Pacers at Mavericks bumawi sa balwarte ng kalaban

ni Anthony E. Servinio @Sports | April 24, 2024

Mahalaga na manalo sa tahanan ng kalaban sa NBA Playoffs at pinatunayan ito ng mga bisitang Indiana Pacers at Dallas Mavericks matapos bumawi at itabla ang kani-kanilang mga seryeng best-of-seven sa 1-1 kahapon. Nanatiling matibay ang Minnesota Timberwolves at pinalamig ang bisitang Phoenix Suns, 105-93, para maging 2-0 ang kanilang serye.

Humarurot ang Pacers sa 125-108 tagumpay sa Milwaukee Bucks kung saan bumalik ang kanilang malupit na shooting. Matapos manalo ang Milwaukee sa Game One, 109-94, tuluyang naramdaman nila ang pagliban muli ni Giannis Antetokoumpo.

Iyan ang daan para magdomina si Pascal Siakam na nagtapos na may 37 puntos at 11 rebound, hindi nalalayo sa kanyang 36 at 13 noong Game One. Ang iba ngayon ay umani siya ng tulong kay Myles Turner na may 22 at Andrew Nembhard na may 20.

Mahigpitan ang pagwawakas at sa huli at nanaig ang Mavs sa LA Clippers, 96-93. Tatlo lang ang bentahe ng Dallas, 93-90, at 21 segundo ang nalalabi at isinalba sila ng tatlong free throw ni Kyrie Irving bago itinakda ang huling iskor ng tres ni Paul George sa huling busina.

Halimaw si Luka Doncic na nagsumite ng 32 puntos habang 23 si Irving. Matapos lumiban noon Game One, balik-aksiyon si Kawhi Leonard at gumawa ng 15 ngunit hindi ito sapat habang may tig-22 sina Paul George at James Harden.

Humugot ng mahusay na laro ang Timberwolves kay Jaden McDaniels na nagtala ng 13 ng kanyang 25 sa second half. Sumuporta sina Rudy Gobert at Mike Conley na may tig-18.

Samantala, napiling Most Improved Player si Tyrese Maxey ng Philadelphia 76ers. Umangat ang kanyang numero sa 25.9 puntos, 3.7 rebound at 6.2 assist kumpara sa 20.3, 2.9 at 3.5 noong nakaraang taon.

Murray arangkada sa Nuggets at Knicks, pareho nang 2-0

ni Anthony E. Servinio @Sports | April 23, 2024

Ipinasok ni Jamal Murray ang nagpapanalong puntos para sa World Champion Denver Nuggets, 101-99, laban sa bisitang Los Angeles Lakers upang umakyat sa 2-0 sa pagpapatuloy ng 2024 NBA Playoffs kahapon sa Ball Arena. Sa Eastern Conference, umarangkada rin ang New York Knicks at Cleveland Cavaliers sa 2-0 sa kanilang hiwalay na serye.

Matiyagang binura ng Nuggets ang 68-48 lamang ng Lakers sa third quarter. Bumida si Murray sa huling minuto at nagtala ng dalawang free throw para tumabla, 97-97.

Sinagot ito ng buslo ni LeBron James na ibinalik ang bentahe sa Lakers pero nagawang itabla muli ni Murray ang iskor na may 30 segundong nalalabi. Biglang nagmintis ang three-points ni LBJ at napunta ang bola kay Murray na tumira mula 15 talampakan sabay tunog ng busina.

Triple double si Nikola Jokic na 27 puntos, 20 rebound at 10 assist habang 22 si Michael Porter Jr. Ginawa ni Murray ang lahat ng anim na puntos ng Denver sa huling minuto para magtapos na may 20.

Naging mas matibay ang New York sa huling minuto at binigo ang Philadelphia 76ers, 104-101. Humirit ng magkasunod na three-points sina Jalen Brunson at Donte DiVincenzo upang maagaw ng Knicks ang lamang na may 13 segundo sa orasan, 102-101.

Nanaig ang depensa at nagmintis ang tira ni Tyrese Maxey kaya napilitan bigyan ng foul si OG Anunoby na walang kabang ipinasok ang dalawang paniguradong free throw. Hindi talaga araw ng 76ers at hindi pumasok ang tres ni Joel Embiid sabay ubos ng oras.

Nanguna sa Knicks si Brunson na may 24 at sinuportahan ni Josh Hart na may 21 at 15 rebound. Nag-ambag ng 19 si DiVincenzo. Madaling tinalo ng Cavs ang Orlando Magic, 96-86. Nagsabog ng 23 si Donovan Mitchell at may 16 at 20 rebound si Jarrett Allen.

Nuggets, Knicks at Cavs nina Pope at Jokic, nanggiba

ni Anthony E. Servinio @Sports | April 21, 2024

Nakuha ng defending World Champion Denver Nuggets ang unang hakbang patungo sa magkasunod na tropeo at giniba ang bisitang Los Angeles Lakers, 114-103, sa pagbubukas ng 2024 NBA Playoffs kahapon sa Ball Arena. Wagi rin ang New York Knicks, Cleveland Cavaliers at Minnesota Timberwolves sa kanilang mga tahanan.

Matapos ang malamyang first half, kumilos ang Nuggets sa pangunguna ng dating Laker Kentavious Caldwell-Pope na bumira ng lahat ng kanyang 12 puntos na sinamahan ng walo ni Nikola Jokic upang maagaw nila ang lamang papasok sa huling quarter, 89-78. Umabot ng 96-81 ang agwat at siyam na minuto sa orasan at sapat na iyan sa gitna ng mga pagsubok ng Lakers na makalapit.

Malupit si Jokic na nagtapos na may 32 at 12 rebound habang 22 at 10 assist si Jamal Murray. Alanganin maglaro sa bisperas dahil sa pilay, ipinasok si Anthony Davis at nagtala ng 32 at 14 rebound para sa Lakers.

Sumandal ang Knicks sa tambalan ng mga beterano ng FIBA World Cup sa Pilipinas na sina Jalen Brunson at Josh Hart na parehong may 22 puntos upang patumbahin ang Philadelphia 76ers, 111-104. Kinabahan ang 76ers at tila napilay muli ang tuhod ni MVP Joel Embiid bago magtapos ang first half subalit bumalik siya at gumawa ng 11 ng kanyang 29 puntos.

Kontrolado ng Cavs ang buong laro at lumaki sa 78-58 maaga sa fourth quarter. Uminit si Donovan Mitchell para sa 30 kasabay ng mga double-double nina Jarrett Allen na 16 at 18 rebound at Evan Mobley na 16 din at 11 rebound.

Kahit dominado sila noong regular season, ibang usapan ang Playoffs at tinambakan ng Timberwolves ang Phoenix Suns, 120-95, sa likod ng 33 ni Anthony Edwards. Winalis ng Suns ang tatlo nilang pagkikita ngayong taon.