Ando 6th place sa 59kgs. weightlifting

ni Anthony E. Servinio @Sports | August 9, 2024

Photo: Elreen Ando / FB

Nabitin ang huling paghabol ni Elreen Ando sa Women’s 59-kilogram Category ng Paris 2024 Weightlifting Huwebes ng gabi sa South Paris Arena #6. Uuwi pa rin mula sa kanyang pangalawang Olympics na nakataas ang noo ng Pinay.

Sa kanyang unang salang ay nabigo niya maibuhat ang 100 kilo subalit bumalik upang maitaas ang barbell para sa bagong personal na marka. Sinubukan niya ang 102 subalit hindi siya pinalad at winakas ang Snatch sa 100 kilo na pansamantalang inilagay siya sa ika-walong puwesto sa 12 kalahok.

Pagsimula ng Clean and Jerk ay sinubukan niya agad ang 130 kilo na mas mabigat sa kanyang marka na 128. Kinailangan niya ang tatlong buhat bago nakuha ang basbas ng mga hurado at tumalon sa ika-apat na puwesto na may kabuuang 230 kilo.

Nabitin si Ando sa medalya sa gitna ng nakakamanghang ipinamalas ni Luo Shifang ng Tsina na winasak ang mga Olympic Record sa Snatch, Clean and Jerk at Total patungo sa ginto. Nagtala siya ng 107 sa Snatch at 134 sa Clean and Jerk para sa ipinagsamang 241 kilo.

Napunta ang pilak kay Maude Charron ng Canada na bumuhat ng 236 kilo. Nakuntento si defending champion Kuo Hsing Chun ng Chinese Taipei sa tanso at 235 kilo.

Tabla sina Ando, Anyelin Venegas ng Venezuela at Rafiatu Folashade Lawal ng Nigeria sa 230. Ang iba pang nagtapos ay sina Kamila Kontop ng Ukraine (227), Janeth Gomez ng Mexico (217), Dora Tchakounte ng Pransiya (213), Mathlynn Sasser ng Marshall Islands (209) at Lucrezia Magistris ng Italya (208) habang minarkang hindi nakatapos si Yenny Alvarez ng Colombia dahil wala siyang nakumpleto sa Clean and Jerk para isama sa kanyang 105 sa Snatch.

Kinailangan ni Ando na magpapayat para sa kompetisyon dahil naglaro siya sa 64-kilogram noong Tokyo 2020 at naging ika-pito sa likod ni ginto Charron. Inalis ng organizer ang ilang mga timbang kaya ilang atleta ay napilitang umakyat o bumaba ng kategorya.

Golfer Pagdanganan at Ardina maganda ang simula sa golf

ni Anthony E. Servinio @Sports | August 8, 2024

Photo: Circulations / FB

Pumalo ng magandang simula si Bianca Pagdanganan sa Paris 2024 Women’s Golf Individual Stroke Play Miyerkules ng gabi sa Le Golf National. Pumalo ang Pinay ng even-par 72 upang mapabilang sa malaking grupo ng mga manlalaro na tabla sa ika-13 puwesto.

Uminit si Pagdanganan sa huling pitong butas kung saan nagtala siya ng birdie sa ika-12, 15 at 18. Nabura nito ang kanyang mga bogey sa ika-apat, lima at pitong butas para sa iskor na 39 matapos ang unang siyam.

Hindi malayo ang kakamping si Dottie Ardina na nagsumite ng four-over 76 para malagay sa grupong tabla sa ika-40 puwesto sa kabuuang 60 kalahok. Isang double bogey sa ika-15 ang humila pababa sa kanya at kahit bumawi sa birdie sa sumunod na butas ay nag-bogey siya ika-18 at huling butas.

Nakasabay ni Pagdanganan sa kanyang flight sina Morgane Metraux ng Switzerland (70) at Azahara Munoz ng Espanya (78). Nakalaro ni Ardina sina Madelen Stavnar ng Norway (76) at Noora Komulainen ng Finland (84).

Pitong stroke ang hahabulin ni Pagdanganan sa maagang numero uno Celine Boutier ng host Pransiya na pumalo ng 65. Pumapangalawa si Ashleigh Buhai ng Timog Aprika sa 68 habang tabla sina Gaby Lopez ng Mexico, Mariajo Uribe ng Colombia, Lilia Vu ng Estados Unidos at kasabay na si Metraux sa 70.

Gaganapin ang Round 2 ngayong Huwebes simula 3:00 ng hapon. Kabilang si Pagdanganan sa pangalawang papalo sa 3:11 habang lalaro si Ardina sa huling grupo sa 6:39 ng gabi.

Obiena 4th place sa Paris Olympics Pole Vault

ni Anthony E. Servinio @Sports | August 6, 2024

Photo: EJ Obiena / FB

Uuwi bitbit ang ika-apat na puwesto si EJ Obiena mula sa finals ng Men’s Pole Vault ng Paris 2024 Athletics sa Stade de France Martes ng madaling araw. Hindi nalampasan ng tatlong beses ng Pinoy ang baras sa 5.95 metro upang mabitin sa medalya.

Matapos ang kanyang pangalawang sablay, nagpasya si Obiena na sumubok upang makahabol subalit dumaplis ang kanyang braso sa baras habang pababa na siya. Kahit bigo ay hinigitan niya ang kanyang pagtapos sa ika-11 puwesto sa Tokyo 2020 kung saan tumalon siya ng 5.70 metro.

Kabaligtaran ng kanyang stratehiya noong qualifier, tumalon agad si Obiena at madaling linampasan ang 5.50 at 5.70 metro. Una siyang sumablay sa 5.80 at nag-desisyon na huwag na tumalon at umakyat sa sunod na antas.

Walang kabang nalampasan niya ang 5.85 at 5.90. Sa kabuuan ay nakumpleto niya ang apat sa kanyang walong itinalon sa kompetisyon na tumagal ng mahigit tatlong oras.

Nanatili ang ginto kay Armand Duplantis ng Sweden sa bagong World at Olympic Record na 6.25. Kahit wagi na sa 6.00 ay hindi niya pinalampas ang pagkakataon na daigin ang sarili niyang World Record na 6.24 na itinala noong nakaraang Abril sa Tsina at ang Olympic Record ni Thiago Braz ng Brazil na 6.03 noong Rio 2016.

Pumangalawa si Sam Kendricks ng Estados Unidos sa 5.95 at sundan ang kanyang tanso noong Rio 2016. Pangatlo si Emmanouil Karalis ng Gresya na tulad ni Obiena ay tumalon ng 5.90 subalit napunta ang medalya sa Griyego sa bisa ng kanyang mas kaunting mintis at bumawi sa kanyang pagiging pang-apat sa Tokyo 2020.

Huling nag-medalya ang Pilipinas sa Athletics noong Berlin 1936 sa tanso ni Miguel White sa Men’s 400-Meter Hurdles. Bago noon ay nag-tanso si Simeon Toribio sa Men’s High Jump sa Los Angeles 1932.