National Prisoner, bawal ilipat ng kulungan

ni Atty. Persida Rueda-Acosta @Magtanong Kay Attorney | March 27, 2023

Dear Chief Acosta,

Nahatulan ng anim na taong pagkakabilanggo ang aking asawa dahil sa isang kasong kriminal. Siya ay kasalukuyang nakapiit sa New Bilibid Prison sa Muntinlupa City.

Napakalayo nito sa aming bahay, sapagkat kami ay nakatira pa sa La Union. Dahil sa layo at kamahalan ng pamasahe, hindi namin siya madalaw. Nais kong malaman kung maaari ba siyang mailipat na lamang dito sa kulungang malapit sa aming tirahan? –Myra

Dear Myra,

Para sa iyong kaalaman, ang sagot sa iyong katanungan ay nakapaloob sa Circular No. 26-2000 o ang “Transfer of National Prisoners to the Bureau of Corrections in Muntinlupa City,” na inilabas ng ating Kagalang-galang na Korte Suprema noong ika-23 ng Marso 2000. Nakasaad sa nasabing Circular ang mga sumusunod:

“For this purpose, prisoners at or confined in provincial, city and municipal jails and sentenced by lower courts to prison terms exceeding three (3) years, whether or not they have appealed, are considered national prisoners.

In view thereof, and in order to decongest provincial, city and municipal jails, all trial judges concerned are hereby directed to issue the corresponding mittimuses or commitment orders of national prisoners immediately after their conviction so that they may be remitted or transferred to the New Bilibid Prison of the Bureau of Corrections in Muntinlupa City.”

Ito ay alinsunod din sa probisyon ng Republic Act No. 10575 na mas kilala bilang “The Bureau of Corrections Act of 2013” na nagtatakda ng hurisdiksyon ng Bureau of Corrections sa mga nahatulan ng higit tatlong taong pagkakakulong. Ayon sa batas:

“Section 4. The Mandates of the Bureau of Corrections. – The BuCor shall be in charge of safekeeping and instituting reformation programs to national inmates sentenced to more than three (3) years.”

Samakatuwid, base sa mga nabanggit ay hindi pahihintulutang mailipat pa ang iyong asawa sa kulungang malapit sa iyong tirahan, sapagkat siya ay itinuturing na isang national prisoner dahil siya ay nasentensyahang makulong ng anim na taon. Dahil dito, maaari lamang siyang makulong sa New Bilibid Prison sa Lungsod ng Muntinlupa at hindi sa kulungang malapit sa inyo.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Karapatan ng mga kababaihan

ni Atty. Persida Rueda-Acosta @Magtanong Kay Attorney | March 26, 2023

Sa pagtatapos ng Buwan ng Kababaihan, magandang balik-tanawin natin ang mga karapatan ng kababaihan na ipinasa ng ating Mababa at Mataas na Kapulungan ng Lehislatura bilang pagkilala sa kanilang hindi mapapantayang gampanin sa ating pamayanan. Kung ating titingnan, napakaraming batas ang ipinasa para bigyang-proteksyon ang ating kababaihan.

Ilan sa mga ito ang Women in Development and Nation Building Act (Republic Act No. [R.A.] 7192), Anti-Sexual Harassment Act of 1995 (R.A. 7877), Anti-Rape Law of 1997 (R.A. 8353), Rape Victim Assistance and Protection Act of 1998 (R.A. 8505), Anti-Trafficking in Persons Act of 2003 (R.A. 9208), Anti-Violence Against Women and their Children Act of 2004 (R.A. 9262), The Magna Carta for Women (R.A. 9710), at Safe Spaces Act (R.A. 11313).

Noong Agosto 14, 2009, pinirmahan ni dating Pangulong Gloria Macapagal-Arroyo para maisabatas ang R.A. 9710 (The Magna Carta for Women) na naging konsolidasyon ng Senate Bill No. 2396 at House Bill No. 4273. Layunin ng nasabing batas na palakasin at pag-ibayuhin ang mga karapatan ng kababaihan na nakapaloob sa iba’t ibang batas na ginawa para sa kanila. Pinalawig din ng nasabing batas ang pantay na pagtrato sa mga babae at lalaki pagdating sa lahat ng oportunidad, maging sa civil service, military, at larangan ng palakasan.

Bukod sa mga karapatang nakapaloob sa Konstitusyon, R.A. 9262, at iba pang mga batas na ginawa para protektahan ang kababaihan, binibigyan din ng The Magna Carta for Women ang kababaihan ng proteksyon at seguridad sa mga panahon ng kalamidad at iba pang uri ng trahedya, lalo na sa aspeto ng pagbibigay ng tulong para sa kanilang pag-ahon mula sa mga nasabing kalamidad at trahedya. Magbibigay ang pamahalaan ng agarang pagtulong para sa alokasyon ng resettlement kung kinakailangan. Kaugnay nito ang pagbibigay-pansin ng pamahalaan na tiyakin ang kaligtasan ng kababaihan laban sa sexual exploitation at iba pang uri ng sexual violence sa panahon ng mga nasabing kalamidad o trahedya.

Sa lahat ng pagkakataon, ang pamahalaan ay marapat na magbigay ng komprehensibong serbisyong pangkalusugan na sapat at tumutugon sa pangangailangan ng kababaihan. Sakop ng mga programang ito ang lahat ng aspeto ng buhay ng isang babae, at binibigyang-pansin ang sanhi ng maagang kamatayan ng mga ito. Kaugnay pa rin sa pangkalusugan, ang isang babaeng empleyado na nakapagtrabaho ng may anim na buwan sa huling 12 buwan ay binibigyan ng special leave benefit na dalawang buwan na may suweldo, base sa kanyang gross monthly compensation pagkatapos ng kanyang operasyon na sanhi ng gynecological disorders.

Ang lokal na pamahalaan ay inaatasan na magtalaga ng kaukulang serbisyo at tulong na kinakailangan para sa mga “Women in Especially Difficult Circumstances.” Ang kababaihang ito ay ang mga biktima o mga nakaligtas sa pang-aabusong pisikal o seksuwal. Kasali rin dito ang mga biktima ng illegal recruitment, prostitusyon, trafficking o armed conflict, mga babaeng nakadetine, at mga biktima ng rape o parehong sirkumstansya kung saan naapektuhan ang kanilang kakayanang maging produktibong mamamayan. Ang mga serbisyong ito ay maaaring temporary or protective custody, medical and dental services, psychological evaluation, counseling, psychiatric evaluation, legal services, productivity skills capability building, livelihood assistance, job placement, financial, or transportation assistance.

Ang sinuman (pribado man ito o publiko) na gumawa ng isang bagay na magdudulot ng diskriminasyon laban sa isang babae ay may katumbas na kaparusahan ayon sa Seksyon 41 ng R.A. 9710, kung saan nakasaad na:

“Filing a complaint under this Act shall not preclude the offended party from pursuing other remedies available under the law and to invoke any of the provisions of existing laws especially those recently enacted laws protecting women and children, including the Women in Development and Nation Building Act (Republic Act No. 7192), the Special Protection of Children Against Child Abuse, Exploitation and Discrimination Act (Republic Act No. 7610), the Anti-Sexual Harassment Act of 1995 (Republic Act No. 7877), the Anti-Rape Law of 1997 (Republic Act No. 8353), the Rape Victim Assistance and Protection Act of 1998 (Republic Act No. 8505), the Anti-Trafficking in Persons Act of 2003 (Republic Act No. 9208) and the Anti-Violence Against Women and Their Children Act of 2004 (Republic Act No. 9262). If violence has been proven to be perpetrated by agents of the State including, but not limited to, extrajudicial killings, enforced disappearances, torture, and internal displacements, such shall be considered aggravating offenses with corresponding penalties depending on the severity of the offenses.”

License to Operate ng ahensya ng mga security guards

ni Atty. Persida Rueda-Acosta @Magtanong Kay Attorney | March 25, 2023

Dear Chief Acosta,

Ako ay nakipag-usap sa isang ahensya upang sila ay magtalaga ng mga security guards sa aking pagmamay-ari na gusali. Upang makasigurado, hinanapan ko sila ng dokumento na makapagpapatunay na may lisensya sila upang magpatakbo ng isang security agency.

Sinabihan ako na hindi nila maipapakita ang kanilang lisensya, ngunit ang gamit nilang lisensya ay ipinagkaloob sa kanila noong Marso ng taong 2017. Ang nasabing ahensya ba ay may valid pa na lisensya? Salamat sa inyo. –Chubz

Dear Chubz,

Ang sagot sa iyong katanungan ay matatagpuan sa mga Seksyong 6 at 7 ng Republic Act No. 11917 na mas kilala bilang “The Private Security Services Industry Act,” kung saan nakasaad na:

“Section 6. License to Operate. — A license to operate issued by the Chief PNP is required to operate and manage a PSA [Private Security Agency] and PSTA [Private Security Training Agency]: Provided, That an LTO for PSTA shall be granted only to a training school, institute, academy, or educational institution which offers courses prescribed and approved by the PNP or training programs accredited by TESDA.

Section 7. Period of Validity of LTO. — The LTO issued to PSA and PSTA shall be valid for a maximum period of five (5) years, subject to renewal: Provided, That the Chief PNP may set a shorter validity period for LTO with applicable fair and reasonable fees adjusted accordingly.”

Ayon sa nasabing probisyon ng batas, nangangailangang may lisensya upang makapagpatakbo ng ahensya ng mga security guards at ang nasabing lisensya ay ipinagkakaloob ng Chief ng Philippine National Police. Gayundin, ang nasabing lisensya ng pagpapatakbo ng ahensya ng mga security guards ay valid lamang sa loob ng limang taon, na maaaring i-renew.

Sa nasabi mong sitwasyon, lagpas na sa limang taon ang gamit na lisensya ng ahensya at kung hindi ito na-renew sa loob ng itinakdang panahon, ang nasabing lisensya ay mawawalan ng bisa.

Nais din naming ipaalam na anumang paglabag sa kahit anong probisyon ng nasabing batas ay may karampatang parusa na pagbabayad ng multa o pagkakakulong, alinsunod sa Seksyon 16 ng Republic Act No. 11917.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.