Gonzalez kapalit ni Palami sa PFF Men's National Team

ni Anthony Servinio @Sports | January 14, 2024

Itinalaga ng Philippine Football Federation (PFF) ang alamat na si Freddy Gonzalez bilang Direktor ng mga Pambansang Koponan at ang kasabay na tungkulin bilang Manager ng Men’s National Team. Papalitan niya si Dan Stephen Palami na nagbitiw noong Enero 9 matapos pangasiwaan ang Azkals mula pa noong 2009. 

Kinumpirma ni PFF President John Anthony Gutierrez ang balita noong Huwebes.  Ang pagtalaga kay Gonzalez ay hudyat ng panibagong simula para sa Azkals.

Isa sa pinakamahusay na manlalaro noong Dekada 90 bago nagdatingan ang mga Pinoy na nakatira sa ibayong-dagat, bitbit niya ang malawak na karanasan sa kanyang pagiging pambansang atleta at import sa Vietnam.  Si Gonzalez ay nahubog ang kaalaman sa Football sa Colegio San Agustin sa Makati City at ito ang naging tiket niya para maglaro sa Amerika sa University of Portland. 

Maliban sa pagiging atleta, isa siyang matagumpay na negosyante matapos niyang mag-retiro.  Huli siyang napanood sa United Football League (UFL), ang ninuno ng kasalukuyang Philippines Football League (PFL). 

Pangunahin ngayon para kay Gonzalez ay gabayan ang Azkals sa kanilang kampanya sa pinagsabay na qualifier para sa 2026 FIFA World Cup sa Amerika at 2027 AFC Asian Cup sa  Saudi Arabia.  Nakatakdang bumisita ang Azkals sa Iraq sa Marso 21 at magkikita muli ang dalawang panig sa 26 sa Rizal Memorial Stadium.

Mananatiling Manager ng Women’s National Team si Jefferson Cheng.  Inaasahan na tutuloy ang pag-usbong ng Football para sa kababaihan ngayon at nasa ika-38 ang Filipinas sa FIFA Ranking, ang pinakamataas na naabot nila sa kasaysayan. 

Samantala, inihayag ng dating headcoach ng Azkals na si Sven-Goran Eriksson na mayroon siyang kanser sa pancreas at baka isang taon na lang ang kanyang buhay.  Ang Pilipinas ang kanyang huling hinawakan noong 2018 AFF Suzuki Cup at 2019 AFC Asian Cup sa UAE.                                                       

Mitchell ng Cavs bumida sa Paris Game, Bucks nanambak

ni Anthony Servinio @Sports | January 13, 2024

Photo: Cleveland Cavaliers / Fb

Lumiyab sa 4th quarter si Donovan Mitchell upang talunin ng Cleveland Cavaliers ang Brooklyn Nets, 111-102, sa NBA Paris Game 2024 kahapon mula sa Accor Arena.  Sa Amerika, pinalasap ng Milwaukee Bucks sa numero unong Boston Celtics ang 135-102 tambakan. 

Kontrolado ng Cavs ang buong laro at lumaki sa 60-34 ang agwat sa third quarter matapos ang buslo ni Mitchell.  Nag-reserba siya ng lakas at bumuhos ng 21 ng kanyang kabuuang 45 puntos sa huling quarter upang mapigil ang mga banta ng Nets at mag-iwan ng magandang alaala sa mga tagahangang Pranses. 

Humugot ang Bucks mula sa malupit na shooting nina Giannis Antetokounmpo na may 24 at Damian Lillard na may 21 at hindi na sila pinasok sa 4th quarter na nagsimula na 111-70.  Namuno sa Bucks si Bobby Portis na may 28 at umakyat sa 26-12 subalit tatlong laro pa ang hahabulin sa Boston na nangunguna pa rin sa 29-9. 

Pinutol ng Dallas Mavericks ang 5 sunod na tagumpay ng New York Knicks, 128-124. 

Tinakpan ni Kyrie Irving ang pagliban ni Luka Doncic at bumira ng 44 puntos habang 32 si Tim Hardaway Jr. kasama ang tig-2 paniguradong free throw sa huling 11 segundo. 

Tambakan din ang Oklahoma City Thunder kontra Portland Trail Blazers, 139-77. Ito ang pangatlong sunod na panalo ng OKC na pinangunahan ni Shai Gilgeous-Alexander na may 31 at triple double si Josh Giddey na 13 puntos.  

Samantala, walang pagbabago sa pangalawang bilangan ng online boto para sa 2024 NBA All-Star.  Numero uno pa rin sa lahat si Giannis na may 3,475,698 habang si LeBron James ang nasa taas ng West na may 3,096,031.

Paboritong Tatum at Clarkson, mala-higante ang mga iskor

ni Anthony E. Servinio @Sports | January 12, 2024

Mag-isang binuhat ni Jayson Tatum ang Boston Celtics sa 127-120 overtime tagumpay sa bisitang Minnesota Timberwolves sa salpukan ng dalawang nangungunang koponan ng NBA kahapon sa TD Garden.  Humugot din ng higanteng numero mula kay Pinoy pride Jordan Clarkson at wagi ang Utah Jazz sa World Champion Denver Nuggets, 124-111. 

Pumukol ng 3-points si Nickeil Alexander-Walker upang ibalik ang lamang sa Timberwolves, 120-118, at 2:44 sa overtime.  Hindi na sila pumuntos mula roon at binuhos ni Tatum ang huling siyam na puntos upang paakyatin ang kartada sa 29-8 at palakihin ang agwat sa Minnesota na bumaba sa 26-11. 

Nagtapos si Tatum na may 45 puntos, 12 sa overtime.  Tumulong si Jaylen Brown na may 35 at 11 rebound at nakabawi ang Boston sa 109-114 talo noong dumalaw sila sa Minnesota na pasilip sa maaaring maglaro sa 2024 NBA Finals. 

Dominado ng Jazz ang buong laro at umabot pa sa 116-91 ang bentahe sa huling quarter.  Namuno si Clarkson na may 27 puntos at naging ika-331 manlalaro na umabot ng eksaktong 11,000 puntos. 

Tinambakan ng bisitang New Orleans Pelicans ang Golden State Warriors, 141-105.  Nagbida si Jonas Valanciunas sa 15 ng kanyang 21 puntos sa 3rd quarter at itayo ang 104-83 lamang. 

Samantala, itinala ni numero unong rookie Victor Wembanyama ang kanyang unang triple double at wagi ang San Antonio Spurs sa kulelat na Detroit Pistons, 130-108.  Kinailangan lang ng 21 minuto ang 20 anyos na tubong Pransiya na lumikom ng 16 puntos, 12 rebound at 10 assist na walang turnover.

 Maglalaro ang NBA ngayong araw sa bansa ni Wembanyama sa tapatan ng Brooklyn Nets at Cleveland Cavaliers sa NBA Paris Game 2024 sa Accor Arena.  Opisyal ang laban katulad na ginanap na laro ng Orlando Magic at Atlanta Hawks sa Mexico City noong Nobyembre.