DIETHER, BINANGGA ANG TRAK NG BASURA, NOO AT PAA NADALE

ni Ador V. Saluta - @Adore Me! | February 05, 2022

Nabulaga ang mga netizens dahil sa aksidenteng kinasangkutan ng aktor na si Diether Ocampo dakong 12:40 nang madaling-araw nitong Biyernes (February 4, 2022).

Ayon sa ulat ng DZRH police reporter na si Noche Cacas, si Diether mismo ang nagda-drive ng sasakyan niyang SUV Ford Explorer nang bumangga ito sa nakahintong garbage truck sa may service road ng Osmeña Highway sa Bgy. Pio del Pilar, Makati City, bago dumating sa Arnaiz Avenue.

Sa ulat pa ng Bantay Bayan ng Bgy. Pio del Pilar na si Joel Alicante, mabilis daw ang pagpapatakbo ni Diether ng kanyang SUV habang binabaybay nito ang service road ng Osmeña Highway. Diumano'y amoy-alak ang aktor nu'ng mga sandaling 'yun.

Walang naiulat kung may kasama ang aktor sa sasakyan.

Sa lakas ng impact, wasak ang kaliwang harapan ng SUV ni Diether at ang malakas na pagbangga ay ikinagulat din ng truck driver na kasalukuyang abala sa pangongolekta ng basura nu'ng mga oras na 'yun.

Sa tulong ng ilang residente ng lugar, kaagad namang nai-report at rumesponde ang Philippine Red Cross na nagdala kay Diether sa Makati Medical Center na nagkaroon ng sugat sa noo at paa.

Habang isinasakay daw sa ambulansiya ang aktor, nagpupumiglas ito at gustong tumayo sa pinangyarihan ng banggaan.

Gaya ng lahat ng traffic protocols sa mga ganitong banggaan, dinala sa Traffic Office ang sasakyan ni Diether, at isinama na rin ang driver ng garbage truck para sa follow-up investigation.

ANGELINE, SA MADIR AT KAY REGINE ISUSUNOD ANG NAME NG ANAK

ni Ador V. Saluta - @Adore Me! | February 1, 2022

Naitanong kay Angeline Quinto kung ano ang naisip niyang ipangalan sa kanyang baby na malapit na niyang isilang.

"Kung babae, naisip ko kasi na isunod sa pangalan ng Mama Bob, kasi Sylvia kasi ang Mama, ‘di ba?" aniya.

Naisip din niyang pagsamahin ang pangalan ng kanyang adoptive mother at ng ASAP Natin 'To singer at idol niyang si Regine Velasquez kapag babae ang anak.

"Kasi gustung-gusto ko 'yung name ni Ms. Reg, 'yung Regina. Tapos, nu'ng pinagsama ko 'yung pangalan ni Ms. Reg and tsaka ng Mama Bob, ang ganda ng kinalabasan, Sylvia Regina or Regina Sylvia. Ang ganda, 'di ba? Parang ang sarap-sarap lang pakinggan.

"Ang lalaki, marami pa kaming naiisip. Kaming dalawa ng tatay ng baby ko 'yung nag-iisip. So kung ayaw niya 'yung pangalan na naisip ko, okay lang. Kung ayaw ko naman 'yung naisip niyang pangalan, okay lang sa kanya," pahayag ni Angge, palayaw ng singer.

Fans, ginulat… MORISSETTE, IKINASAL NA!

ni Ador V. Saluta - @Adore Me! | January 30, 2022

'Love wins' ang ganap kina Morissette Amon at Dave Lamar dahil finally, officially Mr. & Mrs. Lamar na sila!

Nag-post kahapon ang Kapamilya singer ng wedding photos nila ni Dave sa kanyang Instagram account at inulan ito ng congratulations mula sa mga kaibigan nila sa showbiz at mga fans.

Nu'ng Biyernes (January 28) pala ikinasal sina Morissette at Dave sa The Old Grove Farmstead sa Lipa, Batangas at ang details ng wedding ay mapapanood sa vlog ng singer.

Hindi man man-to-man o girl-to-girl ang relasyon nina Mori at Dave, masasabing 'love wins' dahil ipinaglaban nila ang kanilang pagmamahalan kesehodang todo-tutol noon ang pamilya ng singer, lalo na ang tatay nito, sa kanyang boyfriend.

Hindi lang kami sure kung sa ngayon ay tanggap na ang mister ni Morissette ng kanyang pamilya, at 'yan ang gusto naming malaman sa vlog ng biriterang singer.

Anyway, congrats kina Morissette at Dave, now Mr. & Mrs. Lamar!