Lahat ng salon sa Afghanistan, ipinasara

ni Jenny Rose Albason @Overseas News | July 6, 2023

Iniutos ng Taliban na ipasara ang lahat ng mga hair at beauty salon sa Afghanistan.

Ayon sa tagapagsalita ng Vice and Virtue Ministry, mayroon umano silang isang buwan para sumunod sa kautusan.

Mula nang makuha ng Taliban ang pamamahala sa Afghanistan, naghigpit ang mga ito sa batas para sa mga kababaihan. Matatandaang pinagbawalan ng Taliban na pumasok sa kolehiyo at makapagtrabaho sa United Nations ang mga kababaihan.

Bukod dito, naghigpit din ang mga ito sa kasuotan ng mga kababaihan na kung saan ay dapat mata lamang ang makikita sa kanila.

2 todas sa sagupaan ng IS at Afghan special forces

ni Carlos S. Corpuz (OST) | April 11, 2023

AFGHANISTAN — Todas ang dalawa at arestado naman ang ikatlong mandirigmang Islamic state, ng mga Afghanistan special forces matapos ang isang operasyon sa kanlurang parte ng bansa.

Sinalakay ng special forces ang hideout sa distrito ng Sayed Abad sa lalawigan ng Nimroz na nagdulot ng labanan at umabot ng kalahating oras.

Ayon ito kay Mufti Habibullah Ilham, direktor ng impormasyon at kultura ng lalawigan.

Dagdag niya wala namang namatay sa mga tropa o sibilyan.

Mga Pinoy, balik-Afghanistan na

ni Gina Pleñago | February 6, 2023

Muling bumalik sa Kabul, Afghanistan ang isang maliit na grupo ng mga Pilipino pagkatapos ng isang taon matapos na lisanin nila ito dahil sa kaguluhan.

Karamihan sa kanila ay galing umano sa ahensya ng United Nation (UN) at ilang mga internasyonal na organisasyon na pinayagan ng mga Taliban.

Ayon kay Migration Consultant Manny Geslani, ang mga OFWs na nagtrabaho sa nasabing bansa ay nakabalik pagkatapos ng isang taon mula sa kanilang magulong pagtakas sa Taliban noong Agosto 21, 2021.

Ang grupo ng mga Pinoy ay nakabalik noong 2022 upang magtrabaho para sa International Organization na nakabase sa Kabul katulad ng IMP, Red Cross, Save our Children, UNAMA at UNHCR.

Ang embahada ng Pilipinas ay nagawang iligtas ang 80 Pilipino sa isang chartered aircraft habang ang ibang mga OFWs naman ay nakaalis sa mga eroplanong militar ng US at United Kingdom.