Eroplano bumagsak sa Isabela, 6 patay

ni BRT | March 10, 2023

Makalipas ang isang buwan at dalawang linggo na paghahanap, natagpuan na kahapon ng tanghali ang nawawalang Cessna 206 plane sa bulubunduking bahagi ng Barangay Ditarum sa Divilacan, Isabela.

Bago mag-alas-12 ng tanghali nang makatanggap ng ulat mula sa Rescue Team 715 hinggil sa pagkakatagpo sa eroplano, sabay kumpirma na patay na ang anim na sakay nito.

Ang rescue team ay idineploy sa ikaanim na pagkakataon noong Marso 7.

Pasado alas-2 kahapon ng hapon nang magpadala ng apat na retrieval teams, na binubuo naman ng 39 katao para ibaba ang mga biktima.

Tinataya na aabutin ng tatlong araw bago tuluyang maibaba sa bayan ang mga labi.

May ulat na ang isa sa mga biktima ay napugutan at ang kanilang mga damit ay nakasabit sa mga puno, gayundin ang ilang bahagi ng eroplano.

Enero 24 nang mapaulat na nawawala ang naturang eroplano, na ang piloto ay si Capt. Eleazar Mark Joven.

Kabilang din sa mga sakay ay sina Josefa Perla Espana, Vala Kamatoy, at tatlong iba pa, kabilang ang dalawang bata.

Patungo ang eroplano sa bayan ng Maconacon nang ito ay mawala, kalahating oras nang lumipad ito mula sa Cauayan Airport.

8 skydivers, 1 piloto, patay sa sumabog na eroplano sa Sweden

ni Ronalyn Seminiano Reonico | July 9, 2021

Patay ang siyam na sakay ng eroplano matapos itong mag-crash sa runway ng Orebro airport sa Sweden noong Huwebes, ayon sa awtoridad.

Saad ng Swedish police, “It’s a very severe accident. Everyone on board the crashed plane has died.”

Ayon sa pulisya, walong skydivers at isang piloto ang sakay ng DHC-2 Turbo Beaver nang maganap ang insidente.

Saad pa ni Emil Gustavsson, rescue leader ng Joint Rescue Co-Ordination Centre, "It is a sky diver plane that has crashed after takeoff."

Saad naman ni Prime Minister Stefan Lofven, “It is with great sadness and sorrow that I have received the tragic information about the plane crash in Orebro.

“I am thinking of the victims, their families and loved ones in this very difficult time. I want to express my deepest sympathy for their grief.”

Samantala, inaalam pa ng awtoridad ang dahilan ng insidente.