Pinoy players, mas may oportunidad na sa Azkals

ni Anthony E. Servinio @Sports | December 10, 2023

Mas bigyan ng pagkakataon ang mga manlalaro na nandito na sa bansa imbes na umangkat pa ng mga galing ibayong-dagat.  Parehong tinutukoy dito ang Azkals at Filipinas kaya handa na ang bagong pamunuan na makipagtrabaho kasama ang mga coach at manager nito. 

“Ang Filipino ay Filipino, kahit kalahati o puro ang dugo,” iyan ang layunin ng bagong halal na Presidente ng Philippine Football Federation (PFF) na si John Anthony Gutierrez  sa kanyang unang pormal na pagharap sa mga mamamahayag matapos magtagumpay sa halalan kung saan tumanggap siya ng 30 sa maaaring 36 boto.  “Lamang sa ngayon ang mga Pinoy na naglalaro sa labas ng Pilipinas subalit paliliitin natin ang agwat pagdating sa kalidad ng pagsasanay at pondo na ibinubuhos sa Football.”

Kasama ni Gutierrez ang Azkals alamat na si Freddy Gonzalez at Coach Vince Santos ng Far Eastern University.  Hindi nila lininaw ang kanilang mga magiging papel sa PFF subalit sinang-ayunan nila ang mga pahayag ng Presidente. 

“Napatunayan na ang Azkals ay makakasabay sa mga mahuhusay ng mundo at marami tayong mga talento dito,” wika ni Coach Santos.  “Ang Pilipinas ay isang natutulog na higante sa larangan ng Football.” 

Si Gonzalez ay mabuting halimbawa ng manlalaro na ipinanganak at namulat sa Football sa Pilipinas kaya alam niya na kayang maabot din ng mga kabataan ngayon ang kanyang naabot.  Dahil sa kanyang galing, nagsilbi siya sa pambansang koponan at nakalaro bilang import sa Vietnam at ngayon ay matagumpay na negosyante. 

Dagdag ni Gutierrez na nagiging madali ang paglipat ng pamunuan ng PFF sa kanya mula sa pangkat ng dating Presidente Mariano V. Araneta at maganda ang kanilang samahan.  Nakatanggap na siya ng pagbati mula sa iba pa niyang kapwa-pinuno ng National Sports Association.

2nd win, susungkitin ng Muntinlupa Chiefs sa NBL

ni Anthony E. Servinio @Sports | December 8, 2023

Mga laro ngayong Biyernes – Jesus Is Lord Colleges

5 p.m. Muntinlupa vs. Zambales

7 p.m. Cam Sur vs. Binan

Hahanapin ng Muntinlupa Chiefs ang kanilang ikalawang sunod na panalo kontra sa baguhang Boss ACE Zambales Eruption sa ikalawang araw ng 2023 National Basketball League (NBL-Pilipinas) Chairman’s Cup ngayong Biyernes sa Jesus Is Lord Colleges Foundation sa Bocaue, Bulacan simula 5 p.m. Susundan ito ng tapatan ng Cam Sur Express at Tatak GEL Binan sa 7 n.g.

Galing ang Chiefs sa 102-96 panalo sa Circus Music Festival Makati noong nakaraang linggo sa Santa Rosa City. Asahan na sasandal muna sila sa mahusay na laro ng mga beteranong sina Buboy Barnedo at Best Player Francis Abarcar.

Kahit itinuring na bagong koponan, papasok na hindi mga estranghero ang Eruption dahil may mga manlalaro sila na may karanasan sa liga sa dating kinatawan ng lalawigan. Nagsagawa ng masinsinang try-out ang koponan sa Olongapo City at mga piling bayan noong Agosto upang makahanap ng mga makakasama ng mga beteranong sina Carl Lumbao, Allen Formera, Kevin Pelaez, Lyndon del Rosario, Noah Mendoza Kitbonjour Sungad, Ronald Santos at John Paul Atrero.

Pagbawi ang una sa listahan ng Tatak GEL na tumikim ng 99-104 pagkabigo sa kapitbahay na Eridanus Santa Rosa. May alay na liwanag ang magandang ipinakita ng mga bagong pirmang sina Art Patrick Aquino at Michael Joseph Homo na nagsama para sa 54 puntos at kailangan lang ay tumugma ang laro sa mga nagbabalik nilang kakampi.

Susulitin ng Express ang mahigit 400 kilometrong lakbay at sisikaping mag-uwi ng panalo. Magbabalik sa CamSur ang mga malupit na guwardiyang sina Verman Magpantay, Joshua Ayo at Fredson Hermonio. Samantala, maglulunsad ng bagong liga sa ibang larangan ng palakasan ang pamunuan ng NBL-Pilipinas.

Ferrer MVP, 2 pts ni Villasin, nagpa-kampeon sa UST Women's

ni Anthony E. Servinio @Sports | December 7, 2023

Ipinasok ni Nikki Villasin ang pinakamalaking dalawang puntos ng taon upang ihatid sa University of Santo Tomas ang kampeonato ng 86th UAAP Women’s Basketball laban sa defending champion National University, 71-69 kahapon sa Araneta Coliseum. Ito na ang pagbabalik ng tropeo sa Growling Tigresses matapos huling hawakan ito noong 2006.

Hindi nagkulang ng bayani ang UST lalo na sa mahigpit na huling minuto. Binuo ni Mythical Five Kent Pastrana ang paghabol mula sa pagkalugmok ng 46-61 at itinabla ang laro sa 69-69 at 25 segundo sa orasan.

Tumawag ng timeout ang NU at nagmintis ang kanilang tira. Biglang napunta ang bola sa tumatakbong si Villasin para palamangin ang UST at may 11 segundong nalalabi.

Sa huli, depensa ang sumalba sa Tigresses at itinapik palabas ang bola na may anim na segundo pa. May huling pagkakataon ang NU subalit hindi nila araw at isinuko ang titulo na hawak nila ng pitong sunod na UAAP.

“Itinaas ng NU ang antas ng Women’s Basketball at sila ang inspirasyon namin,” wika ni champion coach Haydee Ong. “Salamat sa suporta at sana ay naipakita namin na magandang panoorin din ang Women’s.”

Hinirang na Finals MVP si Reynalyn Ferrer na gumawa ng 19 puntos at 14 rebound sa kanyang huling laro para sa UST. Ito rin ay malaking pagbangon ni Ferrer mula sa pilay na tuhod na dahilan ng kanyang pagliban ng isang taon.

Nandiyan din si Pastrana na nagtala ng 16 puntos at tuldukan ang kanyang unang taon matapos lumipat galing De La Salle University kung saan napili siyang Rookie of the Year ng 84th UAAP. Nag-ambag ng 12 ang balikbayan na si Villasin na tinupad ang kanyang pangarap noong dumating siya galing Amerika. Tiyak na malaking puwang ang lilikhain bunga ng pagtatapos ni Ferrer subalit kampante si Coach Ong sa kinabukasan ng Tigresses.