Diskarte ng team imports mamamahala sa serye

ni Anthony E. Servinio @Sports | May 29, 2026

Photo: PBA PH

Laro ngayong Biyernes - Araneta

5:15 PM Meralco vs. TNT

7:30 PM Ginebra vs. ROS

Asahan na magiging mas malawak ang papel ni import Patrick Gardner para sa Meralco Bolts laban sa defending champion TNT Tropang 5G sa 2026 PBA Commissioner's Cup semifinals ngayong Biyernes sa Araneta Coliseum.  Wawasakin din ng Rain Or Shine Elasto Painters at Barangay ang 2-2 tabla sa kabilang serye.

Umukit ng 101-90 tagumpay ang Bolts sa Tropa Miyerkules ng gabi upang pumantay ang serye sa 2-2.  Hindi na pumuntos ang TNT sa huling tatlong minuto at bumomba ng four-points si Best Player CJ Cansino na sinundan ng mga buslo nina Javee Mocon at Cliff Hodge.

Napilitan maglaro na all-Filipino ang Meralco matapos tawagan ng ika-anim na foul si Gardner na may 3:26 nalalabi pero lamang sila, 93-85.  Bumanat ng limang puntos ang nagbabalik na si Chris McCullough at Roger Pogoy upang magbanta, 90-93, subalit nakahanap ng sagot ang Bolts.

Maliban sa foul, pasado ang unang salang ng 7'0" Gardner sa liga na 20 puntos mula tatlong tres at 13 rebounds.  Nagtala ng 17 si Cansino habang sa huling quarter ang 11 ng 13 ni Mocon.

Mahusay na shooter ang paglarawan ni Coach Luigi Trillo kay Gardner na bahagi rin ng pambansang koponan ng Ehipto.  Naninibago lang siya at katatapos lang ng kanyang kampanya sa Japan B.League.

Nanguna sa TNT si McCollough na may 24 matapos huling naglaro noong 2019 para sa San Miguel Beermen.  Gumawa ng 15 si Jordan Heading at tig-14 sina Pogoy at Brandon Ganuelas-Rosser.

Para kay Coach Yeng Guiao ng ROS, best-of-three na ang serye at ang mananalo sa Game Five ay may mahigit 50% pagkakataon na kunin ang serye.  Bitbit ng E-Painters ang positibong enerhiya mula dominanteng 97-85 resulta sa Gin Kings. 

Isang hakbang na lang sa Thunder finalist na

ni Anthony E. Servinio @Sports | May 28, 2026

Photo: Pinagtulungan si Shai-Gilgeous Alexander ng Oklahoma City Thunder nina Victor Wembanyama at isa pa pagdating sa gitna para i-swak ang bola sa labang ito sa NBA West finals.

Laro sa Biyernes - Frost Bank

8:30 AM OKC vs. SA

Isa na lang ang kailangan ng World Champion Oklahoma City Thunder para bumalik sa NBA Finals! Tinalo nila ang bisitang San Antonio Spurs, 127-114, para sa 3-2 na kalamangan sa 2026 Western Conference Finals kahapon sa Paycom Center.

Itinabi ng Thunder ang kanilang malambot na simula at dalawa lang ang kanilang bentahe matapos ang 12 minuto, 29-27. Kumilos na ang OKC at lumayo, 45-35, sa pangunguna ni Alex Caruso.

Mula roon ay bumanat na si MVP Shai Gilgeous-Alexander ng 12 sa loob ng anim na minuto para maging 69-58 sa pagsara ng pangalawang quarter. Ipinasok ng OKC ang unang siyam ng pangatlong quarter para sa pinakamalaking agwat, 78-58.

Nagtapos si SGA na may 32 puntos na pinakamataas niya sa serye. Sumunod sina Caruso na may 22 at Jared McCain na may 20.

Nagtala ng 24 si Stephon Castle para sa Spurs. Nag-ambag ng 22 si Julian Champagnie at 20 kay Victor Wembanyama.

Ang Game 6 ay lilipat sa Frost Bank Center ngayong Biyernes. Sa mga seryeng best-of-seven na tabla sa 2-2, ang nanaig sa Game 5 ang tuluyang nagwawagi 91% kahit umabot ito ng anim o pitong laro.

Knicks pasok na sa Finals, winalis ang East C'ship

ni Anthony E. Servinio @Sports | May 27, 2026

Photo: Dumadrayb si Jalen Brunson #11 ng New York Knicks paikot kay James Harden #1 at Sam Merrill #5  ng Cleveland Cavaliers sa bahaging ito ng kanilang laro sa NBA Eastern Conference Finals. (Sarah Stier/Getty Images) 

Laro ngayong Miyerkules - Paycom

8:30 AM SA vs. OKC

Magbabalik ang New York Knicks sa NBA Finals matapos ang 27 taon!  Tinalo nila sa ika-apat na sunod na laro ang Cleveland Cavaliers, 130-93 at walisin ang Eastern Conference Finals kahapon sa Rocket Arena.

Nagpamalas agad ng bangis ang Knicks nang burahin 8-2 lamang ng Cavs at kunin ang unang quarter, 38-26 sa mga buslo nina Karl-Anthony Towns, Jalen Brunson, Mikal Bridges at reserba Mitchell Robinson. Hindi nakaporma ang Cleveland at hindi nag-preno ang NY para lalong palakihin ang agwat sa huling apat na minuto, 123-78.

Kahit hindi na siya naglaro sa huling quarter, nagtapos na may 15 si Jalen Brunson para mapiling Eastern Conference Finals MVP.  Gumawa siya ng kabuuang 102 o 25.5 bawat laro sa serye.

Double-double si KAT na 19 at 14 rebounds.  Sumuporta sina OG Anunoby na may 17 at Mikal Bridges na may 15.

Nanguna sa Cleveland si Donovan Mitchell na may 31.  Kinapos ang tulong ng kakampi at sumunod sina Evan Mobley na may 15 at James Harden na may 12.

Mabibiyayaan ng Knicks ng siyam na araw na pahinga at kahit anong mangyari sa Western Conference ay sa Hunyo 4 magsisimula ang seryeng best-of-seven.  Tabla ang World Champion Oklahoma City Thunder at San Antonio Spurs, 2-2, papasok sa mahalagang Game 5 ngayong Miyerkules sa Paycom Center.

Si Gilas Pilipinas Jordan Clarkson ang magiging unang kababayan na maglalaro sa NBA Finals.  Lumipat siya sa NY galing Utah Jazz noong nakaraang Hulyo na puntiryang mabigyan ng singsing bilang kampeon.

Nakamit din ng Knicks ang NBA Cup noong Disyembre laban sa Spurs, 124-113, sa likod ni Cup MVP Brunson. Kung sakaling palarin, sila ang magiging unang dobleng kampeon.