ABS-CBN, mula nang ipinasara… VICE, UMAMING NAG-YOUTUBE NA RIN DAHIL TAKOT MAGHIRAP ULI

ni Ador V. Saluta - @Adore Me! | April 15, 2021

Hindi na dapat pang kuwestiyunin kung isa si Vice Ganda sa pinaka-successful na vloggers among celebrities. Isa siya sa pinakasikat na TV hosts, endorsers at artista. Sa katunayan, sinasabi nilang, "Whatever Vice touches turns into gold."

Nitong June, 2020, umani ng 14-M followers ang kanyang Twitter account at ngayon nama'y nakakagulat na may 5-M subscribers agad ang kabubukas lang niyang YouTube channel.

Sa isang panayam kay Vice kaugnay ng isa nitong endorsement, aniya'y sinubukan niyang mag-venture into vlogging simula nang pagkaitan ng prangkisa ang ABS-CBN last 2020.

Aniya, “Kasi the moment ABS-CBN lost its franchise, wala na kaming platform and I was told by the management that it is your obligation to reach out to your audience whatever happens. So since walang TV, ano'ng paraan?

"So the only way na patok nu'ng panahon na 'yun is 'yung mga online shows. So, kailangan mo siyang pasukin, so pinasok ko 'yung YouTube. Tapos, nu'ng lumalaki 'yung following, nakakatuwa kasi nga, du'n ko nari-realize na 'Ay, marami pa ring may interes sa akin,'” bungad ng It's Showtime host.

Ini-launch din ni Vice ang kanyang Vice Ganda Network last July, at siya'y nagpapasalamat na nakahanap siya ng ibang platform gaya ng YouTube, at ngayo'y umabot na nang 5 million ang kanyang subscribers.

“I was just super happy the moment it became five million. Kahit nu'ng two million, three million, 'yung 'pag may milestone siya na ganu'n, ang saya-saya. Pero it was a bigger celebration kasi lagi siyang nangyayari 'pag may mahalagang date katulad nitong nag-five million siya nu'ng birthday ko, so double celebration.

"So ang saya, kasi nga siyempre, sa TV, dahil wala na kaming free TV, walang ratings. Wala nang na-apply na ratings sa TV, hindi katulad dati, alam mo kung maraming nakakanood sa iyo kasi may ratings.

"So since wala nang ganu'n, hindi ko na alam kung gaano karaming tao ang interesado pa sa akin. Or kung gaano pa kalawak ko nase-serve 'yung purpose ko."

Kahit pa raw maraming pinagdaraanan ang kanyang home studio, tuluy-tuloy pa rin ang pagpo-produce nito ng sariling content o platform para sa kanyang mga solid at loyal followers.

Katwiran ni Vice, “Tapos, du'n ko nase-serve 'yung purpose ko na kailangan kong i-serve. Kasi this pandemic cannot stop me from serving my purpose. Kasi kung ganu'n lang naman, ano pang siste ng buhay kung wala kang sine-serve na purpose, 'di ba?"

Hindi rin itinanggi ng It's Showtime host na malaki ang kinikita sa pagba-vlogging.

"Aside from that, I don’t want to be a hypocrite, mas maraming subscriptions, mas kikita 'yung channel ko, 'di ba? Kahit may ipon naman ako, kailangan kong kumita kasi mauubos 'yung ipon ko. Ayoko nang bumalik sa paghihirap, hello! Nanggaling na ako ru'n. At nagbabad na ako ru'n nang bongga.

"So ngayong nasa ganito akong posisyon, hindi ko puwedeng pabayaan 'yung kung ano'ng meron ako. Kailangan kong pangalagaan 'yung estado ng buhay ko. Kailangan ko pa ring kumita."

Sa panahon ngayon ng pandemic, ang kanyang influence as entertainer ay ang maibahagi sa lahat ang saya, lalo na't walang kasiguraduhan ang patuloy na pakikipaglaban ng mga tao sa COVID-19.

“Some people are trying to survive, some people are surviving, and some people are thriving after they survive. So, nandu'n tayo sa ganu'ng stage. So maraming-maraming salamat sa mga subscribers ko dahil hinahayaan n'yo akong patawanin pa rin kayo, aliwin kayo sa ganitong panahon, at the same time, nagkakaroon din ako ng ekstrang hanapbuhay. Kaya give and take, hindi naman puro give lang nang give or take lang nang take. Kumbaga, palitan tayo ng magandang naibibigay sa isa’t isa,” pahayag pa ng Unkabogable Star.

Segurista… JINGGOY, ATRAS MAGPABAKUNA KONTRA COVID

ni Ador V. Saluta - @Adore Me! | April 12, 2021

On the road to recovery na raw ang dating Pangulong Joseph "Erap" Estrada na tinamaan ng COVID-19 nitong nakaraang linggo, ayon sa panganay niyang anak na si dating Senador Jinggoy Estrada.

Bukod pala kay Erap, nag-positive rin sa COVID-19 ang asawa ni Sen. Jinggoy na si Precy Ejercito at iyak daw ito nang iyak nu’ng malaman ang resulta ng swab test.

Naniniwala ang pamilya ni Jinggoy na dininig ng Diyos ang kanilang dasal dahil noong magpa-swab uli si Precy kinabukasan ay negative na ang resulta, at okay na raw ngayon ang kalagayan ng kanyang asawa.

Ayon pa kay Jinggoy, “Okay naman. Nag-positive siya nu’ng Monday, iyak nang iyak. Hindi niya alam kung kanino niya nakuha. Siya ang pinakamaingat, eh. Sabi ko, magpa-reswab na lang siya. Kinabukasan nagpa-reswab siya, negative naman.”

Kaya naman sa pagbabakuna nakasalalay ang kondisyon ng karamihan para safe. Pero sa tanong kung ipapagamit din ba niya ang Ivermectin, isang kontrobersiyal na gamot na panlaban daw sa COVID-19 sakaling nagkakaubusan na ng mga mamahaling vaccines gaya ng AztraZeneca, still, naghahanap pa rin si Jinggoy ng kasagutan kung kakagatin nito ang nasabing gamot na ang compassionate use permit ay pinayagan na ng ating FDA.

At bagama’t sinabi na ni dating Senator Juan Ponce Enrile na ang Ivermectin daw ang nagpagaling sa kanya, hindi naniniwala rito si Jinggoy.

Sa tanong naman kung sakaling turukan ng Ivermectin si Erap, aniya, “Alam mo, kinausap ko ‘yung doktor. Sabi niya sa akin, ‘Huwag na huwag mong gagamitan ng Ivermectin ‘yung daddy mo. Para lang sa mga hayop ‘yan. Your dad is not a dog.’

“Siyempre, mas maniniwala ako ru’n sa dalubhasa,” aniya.

Siya rin daw ay ayaw munang magpabakuna sa ngayon. Pinag-aaralan pa raw niya kung alin ang pinaka-effective.

“Siyempre, tinitingnan natin kung ano ‘yung pinaka-effective para sa ating pamilya. Kaya hindi pa muna ako nagpapabakuna.”

Kahit 4 mos. pa lang magdyowa… DIEGO, IPINAGSIGAWANG SI BARBIE NA ANG PAKAKASALAN

ni Ador V. Saluta - @Adore Me! | April 10, 2021

Maaga pa para sabihing didiretso na nga sa altar ang apat na buwang relasyon nina Diego Loyzaga at Barbie Imperial, pero nakakabilib ang aktor na ipinagsisigawang si Barbie na nga ang 'the one' sa kanyang buhay at puso.

Bubot pa man ang pundasyon ng kanilang pag-iibigan, hinog naman ang pagsasabi ng aktor na si Barbie na ang gusto niyang makasama sa habambuhay, at bumuo ng sarili nilang pamilya. Naniniwala kasi ang binatang aktor na sa kasalan din mapupunta ang pag-iibigan nila ng Kapamilya star.

Bagama't naniniwala si Diego sa long engagement bago sila lumagay sa tahimik o magpakasal, ayon sa bida ng Encounter, case-to-case basis lamang daw ito.

“Oo naman, okey ang long engagement, pero puwede rin naman na hindi. Depende 'yun sa inyo kung gaano kayo magklik kaagad, 'yung nagkakaintindihan na talaga, na on the same page na talaga kayong dalawa,” bulalas ng aktor nang matanong tungkol sa long engagement.

“Kasi 'yung pupuntahan n'yo eventually is marriage, have a family, have kids. So, ganu'n ko siya tinitingnan with Barbie, and ganu'n din naman niya tinitingnan with me. We understand each other. And not every day is a good day but just like any other relationship, we understand each other even more on bad days. So it’s not a secret but it’s easier said than done,” pahayag ng binata.

Sinisigurado ni Diego na si Barbie na ang kanyang “the one”, ang kanyang pakakasalan.

“Oo, sa nakikita ko!” mariin niyang sabi.

Understanding o pang-unawa ng isa't isa umano ang pundasyon ng kanilang pagmamahalan.

"Para sa akin kasi, 'yung love or being in a relationship, it’s a never ending compromise.

“You’re two individuals who want to be a team or an item or parang a unit—isa kayo. So siyempre, meron kayong mga differences, meron kayong mga hindi pagkakasunduan. Pero marami rin kayong mga likes sa isa’t isa, so there’s no secret to it. It’s work. It’s like any relationship naman, even friendships ganu'n din,” paliwanag ng aktor.

Samantala, patok sa panlasa ng karamihan ang seryeng Encounter na pinagbibidahan nina Diego Loyzaga at Cristine Reyes na mapapanood sa TV5 tuwing Sabado, 8 PM.

Bilang sina Gino at Selene sa Koreanovela adaptation, malakas ang chemistry ng dalawa na ayon pa sa isang viewer na si Jojo V, "Worth waiting. Maaga kasi akong natutulog dahil sa maagang trabaho and yet, naglaan ako ng oras para sa Encounter."

Sa comments section naman na ipinost ng TV5 about Encounter, ani Divyne Chui, "Ang ganda ng pilot episode, sana weekdays na lang ipapalabas."

In fairness, maraming naka-miss kay Diego lalo na't nasa tamang pangangatawan ito sa ngayon.

"Yummy! Oozing with sex appeal!" komento ni Jomy C. ng Sta. Barbara, San Mateo.

Kaya naman maraming gustong 'kulamin' si Barbie dahil siya ang nakabakod ngayon sa anak ni Teresa Loyzaga (courtesy ng aktor na si Cesar Montano).