JOSHUA, MAS MAINGAT AT WAIS NA SA BABAE AFTER KAY JULIA

ni Ador V. Saluta - @Adore Me! | November 14, 2021

Masayang humarap si Joshua Garcia sa mga press people sa virtual presscon ng Viral Scandal na pinagbibidahan nila ng multi-awarded actress na si Charlie Dizon.

Ibinahagi ng aktor na pagkatapos ng hiwalayan nila ni Julia Barretto nu'ng 2019, naka-move on na siya at ngayo'y naging maingat na sa susunod nitong makakarelasyon.

Ayon pa sa Kapamilya actor, dahil sa hindi naging magandang karanasan sa nakaraang pag-ibig, this time, malamang na bubusisiin niya ang magiging kasunod na pakikipagrelasyon bagama't aniya'y isasantabi niya kung anuman ang nakaraan ng babaeng kanyang posibleng maging 'the one'.

“Para sa akin, hindi importante 'yun (past). Siyempre, mas importante kung ano 'yung nangyayari ngayon. Past na 'yun, eh. I’m sure 'yung babae rin mismo, kinalimutan na rin mismo 'yung past na 'yun. Na-experience ko kasi before, nag-care ako masyado sa past niya.

Parang nakaapekto siya at the same time sa relationship namin and hindi siya maganda. So, natuto lang ako. Kaya ngayon, sabi ko, hindi na ako papaapekto sa past. Past na talaga 'yun.

Dapat, nakakalimutan na 'yun. So, 'yun lang 'yung masasabi ko,” pagbabahagi ni Joshua.

Nasanay na raw siya sa intriga simula nang maghiwalay sila ni Julia. Natuto na rin daw siyang i-handle ang anumang online attention na kanyang kakaharapin.

“'Yung mga negative issues, ang dami ko nang experience, oh, my God!" sabay ngiti nito.

Muli, aniya, "Well, 'yung mga hindi dapat pansinin, hinandle ko by not handling at all. Wala, eh, sayang 'yung energy ko kung iha-handle ko siya, 'di ba? Pero siyempre, 'yung magagandang viral na nangyari sa akin, itine-treasure ko 'yun. Kasi part ng journey ko 'yun as an artist and an actor.

"Choose your battles talaga kasi sayang 'yung energy talaga, eh. 'Pag binigyan mo ng importansiya 'yung mga ganu'n na alam mo namang hindi makakatulong sa ‘yo. Depende, depende talaga sa sitwasyon.”

Naitanong din kay Joshua kung paano niya iha-handle ang sitwasyon sakaling siya'y sentro ng blind item o tsismis.

“Kasama 'yun sa trabaho namin. Hindi ko masisisi 'yung nagawan ako ng blind item. Kasi 'yung reaction ko before nu'ng nagkaroon na ako noon, I don’t know kasi naikuwento lang 'yun sa akin. Sabi ko, '‘Yaan mo na.’ Parang ganu'n lang 'yung sinabi ko, eh. Kasi the more na pagtuunan mo siya ng pansin, the more na mapapansin din siya ng mga tao. And kung nabasa mo 'yung blind item at hindi ka sang-ayon, huwag mo na lang pagtuunan ng pansin 'yun. O, baka mali naman 'yung sinabi ng blind item, 'di ba?” nangingiti niyang sagot.

Sa pagtatapos ng virtual mediacon, inanyayahan ng aktor ang mga supporters nila ni Charlie Dizon na panoorin ang seryeng Viral Scandal na magsisimula na sa November 15 sa Kapamilya Channel, TV5, A2Z, Kapamilya Online Live, iWantTFC, and TFC IPTV .

VICE AT ION, HELICOPTER ANG SERVICE PAPASOK SA IT’S SHOWTIME

ni Ador V. Saluta - @Adore Me! | November 9, 2021

Nakita namin ang isang larawan kamakailan nina Sen. Manny Pacquiao at Jinkee Pacquiao na nakasakay sa chopper at papunta sa isang probinsiya para alamin ang kalagayan ng mga kababayan natin doon.

Naisip lang namin, bakit ginagawang big deal ng ilang netizens ang pagsakay ng mag-asawang Pacquiao sa helicopter sa kanilang pag-iikot sa ‘Pinas kaugnay na rin ng pagtakbo ni Sen. Manny sa pagka-pangulo sa 2022, gayung hindi lang naman sila ang celebrities na gumagawa niyan.

In fact, may napanood din kaming dating TikTok video nina Vice Ganda at Ion Perez na nakasakay sa helicopter at papunta raw ng It’s Showtime.

O, ‘di ba’t mas bongga ‘yun? Papasok lang ng It’s Showtime, naka-chopper pa?!

Pero kung afford naman ni Vice, why not? Pera naman niya ‘yan.

Anyway, balik-It’s Showtime na ang Unkabogable Star matapos ang sold-out concert nito sa USA.

Abangan ang limang malalaking pasabog ng madlang pipol ngayong buwan ng Nobyembre sa It's Showtime. Inumpisahan na nila ito sa pagbabalik nga ni Vice Ganda.

Naitanong kay Vice kung ano ang kanyang naging pakiramdam nang makatapak uli sa entablado para makapagbigay-saya sa mga tao at makapag-perform muli matapos ang halos dalawang taong pandemya.

“Noong unang gabi, nasa dressing room pa lang ako, naririnig ko na ‘yung hiyawan. Na-stress talaga ako. Humingi rin ako ng paumanhin sa kanila kasi hindi ko alam kung ano’ng uunahin ko. Uunahin ko ba ‘yung pinraktis kong spiels o ‘yung i-acknowledge ko lang ‘yung nararamdaman ko for now? Naiyak talaga ako," pagbabahagi ni Vice.

Bumuhos naman ang tweets mula sa mga netizens sa pagbabalik ni Vice at nag-trending nationwide sa Twitter ang taglines na “Congrats Queen Vice,” “Welcome back ViceIon,” at ang hashtag ng programa na #ShowtimeBACKlangToh.

Isa lamang ang pagbabalik ni Vice sa limang sorpresang inihanda ng It's Showtime para sa madlang pipol.

Ilang Reinanay nga ang magbabalik para ipakita ang kanilang angking galing sa Reina ng Tahanan wildcard special sa Nobyembre 15 (Lunes) hanggang 19 (Biyernes). Susundan naman ito ng kauna-unahang Reina ng Tahanan finals sa Nobyembre 20 (Sabado).

Nagbabalik naman para sa ika-anim na season ang pinakamahabang singing competition sa bansa na Tawag ng Tanghalan sa Nobyembre 22 (Lunes).

Samantala, ang pinakaaabangang pasabog na showdown sa pagitan ng It's Showtime hosts na Magpasikat ay mangyayari naman sa Nobyembre 27 (Sabado).

Kaya naman huwag palampasing panoorin ang It’s Showtime mula Lunes hanggang Sabado sa A2Z, Kapamilya Channel, Kapamilya Online Live sa YouTube channel at Facebook page ng ABS-CBN Entertainment, pati na rin sa iWantTFC app o iwanttfc.com.

Mapapanood din ito sa labas ng Pilipinas sa The Filipino Channel.

Umatras bilang senador… NOLI, BALIK-KAPAMILYA

ni Ador V. Saluta - @Adore Me! | November 5, 2021

Pagkatapos lisanin ni Noli de Castro ang kanyang programang Kabayan sa TeleRadyo (dating DZMM) noong October 7, dahil sa kanyang pagtakbo sana bilang senador sa 2022 elections, magbabalik muli ang dating news anchor-commentator sa kanyang iniwang morning show.

Matatandaang nag-withdraw na ng kanyang kandidatura 5 days after filing his Certificate of Candidacy (COC) si Kabayan Noli.

Nitong Huwebes (November 4), ibinahagi ni Noli sa kanyang Instagram ang isang maikling video kung saan makikita siyang nasa isang dalampasigan.

Sa caption, sinabi ni Noli na babalik na siya sa TeleRadyo sa Lunes, November 8.

Base sa kanyang caption, “Salamat po, sa kaunting pagkakataon na ma-enjoy ko ang beach, bago bumalik muli sa Teleradyo sa Lunes, kita-kits kabayan [smile emoji].”

Bukod sa Kabayan, kinakailangan din niyang iwan ang primetime news program na TV Patrol na ilang dekada na rin siyang parte dahil sa ambisyong maging senador.

Matatandaang naging emosyonal pa si Noli noon sa kanyang farewell message at bahagi ng kanyang pamamaalam, “Matapos ang malalalim na pagsusuri at taimtin na pagdarasal, ako po ay nagdesisyong tumakbo bilang senador sa halalan sa susunod na taon.

"At dahil sa hakbang na ito, kinakailangan kong iwan ang TV Patrol at ang ABS-CBN para ipagpatuloy ang serbisyo publiko sa ibang larangan."

Ang mensahe naman ni Noli noong October 13 sa kanyang pag-atras, “Nais kong iparating sa lahat ng aking mga kaibigan at supporters na naghahanda na sanang tumulong sa akin, na nagpasya akong hindi na ituloy ang aking kandidatura.

"Gayunpaman, HINDI PO NAGBAGO ANG AKING LAYUNIN AT HANGAD PARA SA BAYAN.

"Kasabay ng pagdarasal sa Poong Nazareno, napag-isip-isip kong mas makatutulong ako sa pagbibigay ng boses sa ating mga kababayan sa pamamagitan ng pamamahayag."

Dahil dito, may kumalat na balitang hindi na makakabalik sa ABS-CBN si Noli lalo na sa TV Patrol dahil ipinalit sa kanya si Karen Davila na iniwan naman ang Karen's The World Tonight sa ANC bilang news anchor.