Positibong enerhiya dala ng Gilas vs. Taiwan

ni Anthony Servinio @Sports | February 24, 2024

Laro ngayong Linggo – Philsports Arena

7 p.m. Pilipinas vs. Chinese-Taipei 

Dadalhin ng ganadong Gilas Pilipinas ang positibong enerhiya kontra sa bisitang Chinese-Taipei sa pagpapatuloy ng 2025 FIBA-Asia Cup Qualifiers Grupo B ngayong araw sa Philsports Arena simula 7 p.m.  Naglabas ng kamandag ang mga Pinoy sa pagdurog sa host Hong Kong, 94-64, noong Huwebes sa Tsuen Wan Stadium. 

Sumandal ang Gilas sa malupit na 3rd quarter nina Justin Brownlee at Kai Sotto upang palakihin ang 41-37 lamang noong halftime sa 71-46 at hindi na nakabanta ang kalaro.  Nagsama sina Kevin Quiambao at Carl Tamayo upang umabot ng 92-61 ang agwat papasok sa huling minuto. 

Inamin ni Coach Tim Cone na nangapa noong una si Brownlee kaya ginamit pa rin niya ito upang mahanap ang ritmo.  Sinuklian ni Brown ang kumpiyansa ni Coach at mga kakampi sa kanyang 16 puntos, 7 rebound at 7 assist habang 13 puntos at humakot ng 15 rebound si Sotto.  Humabol si Quiambao noong huling bahagi ng 4th quarter at nagtapos na may 15 sa gitna ng sigaw ng mas maraming Filipino sa palaruan.  Nag-ambag ng 11 si Jamie Malonzo. 

Haharapin ng Gilas ang mga Taiwanese na dumanas ng 89-69 tambakan sa bisitang Aotearoa New Zealand sa kabilang laro sa grupo.  Bumida sa mga Kiwi ang mga dating import ng Converge FiberXers Ethan Rusbatch na may 26 at Tom Vodanovich na may 16. 

Sa gitna ng dominasyon, mag-isang pumalag si Liu Cheng na may 20 puntos.  Walang iba pang Taiwanese ang naka-10 at tig-9 lang sina Lin Chun Chi at Lin Cheng.

Samantala, mahusay ang inilaro ni Jericho Cruz subalit hindi ito sumapat at nagwagi ang host Japan kontra  Guam, 77-56, sa Grupo C.  Nagtala ng 12 si Cruz habang nanguna sa mga Hapon sina Yuki Kawamura na may 15 at Makoto Hiejima na may 12. 

PAL Manila Int'l Marathon raragasa na sa CCP complex

ni Anthony Servinio @Sports | February 23, 2024

Hahamunin ang kakayahan ng lahat ng mga kalahok sa 2024 Philippine Airlines Manila International Marathon ngayong Sabado, Pebrero 24, na magsisimula at magtatapos sa Liwasang Ulallim ng Cultural Center of the Philippines sa Pasay City.  

Ang lahat ng mananakbo ay dapat nandoon sa lugar bago ang 12:00 ng hatinggabi at lalarga ang karera pagpatak ng 1:00 ng madaling araw.

Ang main event na 42.195 kilometrong Marathon ay dalawang ikot sa ruta.  Iikot muna sa loob ng CCP at papasok ng Roxas Boulevard tampok ang dalawang flyover hanggang bago dumating ng Coastal Road at babalik. 

Lilipat ang aksiyon sa Gil Puyat hanggang kanto ng Makati Avenue at babalik sa Roxas at CCP para sa pangalawang ikot.  May itinalagang walong himpilan na maaaring kumuha ng inumin at ibang pangangailangan. 

Bibigyan ang mga kalahok sa Marathon ng hanggang 8 n.u. upang tapusin ang karera at para mabuksan na ang mga kalsada sa trapiko.  Ang iba pang kategorya na 21, 10 at limang kilometro ay hanggang 7:30 ng umaga.

Ipinaliwanag ng pamunuan ng karera na napilitan silang ilipat ang lugar mula Quirino Grandstand matapos lumitaw ang suliranin sa mga opisyal ng Pamahalaan ng Maynila.  Ngayon ay hindi na ito daraan sa kabisera at sa halip ay sa mga lungsod ng Pasay, Paranaque at Makati. 

Naimbitahan si Paranaque City Mayor Eric L. Olivarez upang igawad ang mga tropeo sa mga kampeon. Maliban doon, ipapadala sila sa Taiwan Marathon sa Nobyembre. 

Umaasa si Race Director Dino Jose na ito ang magiging hudyat ng pagbalik ng kinang ng karera na unang itinatag noong 1982.  Isang matinding pulutong na banyagang kalahok ang susubok ng kakayahan ng mga Pinoy at nais ng pamunuan na mas marami ang maaakit na magpapalista sa 2025.

Filipinas dadalhin ang karanasan vs. Scotland

ni Anthony Servinio @Sports | February 23, 2024

Laro ngayong Sabado – Pinatar Arena

9 p.m. Pilipinas vs. Scotland

Tumikim ang bagong-anyong Philippine Women’s Football National Team ng mapait na 4-0 pagkatalo laban sa Finland sa FIFA Friendly Miyerkules ng gabi, oras sa Pilipinas, mula sa Pinatar Arena sa Murcia, Espanya.  Nagtala ng bihirang hat trick o tatlong goal si Oona Sevenius at itinatak ng Finns ang kanilang pagiging #27 sa World Ranking kumpara sa #38 Filipinas.

Balik-aksiyon ang pambansang koponan na huling sumalang sa Paris 2024 Olympics Asian Qualifiers Round 2 noong nakaraang Nobyembre.  Nabitin sila at hindi tumuloy sa Round 3 na gaganapin sa Pebrero 24 at 28. 

Unang naka-goal ang 19-anyos na si Sevenius sa ika-24 minuto at dinoble agad ni Eva Nystrom ang lamang matapos niyang uluhin papasok ang bola sa ika-28.  Humirit ng pangalawang goal si Sevenius sa ika-43 upang itakda ang halftime sa 3-0. 

Ipinasok na ang mga beteranang sina Sarina Bolden at Meryll Serrano para sa second half bilang mga reserba subalit hindi ito tumalab. Tinapos ni Sevenius ang kanyang hindi makakalimutang ipinakita sa isa pang goal sa ika-72. 

Kasama ang baguhan na si Gianna Camille Sahirul sa unang 11 ni Coach Mark Torcaso.  Binigyan din ng pagkakataon ang mga kapwa-baguhan na sina Alexa Marie Pino at Katana Norman.  

Patuloy ang dominasyon ng mga bansa ng Hilagang Europa o Scandinavia.  Sa mga nakalipas na taon ay wagi sa Pilipinas sa Friendly ang Sweden at Iceland habang ang Norway ang isa sa mga hinarap sa 2023 FIFA Women’s World Cup. 

Dadalhin ng mga Pinay ang karanasan sa kanilang pagsabak sa 2024 Pinatar Cup kontra #25 Scotland sa Sabado sa parehong palaruan simula 9 p.m.  Yumuko ang Pilipinas sa mga Scot, 2-1, noong 2023 edisyon ng torneo.