Budget para sa libreng WIFI sa mga public school, tutukan

ni Kuya Win Gatchalian @Win Tayong Lahat | Oct. 8, 2024

Kasama ang Department of Education (DepEd) sa pangunguna ni Secretary Sonny Angara, masigasig na itinataguyod ng Senate Committee on Basic Education ang paggamit ng education technology o edtech, na alam nating mahalagang aspeto para matiyak ang patuloy na connectivity at access sa makabagong pamamaraan ng pagkatuto.

Isang pamamaraan ay ang mas epektibong pagpapatupad ng libreng WiFi program ng gobyerno, nang sa gayon ay matiyak natin ang internet connectivity sa lahat ng pampublikong lugar sa bansa, kasama na ang public schools. 

Sa inihain ng inyong lingkod nitong 19th Congress na Digital Transformation of Basic Education Act (Senate Bill No. 383), nais nating palakasin ang paggamit ng information and communications technology sa pag-aaral at mag-atas sa DepEd na gawing digital ang mga workflow.

Sa ilalim ng naturang panukala, may mandato ang Department of Science and Technology (DOST) na makipagtulungan sa DepEd at Department of Information and Communications Technology (DICT) upang isulong ang agham, teknolohiya, at inobasyon. Ito ay para paigtingin ang pag-aaral at pagtuturo, at ihanda ang sektor ng edukasyon sa Fourth Industrial Revolution. 

Sa pinakahuling budget briefing ng DICT, inilahad ng naturang ahensya na kabilang sa kanilang konsiderasyon ang paglalagay ng libreng WiFi sa 125,000 na pampublikong lugar. Sa kasalukuyan kasi, ang libreng WiFi program ay sumasaklaw lang sa 6,700 pampublikong lugar na may estimang 13,000 access points.

Sinabi ni DICT Undersecretary Jeffrey Ian Dy na ang pagpapalawak ng libreng WiFi program sa 125,000 pampublikong lugar sa pamamagitan ng subscription ay maaaring hindi maging sustainable dahil mangangailangan ito ng P58 bilyong pondo kada taon. Samantala, pinag-aaralan nito ang iba pang paraan upang maging cost-efficient ang pagpapatupad ng libreng WiFi program.

Tinataya ng DICT na P5 bilyon ang kakailanganin upang maipatupad ang unang yugto ng kanilang planong free WiFi na sasaklaw din sa mga pampublikong paaralan. Ang budgetary requirement na ito, gayunpaman, ay hindi nakapaloob sa National Expenditure Program (NEP) na naisumite na sa Kongreso. 

Maliban sa Senate Bill No. 383, kabilang sa ating mga panukalang batas na nagsusulong ng digitalization sa sektor ng edukasyon ay ang Philippine Online Library Act (Senate Bill No. 477), Public School Database Act (Senate Bill No. 478), at ang One Learner, One Laptop Act (Senate Bill No. 474).

Sa pakikipagtulungan sa mga ahensya ng gobyerno, positibo tayong mapapaigting natin ang proseso ng digitalization sa bansa para matiyak na hindi mapag-iiwanan sa edukasyon ang ating mga kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Patuloy na ipakita ang suporta sa mga guro sa pagtatapos ng Teachers’ Month

ni Kuya Win Gatchalian @Win Tayong Lahat | Oct. 3, 2024

Mainit na pagbati ang ating ipinaaabot sa lahat ng minamahal nating mga Pilipinong guro sa pagtatapos ng National Teachers’ Month. 

Lubos akong nagpapasalamat sa ating mga guro para sa napakahalagang papel na kanilang ginagampanan upang hubugin ang ating mga kabataan na maging mabubuti at mahuhusay na mga mamamayan. 

Kaya naman bilang pagkilala sa kanilang kontribusyon sa ating bansa, patuloy nating isinusulong ang mga panukalang batas na lalo pang magtataguyod sa kanilang kapakanan. 

Unang-una na rito ang dagdag na mga benepisyo at oportunidad sa trabaho para sa bawat public school teacher. Makikita natin ito sa ipinaglalaban nating pagsasabatas ng Revised Magna Carta for Public School Teachers (Senate Bill No. 2493) na naglalayong dagdagan ang benepisyo ng mga guro at ayusin ang mga kondisyon sa kanilang trabaho.  

Isinusulong din ng naturang panukala ang pagbibigay ng calamity leave, special hardship allowance, ang proteksyon sa mga guro pagdating sa out-of-pocket expenses, ang pagbabawal sa pagpapagawa ng non-teaching tasks, ang pagbabawas ng teaching hours mula anim pababa sa apat, at iba pa. 

Sa ilalim pa rin ng naturang panukala, ang karagdagang oras ng pagtuturo ay magkakaroon ng karagdagan namang bayad na katumbas ng kanilang regular na sahod at umentong hindi bababa sa 25 porsyento ng kanilang basic pay.   

Samantala, layon naman ng Career Progression System for Public School Teachers Act (Senate Bill No. 2827) na palawakin ang oportunidad ng mga guro sa pagkakaroon ng career path sa teaching, school administration, o supervision. Layon din ng naturang panukala na likhain ang mga posisyon na Teacher IV, Teacher V, Teacher VI, Teacher VII, and Master Teacher V. 

Sa ating mga guro, hindi madali ang inyong tungkulin. Sa kabila ng mga hamon sa sektor ng edukasyon, nananatili kayong matatag at tapat sa inyong misyon. 

Ipinapakita ninyo ang tunay na kahulugan ng pagmamahal sa ating bayan, sa edukasyon, at sa ating bansa. Pagpupugay para sa inyong lahat!

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Math and Science High School, isulong sa bawat probinsiya

ni Kuya Win Gatchalian @Win Tayong Lahat | Oct. 1, 2024

Isa sa mga binibigyang prayoridad ng inyong lingkod bilang chairman ng Senate Committee on Basic Education ang pagkakaroon ng sapat na bilang ng science, technology, engineering, and mathematics (STEM) professionals sa ating bansa. Mariin natin itong isinusulong sa pamamagitan ng isang panukala na magkaroon ng mga public math and science high school sa lahat ng probinsya sa ating bansa.

Noong nagdaang linggo, nabigyan tayo ng oportunidad na dumalo sa inauguration ceremony at blessing ng bagong Eastern Visayas Regional Science High School campus sa Catbalogan City, Samar, kung saan nakapaghatid ng donasyon ang ating tanggapan para sa pagpapatayo ng mga gusali sa naturang campus. Sinamahan din natin si Governor Sharee Tan sa inisyal na pagbahagi ng 32 TV sets sa Samar National School, kung saan bahagi ng kabuuang 90 TV sets na ipapamahagi.

Isinusulong natin ang pagkakaroon ng mga public math and science high schools sa lahat ng mga probinsya, lalo na’t mahalaga ang papel ng agham at matematika sa pagtaguyod ng inobasyon sa ating bansa. Bukod dito, mahalaga ring tiyakin natin na ang bawat public math and science high school sa ating bansa ay may sapat na mga kagamitan at pasilidad para sa paghahatid ng dekalidad na edukasyon.

Sa ilalim ng 19th Congress, inihain ng inyong lingkod ang Equitable Access to Math and Science Education Act (Senate Bill No. 476), kung saan imamandato sa mga probinsyang wala pang public math and science high school na magpatayo ng isa. At upang magawa ito, kinakailangang makipagtulungan ng mga probinsya sa Department of Education (DepEd).

Magpapatupad ang mga paaralang ito ng six-year integrated junior-senior high school curriculum na nakatutok sa mga advanced na subject sa science, mathematics, at technology sa ilalim ng paggabay ng DepEd at Department of Science and Technology (DOST).

Para naman sa mga magtatapos sa mga public math and science high school na ito, kinakailangan nilang mag-enroll sa isang apat na taon o limang taong Bachelor’s degree in Science na programa sa isang accredited na kolehiyo o pamantasan.

Sa pagsusulong nito, maiaangat din natin ang performance ng mga kabataang mag-aaral sa mathematical and scientific literacy.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com