponan sa ngayon si Kai Sotto.

Masasabi na ang pagdami ng mga bansang maaaring kuhanan ng import ay nakaapekto sa pag-asa ng mga Pinoy na makakuha ng trabaho kung saan ang bayad ay napakalayo ng agwat kung nanatili sila sa Pilipinas.

Subalit may ilan na pumulot lang ng karanasan at umuwi rin tulad nina RJ Abarrientos, Justine Baltazar at Javi Gomez de Liano.

Sa kasamaang palad, ang kalendaryo ng B.League ang itinuturong dahilan kung bakit ang ilang mga kasapi ng Gilas Pilipinas lalo na sina Ramos at Edu ay hindi makakalahok sa Aichi-Nagoya Asian Games na nagkataon ay sa Japan din gaganapin.

Sa gitna nito, magiging tagahanga muna ang dalawa at sasamahan ang milyon na sumusuporta sa pambansang koponan sa layuning maidepensa ang gintong medalya.

FEU magpapasikat sa opening ceremony, aksiyon ng UAAP simula na sa Linggo

by Gerard Arce @Sports News | September 8, 2026

Photo: Ang walong coaches ng UAAP season89 sa press conference ng torneo sa Novotel, Manila. (Gerard Arce)

Mga laro sa Sabado (Set. 12) (MOA Arena)

5 pm – Opening Ceremony

Mga laro sa Linggo (Set 13) 12 nn –

FEU vs Adamson 2:30 pm –

La Salle vs NU 6 pm –

UP vs UST (Separate Tickets)

Patutunayan ng season host Far Eastern University na pangkalahatan ang temang ihahandog upang mas lalong makarating ang kanilang mensahe higit pa man sa kumpetisyon na ipinapakita sa loob at labas ng pampalakasan na kinakatawan ng bawat walong miyembrong unibersidad.

Mula sa inspirasyong dulot ng "Be Brave" na mantra ng unibersidad, nananawagan ang tema sa komunidad ng UAAP na makipagkumpitensya nang may dalang integridad, kaantabay ang pagsuportahan sa isa't isa, at patatagin ang mga ugnayang nagpapahalaga sa collegiate sports nang higit pa sa simpleng kompetisyon.

Opisyal na magbubukas ang season sa darating na Sabado sa SM Mall of Asia Arena sa Pasay City sa isang magarbong pestibidad na katatampukan ng mga FEU Alumni na sina Gloc-9 at Vice Ganda na mangunguna sa opening ceremony, kung saan maririnig ang opisyal na tugtog nitong “Dito sa Amin” na ginawa at kakantahin ni Gloc-9.

“It carries the same spirit, it speaks of belonging, pride, unity and the courage to stand together,” pahayag ni UAAP Season 89 President Mark Molina patungkol sa kanta, kahapon sa ginanap na press conference sa Novotel Manila sa Quezon City, na pinanatili ang isang malinaw at nakikilalang logo na marka ng pangkalahatang pagkilala sa sports organization.

“We believe there should be only one UAAP logo. Creating a different logo for every season can confuse the audience and weaken the branding of the UAAP logo,” dagdag ni Molina, na ipinagmalaki ring nilikha ang naturang logo ng kanilang Alumna noong 2021 na si FEU Bachelor of Fine Arts Visual Communication student Darryl John Digal, na ipapares naman sa tema ngayong season na “For Everyone, UAAP.”

Inilahad rin sa naturang kaganapan ang pagpapalabas ng mga laro sa UAAP Varsity Channel 263 sa HD, gayundin sa One Sports free-to-air television, at sa CignalPlay app, mapapanood rin ng live sa buong mundo ang UAAP men’s basketball tournament sa ONE Sports Youtube channel.

Pormal namang masisilayan ang mga aksyon sa hardcourt sa darating na Linggo, Setyembre 13 sa SMART Araneta Coliseum, para sa triple-header na katatampukan ng FEU Tamaraws kontra sa Adamson University Soaring Falcons sa alas-12:00 ng tanghali na susundan ng defending champion De La Salle University Green Archers laban sa National University Bulldogs sa alas-2:30 ng hapon sa rematch ng Final Four noong isang taon, habang magtatapat sa main game sa alas-6:00 ng gabi ang runner-up na University of the Philippines Fighting Maroons at third placer University of Santo Tomas Growling Tigers, sa hiwalay naman na ticket.

Maasim pa rin ang kampanya ng Gilas kontra South Korea

by Anthony Servinio @Sports News | September 6, 2026

Photo: Umulit sa panalo ang South Korea laban sa Gilas Pilipinas sa kanilang tune-up games bago ang Asian Games sa Japan. Photo by: Coach E.2.0

Laro sa Set. 11 - Aichi International 12:00 PM Pilipinas vs. Bahrain

Pinagbayaran ng bisitang Gilas Pilipinas ang matamlay na simula at tuluyang winalis ng host Timog Korea ang Hana Bank Invitational, 69-42, kahapon sa Suwon KT Sonicboom Arena.

Kinuha rin ng mga Koreano ang unang tapatan noong Biyernes, 81-55. Sa unang quarter ay apat na puntos lang ang naitala ng mga Pinoy sa mga shoot nina Sedrick Barefield at reserba Brandon Ganuelas-Rosser at umarangkada palayo ang Korea, 19-4.

Patuloy ang maasim na shooting ng Gilas at lalong lumaki ang agwat matapos ang dalawang quarter, 38-14. Gumawa ng 14 si Zavier Lucero subalit pito dito ay sa huling quarter na nagbukas sa 56-27 at maagang tiyak na ang resulta.

Sumunod si Adrian Nocum na siyam lang habang tig-pito sina Barefield at BGR. Double-double si Lee Hyun Jun na 11 at 15 rebound. Nanguna si Yu Ki Sang na may 15 at Yeo Jun Seok na may 14.

Bubuksan ng defending champion Gilas ang kanilang kampanya sa Asiad laban sa Bahrain sa Setyembre 11 sa Aichi International Arena. Susundan ito ng Kazakhstan sa 12 at Tsina sa 14.

Handang sumabak na 11 lang ang manlalaro oras na hindi mabigyan ng pahintulot si Justin Brownlee ng mga doktor.

Nalaman din na hindi makakalaro si Geo Chiu sa dahilan na hindi siya kasama sa naunang 30 pangalan na ipinasa ng SBP at ang huling 12 ay maaaring kunin sa nasabing listahan.

Hindi na rin hahabol si Kai Sotto matapos mabigong pumasok sa Texas A & M University na magsisilbi sanang tulay para makuha siya ng NBA.

Nagpasya ang NCAA ng Amerika na masyadong malawak ang kanyang karanasan bilang propesyunal sa Australia at Japan upang mabigyan ng "amnnestiya" at bumalik sa pagiging mag-aaral.