Golfer Pagunsan, Swak sa Olympics; AU AT CSB, Gold sa Speed Kicking

ni VA / MC - @Sports | June 23, 2021

Juvic Pagunsan-golfer

Opisyal nang nakakuha ng slot sa Olympics si Golfer Juvic Pagunsan upang maging pang-13th na Filipino na lalaro sa Tokyo Olympics na nakatakda sa susunod na buwan.

Inaasahan na ring idedeklarang pasok sa Olympics sina Yuka Saso at Bianca Pagdanganan sa susunod na linggo. Nakuha ng 43-year-old na si Pagunsan ang kanyang Olympic tiket matapos malagay sa 50th spot ng 60 quota na lalahok sa men’s competition na nakatakda sa July 29 - Aug. 1 sa Kasumigaseki Country Club sa Japan.

Dahil dito, ang 2021 Japan Golf Tour’s Mizuno Cup champion ang naging unang Filipino golfer na nakapasok sa Olympic dahil ang women’s qualifiers ay iaanunsiyo pa sa susunod na linggo. Inaasahang sina Saso, ang reigning US Women’s Open champion at Pagdanganan, ay makukuha ang Olympic slots sa pag-anunsiyo ng final 60-player composition sa susunod na linggo.

Nakatakda ang women’s event sa August 4-7 sa parehong golf course. Makakasama ni Pagunsan sa Olympics sina pole-vaulter EJ Obiena, gymnast Caloy Yulo, boxers Eumir Marcial, Irish Magno, Nesthy Petecio and Carlo Paalam, weightlifters Hidilyn Diaz and Elreen Ando, rower Cris Nievarez, jin Kurt Barbosa, skateboarder Margie Didal at shooter Jayson Valdez.

Samantala, nagwagi na rin ng gold medal ang Arellano University habang kinopo ng College of Saint Benilde-La Salle Greenhills ang ikalawa nilang gold medal noong Lunes ng hapon sa pagpapatuloy ng NCAA Season 96 juniors virtual speed kicking event.

Si Raphael Ongkiko ang nagwagi ng ikalawang gold para sa Junior Blazers nang makakuha ito ng iskor na 7.067 puntos upang mangibabaw sa middleweight/light heavyweight division.

Inangkin ang silver at bronze medals ng dalawang jins mula Emilio Aguinaldo College (EAC) na sina John Keirth Beramo na nagtala ng 6.667 puntos at Bermel Dionela Jr. na nakatipon ng 6.458 puntos ayon sa pagkakasunod.

Samantala, nanggaling naman sa heavyweight division ang unang gold medal ng Arellano nang manalo si Joshua Lyndon Dionio matapos umiskor ng 6.592 puntos.

NCAA Virtual: Gold ang Lyceum at Letran sa Speed Kicking

ni VA - @Sports | June 21, 2021

Ipinagpatuloy noong Biyernes ang aksiyon sa National Collegiate Athletic Association (NCAA) Season 96 sa pagdaraos ng kauna-unahang speed kicking competition sa juniors division. Ang unang nagwagi ng gold medal sa event na isinagawa pa rin sa virtual platform ay si John Patrick Moneda ng Lyceum of the Philippines University (LPU) na umiskor ng kabuuang 6.733 sa juniors' flyweight division.

Nagtapos namang second placer at nagwagi ng silver medal si Reymundo Calamba III ng San Beda University makaraang magtala ng 6.558 at pumangatlo si Chris Daniel Barrozo ng Emilio Aguinaldo College na umiskor ng 6.375 para sa bronze. Bumawi naman sa bantamweight division ang San Beda naman nang manalo si Ignatius Vicente Lorenzo Pinera matapos magposte ng 6.750 puntos. Sinundan sya ni LPU jin Dirk Ranque na may 6.483 at Lebron James Alemania ng host Letran na may 6.200. Nakaisa namang gold ang Letran makaraang umiskor ni Luke Morel ng 6.367 upang manguna sa boys featherweight division.Kásama nyang tumapos sa podium sina Kristian Reggae Domondon ng EAC (6.342) at Marlex Mercado ng San Beda (6.200). Inangkin naman ng San Beda ang ikalawa nilang gold medal sa event nang mamayani sa boys lightweight division si Philip Joshua Lee na nagtala ng 7.083 puntos. Sumunod sa kanya ang dalawang EAC jins na sina Leigh Cyril Aslarona (6.108) at Aubrey Gacilos (5.942).

Naka-2 gold na sa Poomsae ang San Beda sa NCAA Virtual

ni VA - @Sports | June 20, 2021

Nanguna ang San Beda University sa pagtatapos ng unang kompetisyon sa NCAA Season 96 makaraang magwagi ng dalawang gold medals. Nakopo ni Michael Macario ang ikalawang gold medal para sa Red Jins nang mangibabaw ito sa men's freestyle online competition noong Huwebes ng hapon.

Nakakuha si Macario ng kabuuang 7.033 puntos para makamit ang gold medal. Nagtapos na pinakamalapit sa kanya at siyang nagwagi ng silver ang Jose Rizal University (JRU) jin na si Mikko Jeremi Bataoil na nakatipon ng 6.367 puntos habang sumunod si Justin Carl Dominic Nacua ng College of St.Benilde na may 5.600 puntos para sa bronze.

Ang unang nagwagi ng gold para sa Red Jins ay si Alfritz Arevalo sa men’s standard event noong Lunes. Napanalunan ni Krizelle Therese Yadao ng Saint Benilde ang gold medal sa women’s freestyle. Ginapi ni Yadao na nakakuha ng 6.900 puntos si Shyenler Emelo Cedo ng JRU na siyang nag-uwi ng silver sa nangyaring two-way battle.

Sa kabuuan, umani ang San Beda ng dalawang gold medals at isang bronze para pangibabawan ang seniors division ng katatapos na virtual competition. Sumunod sa kanila ang CSB na may isang gold, dalawang silver at isang bronze at pumangatlo ang JRU na may isang gold at dalawang silver.

Samantala sa juniors division, nakadalawang gold medals din ang Emilio Aguinaldo College (EAC) matapos mapanalunan ni John Mcleary Ornido ang kanilang second gold sa freestyle event. Tinalo niya sa natipong 6.800 puntos si Raphael Ongkiko ng CSB-La Salle Greenhills na may 6.700 puntos. Sumegunda sa Brigadiers ang CSB-La Salle Greenhills at ang San Sebastian na may tig-isang silver. Ang susunod na kompetisyon ng espesyal na season ay ang speed-kicking event na sinimulan na ang juniors contest noong Biyernes. Kasunod nito ang men’s division sa Hunyo 22 - 29 at ang women’s sa Hunyo 30 hanggang Hulyo 5.