Discount ng senior sa grocery

ni Atty. Persida Rueda-Acosta @Magtanong Kay Attorney | July 7, 2023

Dear Chief Acosta,

Bakit kaya sa tuwing namimili ako sa grocery ay P65.00 lamang ang naibibigay sa aking diskwento bilang senior citizen? Kahit pa marami sa mga pinamili ko ay pasok naman sa kategorya ng mga dapat na madiskwentuhan tulad ng tinapay, bigas, sabon at iba pang mga kinokonsumo ko sa bahay. Para pong pinipili lamang ng kahera kung alin sa mga napamili ko ang ipapasok niya para madiskwentuhan at laging papatak na hanggang P65.00 lamang ang mababawas sa kabuuang resibo ko. Sana ay malinawan ninyo ako. - Benigno

Dear Benigno,

Ang diskwento na ibinibigay sa mga senior citizen ay alinsunod sa mga ipinapatupad na batas at panuntunan. Para sa mga basic commodities o mga payak at pangunahing bilihin tulad ng tinapay, bigas, sabon at iba, nakasaad sa Section 4 ng Republic Act (R.A.) No. 9994, o mas kilala bilang “Expanded Senior Citizens Act of 2010”, na:

“SEC. 4. Privileges for the Senior Citizens. – The senior citizens shall be entitled to the following: (j) to the extent possible, the government may grant special discounts in special programs for senior citizens on purchase of basic commodities, subject to the guidelines to be issued for the purpose by the Department of Trade and Industry (DTI) and the Department of Agriculture (DA).”

Malinaw na nakasaad sa Section 3 ng DA-DTI Joint Administrative Order No. 10-02, Series of 2010 na 5% ang diskwento, mula sa regular na presyo, ang maaaring ibigay sa mga senior citizen para sa lingguhang halaga ng pamimili ng basic necessities and prime commodities:

“Section 3. Discount – Every senior citizen shall enjoy a special discount of five percent (5%) of the regular retail price, without exemption from value-added tax (VAT), of basic necessities and prime commodities listed under Section 2 (a) and (b) of this Order. The total amount of said purchase shall not exceed the amount of One Thousand Three Hundred Pesos (P1,300.00) per calendar week without carry over of the unused amount. Provided, that said amount shall be spent on items listed under Section 2 (a) and (b) of this Order commensurate to his/her personal and exclusive consumption and/or enjoyment within the calendar week.

Provided, further that said amount shall be spent on at least four (4) kinds of items listed under Section 2 (a) of this Order.”

Ang kawangis na probisyon ukol sa nasabing diskwento ay nakasaad din sa Section 5 ng DTI-DSWD-NCSC-NCDA-DOH-DILG-BIR Joint Memorandum (JMC) No. 01, Series of 2022:

“Section 5. Basic Necessities and Prime Commodities (BNPCs):

The total amount of offline and online purchase of Senior Citizens and Persons with Disability per calendar week shall not exceed the amount of One Thousand Three Hundred Pesos (P1,300.00) without carry over of the unused amount, unless otherwise increased, as may be determined by the DTI and other relevant agencies. Provided that the purchase of medicine shall no longer be limited by the P1,300.00 ceiling as provided in the DTI-DA-DOE JAO, and as reflected hereto.

The said amount shall be spent on the above-mentioned commodities commensurate to his/her personal and exclusive consumption and/or enjoyment within the calendar week, Provided, further that said amount shall be spent on at least four (4) kinds of items identified as BNPCs.”

Kaugnay nito, sadyang P65.00 lamang ang pinakamataas na halaga na maaaring ibawas sa halaga ng iyong pinamili sa grocery bilang diskwento kung naabot mo na ang lingguhang limitasyon o amount per calendar week na P1,300.00 halaga ng mga pinamiling basic necessities and prime commodities. Ang 5% ng P1,300.00 ay P65.00.

Gayon pa man, kung sadya namang hindi ibinigay sa iyo ang karampatang diskwento alinsunod sa nabanggit na mga panuntunan ay maaari kang maghain ng reklamo laban sa tao o establisimyento na lumabag sa batas.

Ang naturang reklamo ay maaaring ihain sa Office of the Senior Citizen Affairs ng lugar kung saan ka nakatira o kung saan matatagpuan ang establisimyento.

Maaaring mapatawan ng parusa na pagkakakulong at multa ang sinumang mapatunayang hindi tumalima sa batas at mga angkop na panuntunan nito. (Section 8, JMC No. 01, Series of 2022 in relation to Section 7, R.A. No. 9994).

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.

Puwede bang ‘di tanggapin ng boss ang resignation?

ni Atty. Persida Rueda-Acosta @Magtanong Kay Attorney | July 6, 2023

Dear Chief Acosta,

Sinubukan kong magpasa ng resignation letter sa boss ko pero hindi siya pumayag. Legal ba ito? - Marybel

Dear Marybel,

Ang involuntary servitude o sapilitang pagtatrabaho ay hindi pinahihintulutan ng batas, alinsunod sa Article III ng Bill of Rights ng 1987 Constitution of the Philippines:

“Section 18. (2) No involuntary servitude in any form shall exist except as a punishment for a crime whereof the party shall have been duly convicted.”

Batay sa nabanggit na probisyon, hindi ka maaaring pilitin pang magtrabaho ng iyong boss. Gayunpaman, sinasabi ng batas na kung magre-resign sa trabaho ay kinakailangan ang hindi bababa sa isang buwan na advance notice – maliban kung may dahilan (ayon sa itinatadhana sa ilalim ng batas) na nagpapahintulot sa empleyado na magbitiw agad, o kung paikliin o i-waive ng employer ang nasabing one-month notice. Kung hindi ito susundin, maaaring pagbayarin ng danyos ang magre-resign na empleyado. Ito ay malinaw sa mga sumusunod na probisyon ng Labor Code of the Philippines:

“Art. 285. Termination by employee.

a. An employee may terminate without just cause the employee-employer relationship by serving a written notice on the employer at least one month in advance. The employer upon whom no such notice was served may hold the employee liable for damages.

b. An employee may put an end to the relationship without serving any notice on the employer for any of the following just causes:

1. Serious insult by the employer or his representative on the honor and person of the employee;

2. Inhuman and unbearable treatment accorded the employee by the employer or his representative;

3. Commission of a crime or offense by the employer or his representative against the person of the employee or any of the immediate members of his family;

4. Other causes analogous to any of the foregoing.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.

Sinibak na guro, dapat makatanggap ng backwages

ni Atty. Persida Rueda-Acosta @Magtanong Kay Attorney | July 5, 2023

Dear PAO,

Ako ay guro sa isang pampublikong paaralan. Sinampahan ako ng kasong administratibo sa Civil Service Commission Regional Office (CSCRO). Ilang buwan ang lumipas, naglabas ng desisyon ang CSCRO na nagtanggal sa akin sa serbisyo. Sa loob ng tamang araw, nag-apela ako sa CSC main office. Subalit, habang ang apela ko ay nakabinbin, naglabas ng order ang Department of Education (DepEd) na nagpapatupad sa dismissal order ng CSCRO. Ilang taon ang lumipas, naglabas ng desisyon ang CSC main office na kung saan three-month suspension na lang ang ipinataw sa akin. Karapat-dapat ba akong tumanggap ng back salaries? - Alan

Dear Alan,

Hindi nararapat na ipatupad agad ang dismissal order na ipinataw ng Civil Service Commission Regional Office (CSCRO) kung ito ay naiapela sa loob ng tamang araw sa Civil Service Commision proper. Ito ay sa kadahilanang ang nasabing desisyon ng CSCRO ay hindi immediately executory. Ang maagang pagpapatupad ng dismissal order ay magbibigay ng karapatan sa tinanggal na empleyado upang tumanggap ng back salaries, kahit na ‘di naman siya ganap na napawalang-sala sa kanyang apela. Ito ang pinaliwanag ng Kataas-taasang Hukuman sa kasong Republic vs. Eulalia Maneja, G.R. No. 209052, June 23, 2021, na isinulat ni Kagalang-galang na Mahistrado Mario V. Lopez, kung saan sinabi ng Korte na:

“Clearly, effects of decisions of CSCROs are different from those of the heads of offices.

Specifically, decisions of secretaries and heads of agencies imposing removal are executory upon confirmation of the secretary concerned while decisions of the CSCROs imposing dismissal from the service are executory only when no motion for reconsideration or appeal is filed.

The Supreme Court in Abellera v. City of Baguio, et al, had the occasion to declare that premature execution of a decision dismissing an employee from government service could serve as basis for an award of back salaries.

Here, as in Abellera, CSCRO No. X’s decision was hastily executed pending Maneja’s appeal resulting in her dismissal despite the decision not being executory. Therefore, her suspension from December 2003 up to her actual reinstatement, is unjustified and without basis warranting the grant of backwages covering that period, notwithstanding the fact that she was not fully exonerated from her offense of dishonesty.”

Sa iyong sitwasyon, ipinatupad agad ng DepEd ang desisyon ng CSC regional office kahit na ikaw ay nagsampa ng apela sa tamang panahon. Dahil dito, narararapat lang na makatanggap ka ng back salaries mula sa araw na ika’y tinanggal sa trabaho hanggang sa iyong aktuwal na reinstatement. Bawas naman ang 3 buwang suspension na ipinataw ng CSC main office sa iyo.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.