Pacers at Lakers, girian na sa finals

ni Anthony E. Servinio @Sports | December 8, 2023

Maghaharap na para sa kampeonato ng makasaysayang unang NBA In-Season Tournament ang Indiana Pacers at Los Angeles Lakers matapos ang knockout semifinals kahapon sa T-Mobile Arena ng Las Vegas. Tinalo ng Pacers ang Milwaukee Bucks, 128-119, na sinundan ng malupit na 133-89 tambakan ng Lakers sa New Orleans Pelicans.

Sumapat ang 30 puntos ni Lebron James kahit hindi na siya ipinasok sa huling isa at kalahating quarter. Pinaupo na si LBJ na may anim na minuto pa sa third quarter at komportableng lamang ang Lakers, 90-60.

Kahit wala na si James ay lalong lumaki ang bentahe sa 110-71 sa pagsara ng third quarter at ang huling agwat na 44 ay siya ring pinakamalaki sa buong laro. Limang iba ang kakampi ang nag-ambag ng 12 o higit sa pangunguna na Austin Reaves na may 17 bilang reserba.

Pinatunayan muli ng Pacers ang bangis ng pinakamainit na opensa sa NBA sa likod ng pagmando ni point guard Tyrese Haliburton. Numero uno ang Indiana na may 128.4 puntos bawat laro at hindi magandang estratehiya para sa kanilang kalaro na labanan sila sa paramihan ng shoot.

Lamang ang Bucks na may anim na minuto pa sa huling quarter, 106-105, subalit nagtulungan si Haliburton at kapwa gwardiya Bruce Brown at sentro Myles Turner upang maagaw ang lamang. Inihatid ni Haliburton ang pandiin na three-points para 122-114 at mula roon ay prineserba ng Pacers ang panalo sa mga free throw.

Halimaw pa rin si Haliburton sa kanyang 27 puntos, 15 assist at walang turnover. Double-double si Turner na 26 at 10 rebound.

Ang kampeonato ay gaganapin sa parehong palaruan sa Linggo ng umaga, petsa at oras sa Pilipinas. Naghihintay sa kampeon ang bagong NBA Cup at $500,000 (P27.706-M).

Hindi pa nananalo ang Indiana ng NBA World Championship kumpara sa 17 ng Lakers. Nagharap ang dalawang prangkisa noong 2000 NBA Finals na kinuha ng Lakers, 4-2.

PFF at PFL, ihahain ang plano sa PSA online forum

ni Anthony Servinio - @Sports | September 1, 2020

Ilalatag ng pamunuan ng Philippine Football Federation (PFF) at Philippines Football League (PFL) ang kanilang mga plano para sa nalalabing bahagi ng taon sa lingguhang Philippine Sportswriters Association (PSA) Online Forum ngayong Martes. Haharap sa mga mamahayag sina PFF President Mariano Araneta at PFL Commissioner Mikhail Torre simula 10:00 ng umaga.

Pangunahin sa mga tatalakayin ang bagbabalik sa ensayo ng mga koponan ng PFL sa buwan na ito at ang pormal na pagbubukas ng ika-apat na taon ng liga. Sakop ang PFL sa Joint Administrative Order na pinapayagan ang mga propesyonal na atleta na mag-ensayo muli.

Malalaman ang mga detalye ng paghahanda ng PFL at mga koponan. Unang inihayag ng liga na plano nilang gawin lahat ng mga laro sa PFF National Training Center sa Carmona, Cavite.

Mag-uulat din tungkol sa mga pambansang koponan matapos ipagpaliban ng Asian Football Confederation (AFC) at ASEAN Football Federation (AFF) ang lahat ng kanilang mga torneo. Karamihan ng mga apektadong palaro ay inilipat na para sa 2021. Mapapanood ng live ang pulong balitaan sa pahina sa Facebook ng PSA at sa Radyo Pilipinas 2.

Samantala, hindi pinalad ang kapitan ng Philippine Azkals na si Stephan Schrock na umabante sa AFC Greatest Goals Bracket Challenge sa www.the-afc.com. Lamang mula ng pagbukas ng botohan noong Sabado, natalo bigla si Schrock ng alamat ng Vietnam na si Le Cong Vinh sa Round of 16 matapos bumuhos ang boto para sa Vietnamese sa huling dalawang oras bago ito nagwakas noong Lunes ng hapon.