- BULGAR
- Aug 25, 2024
ni Reggee Bonoan @Sheet Matters | August 25, 2024
Namaalam na ang karakter ni Yukii Takahashi bilang si Camille sa FPJ’s Batang Quiapo (BQ) nitong Biyernes dahil pinatay siya ng partner niyang si McCoy de Leon as David.
Nag-post ang Dreamscape Entertainment na producer ng BQ at pinasalamatan nila ang aktres,“Maraming salamat, Yukii Takahashi (@yukiiitakahashi) sa pagiging bahagi ng FPJ’s Batang Quiapo. Hanggang sa muli, Camille!
#FPJsBatangQuiapo, 8 PM sa Kapamilya Channel, Kapamilya Online Live, Cinemo, A2Z, at TV5! Mapapanood rin sa iWantTFC at TFC!”
Maraming mga netizens ang nagalit kay McCoy/David sa ginawa niya kay Camille at ngayon lang namin nalaman na marami pala ang nagmamahal kay Yukii.
Ito ang ilan sa mga komentong nabasa namin mula sa mga netizens:
“Magaling si Camille, sayang.”
“Pinatagal pa ang pagbubuntis, papatayin din pala ang bata, walang aral na mapupulot.”
“Hindi maganda naging papel niya, kawawa si Camille.”
“Ang role ni Camille, umikot na lang sa bahay nila. Minsan na lang lumabas, namatay pa.
“Isang taon naming hinintay ang panganganak ni Camille, tapos papatayin lang?”
“Ang sakim n’yo kay Camille. Puro sama ng loob ang ibinigay at ipinaramdam n’yo sa kanya.”
“Akala ko gaganda ulit si Camille at magsisisi si David. Ba’t pinatay kaagad?”
May ilang nagsabi na baka ibalik si Camille na kunwari may kakambal siya na puwede rin naman, kaso may asawa na si David, si Ara Davao as Katherine Caballero kaya parang malabo na rin.
Anyway, tuloy na kayang mamamatay na rin si McCoy dahil may kumalat na video na nakahiga na siya sa kabaong niya o baka naman ipinostpone pa ni Direk Coco Martin dahil may bago na naman siyang naisip na kuwento para magtagal pa si Ara sa BQ dahil marami na rin siyang tagasubaybay at higit sa lahat, ang telegenic niya.
Speaking of FPJ’s Batang Quiapo (BQ) ay tsugi na ba si Diwata sa kuwento? Nabago na kasi ang takbo ng buhay nina Tanggol played by Coco Martin dahil yayaman na sila.
Ilang raw lang napanood si Diwata sa BQ ay sumikat na ito kaya yumabang na raw, base sa mga nakakakilala sa kanya sa Pasay City kung saan nakapuwesto ang kanyang Pares Overload karinderya.
Maraming netizens ang nagrereklamo na sa kanya dahil hindi ngumingiti kapag may mga nagpapa-picture at ipinakita rin naman ang video sa Showbiz Update nina Ogie Diaz at Mama Loi kasama si Tita Jegs.
At dahil dito ay may payo si It’s Showtime (IS) Miss Q and A Grand Winner at Viva artist Juliana Pariscova Segovia kay Diwata na sana, matuto itong ngumiti at maging mabait.
Simula ni Juliana, “Paulit-ulit na lang ‘yung isyu na ibinabato kay Diwata na laging masungit, ayaw magpa-picture, laging bad trip.
“Well, Diwata ang maipapayo ko lang sa ‘yo, alam mo nu’ng nagsisimula ako sa industriya ay nakinig din naman ako sa mga beterano, sa mga nauna sa ‘kin at one time, nag-guest ako sa Home Sweetie Home sitcom nina Toni Gonzaga at John Lloyd Cruz – 2014 at first time ko ma-meet si Mama Ogie Diaz.
“Isa talaga sa mga tumatak sa ‘kin na ipinayo n’ya, ‘yung mga ganitong klaseng mukha (sabay turo sa mukha niya), ito mismo, mga ganitong klaseng mukha, dapat lagi ‘yan nakangiti regardless kung ano ang estado sa buhay nu’ng nakakasalamuha natin, nakikilala natin, nakakatrabaho natin, kailangan lagi itong (sabay hawak sa face) nakangiti ‘yung ganitong mukha natin kasi ‘yung ganitong mukha natin, laging nami-misinterpret kung masaya ba tayo o hindi. Kaya kailangan lagi tayong naka-smile. Kasi kahit deep inside ay masaya tayo, kung hindi naman nagre-react ang mukha mo, hindi ka talaga nila maiintindihan.”
Napapagod na raw kasi si Diwata sa mga nagpapa-picture sa kanya, kaya hindi na magawang ngumiti.
“Naiintindihan kita na marami kang ginagawa, busy ka, hands-on ka sa negosyo mo, puyat, pagod, stressed, naiintindihan ko lahat ‘yun.
“Base du’n sa video ay nakaupo ka sa isang sulok, so in-assume ko na nagpapahinga ka nang mga oras na ‘yun. Kung gusto mong magpahinga, du’n ka sa lugar na hindi ka maiistorbo, hindi ka maaabala.
“Kasi ‘yung pinuwestuhan mo, daanan talaga s’ya ng customer mo at merong makakakita sa ‘yo at may tendency talagang magpa-picture sa ‘yo at kung hindi mo ibibigay sa kanila ‘yung simpleng ngiti, gesture ng pasasalamat (o) na-appreciate mo sila, makakasakit ka rin ng damdamin.
“Ibigay mo na sa kanila (nagpapa-picture) ‘yung maliit na bagay na ‘yun. Siguro naman, hindi kasing mahal ng pares mo ‘yung ngiti mo, ‘di ba?” payo ni Juliana.
Dagdag pa niya, “Nasubaybayan ko ang pagsisimula mo kasi taga-Pasay lang din ako at nakita ko kung gaano karaming taong pumipila sa ‘yo, kung gaano kahabang (pila) ng supporters mo para lang makita ka at matikman ‘yang pares mo (ipinakita ang video na maraming tao).
“At ngayon, nakikita ko na hindi na ganu’n karami ang nagpupunta sa ‘yo tulad nu’ng nagsisimula ka na sana ‘yun din ang isipin mo na hanggang ngayon, meron at meron pa ring sumusuporta sa ‘yo at meron pa ring naniniwala sa ‘yo at merong dumadayo mula sa malayong lugar para lang makita ka, makapagpa-picture sa ‘yo para masuportahan ka sa negosyo mo at matikman ang pares mo, ‘yun na lang ang isipin mo.
“Naging tagahanga rin ako at alam ko ang pakiramdam ng naiisnaban, naiirapan, namamalditahan, kaya kailangan, friendly ka sa ganyang business. Kung hindi man tumatak ang paresan mo, at least, tumatak ka sa tao na ine-entertain mo sila.”
Bukas ang BULGAR sa panig ni Diwata.
