State of calamity sa Albay dahil sa Bulkang Mayon

ni Mai Ancheta | June 10, 2023

Inilagay sa state of calamity ang lalawigan ng Albay dahil sa pag-aalburuto ng Bulkang Mayon.

Ayon sa Albay Provincial Information Office, naglabas na ng resolusyon ang pamahalaang panlalawigan kasunod ng inilabas na abiso ng Philippine Volcanology and Seismology (Phivolcs) na naglalagay sa Alert Level 3 sa Bulkang Mayon.

Ayon sa Albay PIO, dahil sa deklarasyon ng state of calamity ay mapapabilis ang mga ilalargang aksyon para sa rescue, recovery, relief at rehabilitation efforts ng gobyerno at pribadong sektor.

Magkakaroon din ng oil price control para sa mga pangunahing bilihin sa Albay upang maiwasan ang pagsasamantala ng ilang mga negosyante sa harap ng kalamidad, at magagamit ng local government units ang kanilang pondo para sa rescue, relief at rehabilitation measures sa posibleng magiging epekto ng pamiminsala ng Bulkang

Mayon.

Ngayong naisailalim na sa state of calamity ang Albay, sinabi ni Governor Edcel Greco Lagman na magagamit na nila ang P42 million quick response fund para sa pagtulong at pag-alalay sa mamamayan.

Nawawalang eroplano, natagpuan malapit sa Mt. Mayon

ni V. Reyes | February 20, 2023

Makaraan ang 32-oras na paghahanap ay natagpuan na ang mga debris o bahagi ng nawawalang Cessna 340A sa Barangay Quirangay, Albay. Gayunman, hindi pa rin umano matukoy ang kinaroroonan ng piloto na si Captain Rufino James Crisostomo, Jr., ang crew na si Joel Martin at mga Australyanong pasahero na sina Simon Chipperfield at Karthi Santanan.

Nabatid naman mula sa Camalig, Albay Municipal Disaster Risk Reduction and Management Office na inaalam na rin ng Philippine Air Force kung ang binagsakan ng eroplano ay mismong malapit sa crater ng Bulkang Mayon.

Sinabi ni Camalig MDRRMO Public Information Officer Tim Lawrence Florence na sakaling tuluyang bumuti na ang panahon sa Barangay Quirangay ay makapagpapatuloy ang PAF sa pagtataya sa lugar na binagsakan ng Cessna plane.

Ayon naman kay Camalig Mayor Carlos Baldo, iniutos na pabalikin muna ang mga naglakad lamang na rumesponde sa lugar dahil malapit ito sa bunganga ng bulkan.

“If I am not mistaken ay mga less than two kilometers doon sa crater ng bulkan. Considering na Alert Level 2 ang bulkan, very active at any time ay puwedeng magkaroon ng eruption,” pahayag ng alkalde.

“Bawal mag-venture doon sa exact na crash site dahil sa abnormal na aktibidad ng Bulkang Mayon,” dagdag naman ni Florence.

Sabado ng alas-6:43 ng umaga nang umalis ng Bicol International Airport ang Cessna plane patungong Maynila bago ito nawala.

541 kaso ng hand, foot and mouth disease sa Albay — PESU

ni Lolet Abania | November 27, 2022

Umabot na sa kabuuang 541 kaso ng hand, foot and mouth disease (HFMD) ang nai-report sa Albay para sa period na Nobyembre 15 hanggang 25, ayon sa Provincial Epidemiology and Surveillance Unit (PESU).

Batay sa report nitong Sabado, ang mga kaso ng HFMD ay nai-record sa 10 bayan at 2 lungsod ng naturang lugar.

Ang munisipalidad ng Oas ang nagtala ng pinakamaraming kaso na may 162, kasunod ang Legazpi City at Guinobatan.

Karamihan sa mga HFMD cases ay mga bata na edad isa hanggang 10. Gayunman, ang sanitary services unit ng Provincial Health Office (PHO) ay nagsimula na ring mag-disinfect sa mga komunidad.

Kabilang sa kanilang mga sintomas dahil sa HFMD ay lagnat at mga rashes. Payo naman ng mga health officials sa mga may sintomas ng sakit na manatili sa kanilang bahay upang maiwasan na posibleng makahawa sa iba.

Gayundin, paalala nila sa publiko na iobserba ang mga personal hygiene, maligo at palagiang maghugas ng mga kamay.