OLYMPIC UPDATE: CABANG AT HOFFMAN SWAK SA REPECHAGE NG 110M AT 400M HURDLES

ni Anthony E. Servinio @Sports | August 5, 2024

Photo: OneSports / FB

Nasaksihan nina John Cabang at Lauren Hoffman ang taas ng antas ng Paris 2024 Athletics sa unang sabak nila Linggo ng gabi sa Stade de France. Hindi pa tapos ang lahat para sa tambalan at lalaro na sila sa repachange sa mga darating na araw.

Unang sumalang si Cabang sa Men’s 110-Meter Hurdles at umoras ng 13.66 segundo upang magtapos ng ika-pito sa walong kalahok. Ang unang tatlo – Rachid Muratake ng Japan (13.22), Enrique Llopis ng Espanya (13.28) at Eduardo Rodrigues ng Brazil (13.37) – ay tutuloy sa semifinals.

Sina Manuel Mordi ng Alemanya (13.48), Raphael Mohamed ng host Pransiya (13.61), Cabang at mga dinaig niyang sina Jakub Szymanski ng Poland (13.75) at Martin Saenz de Santa Maria ng Brazil (13.83) ay maghihintay kung kasama sila tatlong pangkalahatang pinakamabilis na hindi nagtapos sa unang tatlo ng kanilang karera. Ang mga hindi papalarin ay tatakbo sa repachage para sa huling anim na upuan sa semifinals.

Si Tokyo 2020 pilak Grant Holloway ng Estados Unidos ang nagsumite ng pinakamabilis na oras na 13.01 at sinundan ninna Muratake at Jason Joseph ng Switzerland (13.26). Ang huling tatlong upuan ay napunta kay Tade Ojora ng Gran Britanya (13.35), Milan Trajkovic ng Cyprus (13.43) at Tokyo 2020 kampeon Hansle Parchment ng Jamaica (13.43) at si Cabang ay ika-32 sa 40 tumakbo.

Tinapos ni Hoffman ang Women’s 400-Meter Hurdles sa 57.84 subalit pang-walo at huli siya sa pang-apat na limang karera. Panalo at pasok sa semifinals sina Anna Cockrell ng Amerika (53.91), Lina Nielsen ng Gran Britanya (54.65) at Janieve Russell ng Jamaica (54.67).

Tulad ng patakaran sa ibang karera, maghihintay ang mga hindi pinalad – Hanne Claes ng Belgium (54.80), Nikoleta Jichova ng Czech Republic (55.45), Grace Claxton ng Puerto Rico (56.29), Viivi Lehkoinen ng Finland (56.67) at Hoffman – kung makakahabol sila o sasalang sa Repachage. Ang numero unong qualifier ay si Tokyo 2020 tanso Femke Bol ng Netherlands at dalawang Amerikana Jasmine Jones at Sydney McLaughlin-Levrone na tabla sa 53.60.

Nakuha ni Claes ang isang upuan sa semifinals at sinamahan nina Cathelijn Peeters ng Netherlands (54.84) at Paulien Couckuyt ng Belgium (54.90). Ika-37 sa 40 kalahok si Hoffman.

Nakatakda ang pangalawang pagkakataon ni Hoffman ngayong Lunes simula 4:50 ng hapon. May panahon pa maghanda si Cabang at sa Martes ang kanyang karera sa parehong oras.

Obiena, umentra na sa finals medal round

ni Anthony E. Servinio @Sports | August 3, 2024

Photo: EJ Obiena / FB

Pasok na si EJ Obiena sa finals medal round ng Men’s Pole Vault ng Paris 2024 Athletics matapos ang puno ng drama qualifying Sabado ng hapon. Itutuloy ng Pinoy at 11 na iba pang katunggali ang kanilang lakbay patungong medalya sa Agosto 6 simula 1:00 ng madaling araw.

Humingi ng liban sa unang talon na 5.40 metro si Obiena at ang kanyang pinakamahigpit na karibal na si Tokyo 2020 ginto Armand Duplantis ng Sweden na siyang may-ari ng World Record na 6.23. Walang kabang tinalon ni Duplantis ang sumunod na antas na 5.60 subalit sumablay ng dalawang beses si Obiena kaya nalagay siya sa alanganin.

Nagpasya na huwag na sumubok at sa halip ay tatalon na lang sa 5.70 na isang mali ay tiket niya pauwi ng Pilipinas. Linampasan niya ang hamon at linampasan ang taas para manatiling buhay.

Uminit na si Obiena at tumalon ng 5.75 na sapat para makamit ang upuan sa finals. Makakaharap niya sina Duplantis, Sondre Guttormsen ng Norway, Emmanouli Karalis ng Gresya, Ersu Sasma ng Turkiye, Menno Vloon ng Netherlands, Sam Kendricks ng Estados Unidos, Huang Bokai ng Tsina at Bo Kanda Lita Baehre at Oleg Zernikel ng Alemanya na lahat ay tumalon ng 5.75 at Kurtis Marschall ng Australia at Valters Kreiss ng Austria na tumalon ng 5.70.

Sa lupit ng kompetisyon ay hindi nakapasok si Tokyo 2020 pilak Christopher Nilsen ng Amerika na inabot ng tatlong talon sa 5.60. Ang tanso noon na si Thiago Braz ng Brazil ay suspendido hanggang Nobyembre matapos mahulihan na gumamit na ipinagbabawal na gamot noong nakaraang taon.

Ang iba pang kinatawan ng bansa na sina John Cabang at Lauren Hoffman ay sasabak ngayong Linggo. Mauuna si Cabang sa Men’s 110-Meter Hurdles sa 5:50 ng hapon at susundan ni Hoffman sa Women’s 400-Meter Hurdles sa 6:35 ng gabi.

Yulo 12th place sa All-Around finals

ni Anthony E. Servinio @Sports | August 1, 2024

Photo: OneSports / FB

Nagpasilip si Carlos Yulo ng kanyang kakayahan sa pagtapos ng ika-12 sa 24 kalahok sa Men’s All-Around finals ng Paris 2024 Artistic Gymnastics Huwebes ng madaling araw sa Accor Arena. Kahit bigo mag-uwi ng medalya ay may senyales na may parating sa mga susunod na araw.

Lumikom ng 83.032 puntos si Yulo mula sa anim na disiplina. Tatlong Asyano ang naghari sa pangunguna ni ginto Shinnosuke Oka ng Japan (86.832) at sinamahan ng dalawang taga-Tsina na sina pilak Zhang Boheng (86.599) at tanso Xiao Ruoteng (86.364).

Hindi maganda ang simula ng Pinoy at nahulog siya sa Pommel Horse at minarkahan ng 11.900 lang ng mga hurado. Bumawi siya at nagtala ng nakakagulat na 13.933 sa Rings na pangatlong pinakamataas upang bumalik ang pag-asa.

Sumunod ang isa sa kanyang paborito na Vault at madaling kumuha ng 14.766 na kapareho ng iskor ni Daiki Hashimoto ng Japan at hinigitan lang ng 14.833 ni Xiao. Nagbigay din siya ng solidong pagtanghal sa Parallel Bars (14.500) at Horizontal Bar (13.800) bago tuldukan ang laro sa kanyang paboritong Floor Exercise pero 14.333 lang ang nakuha niya.

Hahanapin na ni Yulo ang ginto sa finals ng Floor Exercise sa Agosto 3 at Vault sa 4. Nagtapos siya ng pangalawa sa qualifier ng Floor Exercise sa likod ni Jake Jarman ng Gran Britanya at pang-anim sa Vault.

Maliban kay Jarman na ang nanay ay tubong Cebu, haharapin din ni Yulo sa Floor Exercise finals sina Rayderley Zapata ng Espanya, Illia Kovtun ng Ukraine, Luke Whitehouse ng Gran Britanya, Zhang Boheng ng Tsina, Artem Dolgopyat ng Israel at Milad Karimi ng Kazakhstan. Hindi kalahok sina Hashimoto at Xiao sa Vault finals kaya sisikapin ni Yulo na daigin sina Nazar Chepurnyi at Igor Radivilov ng Ukraine, Harry Hepworth at Jarman ng Gran Britanya, Aurel Benovic ng Croatia, Artur Davtyan ng Armenia at Mahdi Olfati ng Iran.