Apektado sa rice price cap.. Cash ayuda sa sari-sari store, ibigay na — P-BBM

ni Mylene Alfonso @News | September 25, 2023

Ipinag-utos ni Pangulong Ferdinand Marcos, Jr., na ipamahagi ng Department of Social Welfare and Development (DSWD) sa susunod na linggo ang cash assistance sa mga may-ari ng sari-sari store na naapektuhan ng pagpapatupad ng mandated price ceiling sa bigas.

Sa update nito sa Office of the President, inihayag ng DSWD na nakatakdang ipamahagi ang cash assistance sa mga may-ari ng sari-sari store sa Setyembre 25 hanggang 29 sa pakikipag-ugnayan sa Department of Trade and Industry (DTI) bilang pagtukoy sa mga benepisyaryo.

Base sa direktiba ni Marcos, magpapamahagi ang DSWD ng cash assistance sa maliliit na rice retailers na apektado ng pagpapatupad ng mandated price ceiling sa regular at well-milled rice sa buong bansa.

Matatandaang inaprubahan ng Punong Ehekutibo ang pagpapatupad ng P41 price ceiling sa regular milled rice at P45 sa well-milled sa pamamagitan ng pagpapalabas ng Executive Order No. 39.

Batay sa pinakahuling ulat, sinabi ng DSWD na nakapaglabas na sila ng P92.415 milyon na tulong pinansyal sa 6,161 mula sa 8,390 na target na micro at small rice retailers na apektado ng pagpapatupad ng EO 39 sa buong bansa.

Ayuda para sa tsuper, wala pa rin

ni Mai Ancheta @News | September 18, 2023

Hindi pa natatanggap ng ilang tsuper at operators ng public utility vehicles na benepisyaryo ng fuel subsidy program ang kanilang ayuda mula sa gobyerno.

Ito ang inihayag ng grupong Alliance of Transport Operators and Drivers Association of the Philippines (ALTODAP) sa kabila ng pahayag ng Land Transportation Franchising and Regulatory Board (LTFRB) na ipinamahagi na nitong September 13, 2023 ang fuel subsidy para sa PUVs.

Ayon kay Boy Vargas, presidente ng ALTODAP, wala pang laman ang cash card ng ilan sa kanilang miyembro, gayong ang iba ay nakuha na sa Landbank of the Philippines.

Dahil dito, sinabi ni Vargas na makikipag-ugnayan siya kina Department of Transportation (DOTr) Secretary Jaime Bautista at LTFRB Chairman Teofilo Guadiz III upang ipaalam na hindi pa lahat ng kanilang miyembro ay nakatanggap ng fuel subsidy.

Ilang sangay aniya ng Landbank ay hindi pa nag-release ng cash cards para sa subsidiya dahil sa election ban kaugnay sa nakatakdang Barangay at Sangguniang Kabataan Elections sa October 30, kaya ito ang lilinawin nila sa mga opisyal ng DOTr at LTFRB.

"Ang sinasabi nila dahil daw sa election ban, ayaw ibigay ang card. 'Yun ang lilinawin namin," ani Vargas.

Ang one-time fuel subsidy ay tulong ng gobyerno sa mga tsuper ng PUVs upang mabawasan kahit paano ang epekto ng sunud-sunod na pagtaas ng presyo ng produktong petrolyo sa bansa.

Ngayong Martes, September 19 ay tataas na naman sa ika-11 pagkakataon ang presyo ng petrolyo sa bansa.

Tsuper kay P-BBM: P10K ayuda, kulang

ni BRT @News | September 10, 2023

Hindi umano sapat ang P6,500 hanggang P10,000 one-time fuel subsidy ng gobyerno sa mga driver at operator, ayon sa transport group na Pagkakaisa ng mga Samahan ng Tsuper at Operator Nationwide (PISTON).

"'Pag tiningnan po natin, ito ay pampatid-uhaw lamang sapagkat sa P6,500 halos apat na araw lamang naiko-consume ng ating mga driver at operator lalo na kung ito ay nagkakarga ng 30 liters per day 'yung ating mga driver," ani PISTON President Mody Floranda sa isang panayam.

Aniya, dahil sa oil price hike, P100 kada araw ang nawawala sa kita ng tsuper.

"Kapag tiningnan po natin sa loob ng 25 days, naglalaro po ito sa mahigit P3,000, 'yung direct na nawawala. Kaya 'yun po 'yung sinasabi po natin ay sa biglang tingin ay makakatulong pero kung titingnan natin sa kabuuan ay wala ring saysay, kasi sa patuloy ngang pagtaas ng presyo ng petrolyo," dagdag pa nito.

Naniniwala si Floranda na mas mainam kung ibabasura ng gobyerno ang Oil Deregulation Law o muling pag-aralan ang probisyon nito.

Hinikayat din nito si Pangulong Ferdinand Marcos, Jr. na mag-isyu ng executive order para suspendihin muna ang excise tax sa petrolyo.