ni Atty. Persida Rueda-Acosta - @Magtanong Kay Attorney | November 1, 2022
Dear Chief Acosta,
Sinabihan ako ng aming Human Resource Department (HRD) na asikasuhin ko na ang aking mga dokumento para sa aking promotion. Ngunit noong nakaraang linggo, napag-alaman ko na ako ay nagpositibo sa Human Immunodeficiency Virus (HIV) at ito ay sinabi ko sa aming HR. Kalauna'y nakatanggap ako ng sulat mula sa aming HRD na nagsasabing ang aking promotion ay hindi matutuloy sa kadahilanang ako ay may sakit. Puwede bang malaman kung may nalabag na batas ang aming kompanya? - Denver
Dear Denver,
Ang sagot sa iyong katanungan ay matatagpuan sa Seksyon 49 (a) ng Republic Act No. 11166 (RA 11166), o “Philippine HIV and AIDS Policy Act", na nagsaad na:
“Section 49. Discriminatory Acts and Practices. - The following discriminatory acts and practices shall be prohibited:
(a) Discrimination in the Workplace. - The rejection of job application, termination of employment, or other discriminatory policies in hiring, provision of employment and other related benefit, promotion or assignment of an individual solely or partially on the basis of actual, perceived, or suspected HIV status; x x x”
Ayon sa nasabing probisyon ng batas, ipinagbabawal ang diskriminasyon sa mga tao na pinaghihinalaan na positibo o nagpositibo sa HIV. Ang ilan sa mga akto na makapagsasabi na may diskriminasyon ay kung ang promotion ng empleyado ay maaapektuhan nang dahil lamang ito ay pinaghihinalaan na positibo o nagpositibo sa sakit na HIV. Kung kaya sa nabanggit mong sitwasyon, paglabag sa batas kung ang promotion mo ay hindi itinuloy sa kadahilanan lamang na ikaw ay nagpositibo sa HIV. Nais din naming ipaalam na base sa nasabing batas, ang pag-labag dito ay may karampatang parusa na nakasaad sa Seksyon 50 (g) ng RA 11166.
Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.