Thompson, bumida sa panalo ng GS Warriors

ni Anthony Servinio @Sports | February 16, 2024

Gumawa ng ingay si Klay Thompson sa 140-137 tagumpay ng Golden State Warriors sa Utah Jazz sa NBA kahapon mula sa Chase Center. Bago ang taunang All-Star, naging ika-153 manlalaro sa kasaysayan ng liga na nagtala ng 15,000 puntos.

Pumasok sa laro ang bumisita sa Pilipinas bago magbukas ang NBA na kailangan ang 15 upang maabot ang natatanging marka. Bumira siya ng 35 puntos mula sa pitong three-points bilang reserba subalit sa oras ng kagipitan ay tumakbo ang Warriors kay Stephen Curry.

Sa gitna ng banta ng Jazz, walang-kabang ipinasok ni Curry ang dalawang free throw galing sa foul ni Keyonte George na may dalawang segundo sa orasan at palakihan ang kanilang bentahe, 140-137. Tumawag ng timeout ang Utah subalit nag mintis ang tres ni Collin Sexton sabay tunog ng busina.

Nagtapos si Curry na may 16 at 10 assist habang may ambag na 23 si Draymond Green. Nanguna sa Jazz sina George na may 35 at Sexton na may 33 habang may 13 si Gilas Pilipinas Jordan Clarkson.

Sa ibang laro, pinatibay ng Minnesota Timberwolves ang kapit nila sa liderato ng Western Conference at tinambakan ang Portland Trail Blazers, 128-91, para sa ika-39 tagumpay sa 55 laro. First quarter pa lang ay tapos na ang usapan at tumalon ang Minnesota sa 44-14 lamang sa likod ni Anthony Edwards na nagtapos na may 35 puntos at sinuportahan ni Karl Anthon Towns na may 23.

Tinakasan ng Memphis Grizzlies ang Milwaukee Bucks, 113-110, salamat sa tambalan nina Ziaire Williams at reserba GG Jackson na parehong gumawa ng tig-27 puntos. Binigyan ni Williams ng 113-104 lamang ang Memphis na may 49 segundong nalalabi subalit humabol ang Bucks sa dalawang tres ni Malik Beasley subalit hanggang doon lang at nagmintis ang tres ni Damian Lillard na magtatakda sana ng overtime.

Talas sa 3 puntos nina Curry at Ionescu masusubok

ni Anthony Servinio @Sports | January 31, 2024

Matutuloy na ang patalasan ng kamay sa 3-points sa pagitan nina Stephen Curry ng Golden State Warriors at Sabrina Ionescu ng New York Liberty sa pinakaunang “NBA vs. WNBA 3-Point Challenge” bilang bahagi ng 2024 All-Star Weekend ngayong Pebrero 18, petsa sa Pilipinas sa Lucas Oil Stadium.  

Ito ay matapos magpalitan ng hamon ang dalawang superstar sa social media nitong Enero lang.  Parehong patakaran ang gagamitin kung saan may 27 bola na may halagang tig-isa hanggang tig-tatlong puntos.  Ang pinagkaiba lang ngayon ay titira si Curry sa linya ng NBA na 23 talampakan at 9 na pulgada kumpara kay Ionescu na titira sa linya ng WNBA na mas malapit na 22 talampakan at 1.75 pulgada.

       Gagamit din ng sariling bola kung saan mas magaan ang bola ng WNBA at may laking 27.5 pulgada kumpara sa 28.5 sa NBA.  Inihayag ni Ionescu na handa siyang tumira mula sa linya ng NBA.

Nagsimula ang debate noong nagtala si Ionescu ng 37 mula sa ipinasok na 25 sa 27 bola para koronahan ang sarili bilang kampeon sa 2023 WNBA Three-Point Shootout noong Hulyo.  Malayo ito kumpara sa marka na unang naabot ni Curry noong 2021 at pinantayan ni Tyrese Haliburton noong 2023. 

        Sa huli, lalabas na ang pinakamalaking magwawagi ay ang kawanggawa.  Tatanggap ang Eat.Learn.Play ni Curry at SI20 Foundation ni Ionescu ng donasyon habang daragdagan ito ng State Farm at NBA Foundation ng $1,000 bawat regular na bola, $2,000 bawat Money Ball at $3,000 bawat Starry Range Ball. 

       Nagpatikim kahapon ng kanyang kakayahan si Curry at pumukol ng walong tres patungong 37 puntos at wagi ang Warriors sa Philadelphia 76ers, 119-107.  Walo rin ang sunod na tagumpay ng New York Knicks at iniligpit si Jordan Clarkson at Utah Jazz, 118-103, tampok ang siyam na tres para 33 ni Donte DiVincenzo. 

Lebron-Less Lakers, sinamantala ni Clarkson ginanahan ang Fil-Am

ni Anthony Servinio @Sports | January 14, 2024

Photo: Utah Jazz / Instagram

Ginanahan si Pinoy Pride Jordan Clarkson at tinulungan ang Utah Jazz na talunin ang kanyang dating koponan Los Angeles Lakers, 132-125, sa tampok na laro sa NBA kahapon sa Delta Center.  Sumosyo din sa liderato ng Western Conference ang nakakagulat na Oklahoma City Thunder na wagi sa Orlando Magic, 112-100, sa gabi na maraming superstar ang lumiban sa buong liga. 

Pumasok ang Lakers na wala si LeBron James subalit hindi sila natinag at kinuha ang first half, 67-64.  Kumilos ang Jazz sa third quarter at inagaw ang bentahe sa likod ng 12 puntos ni Lauri Markkanen at hindi na nila binitawan ito, 100-95.

Limang sunod na panalo na ang Jazz para sa kartadang 21-20.  Nagtapos na may 29 si Markkanen habang 25 si Collin Sexton at 21 kay Clarkson.

Tumabla ang Thunder sa nagpapahingang Minnesota Timberwolves sa 27-11.  Walang nakapigil kay Shai Gilgeous-Alexander na umusok para sa 37 puntos.

Nagising mula sa mapait na talo laban sa Milwaukee Bucks noong isang araw, itinatak ng Boston Celtics ang kanilang estado bilang numero unong koponan ng liga at dinurog ang Houston Rockets, 145-113.  Balik ang mainit na opensa ng “The Jays” at may 32 si Jaylen Brown kasama ng 27 ni Jayson Tatum. 

Kinuha ng New Orleans Pelicans ang pagkakataon na lumiban si Luka Doncic at dinaig nila ang Dallas Mavericks, 118-108.  Kumuha ng lakas ang Pelicans kay rookie Jordan Hawkins na gumawa ng 34. 

Isa pang superstar ang nagpahinga at  wala si Stephen Curry para sa Golden State Warriors na pinaluhod ng Bucks, 129-118.  Namayagpag si Giannis Antetokounmpo sa kanyang 33 puntos at tumulong si Damian Lillard na may 27. 

Idiniin ng Chicago Bulls ang kanilang pagwalis sa San Antonio Spurs, 122-116, sa 24 puntos at 16 rebound ni Nikola Vucevic.  Ito ay bihirang pagkakataon na mga koponan mula sa magkaibang conference ay magtatapat ng tatlong beses imbes sa kinagawiang dalawa.