Wong, Tolentino at Galanza isasabak sa Asian Championship

ni VA - @Sports | August 30, 2021

Tatlo pang players ang inimbitahan upang makasama sa Philippine Women’s National Indoor Volleyball Team pool. Dahil sa ipinamalas nilang standout performance sa nakaraang Premier Volleyball League bubble, inimbitahan ang mga Choco Mucho players na sina Deanna Wong at Kat Tolentino at Creamline open spiker Jema Galanza para makasama ng national team na nakatakdang sumabak sa darating na 2021 Asian Women’s Club Volleyball Championship sa Oktubre.

Napahanga ng tatlo sina head coach Odjie Mamon at Brazilian consultant Jorge Edson Souza de Brito sa kanilang inilaro sa katatapos na PVL Open Conference. Kailangan ng National Team na bumuo ng pool na may 24 na players dahil balak ng Philippine National Volleyball Federation (PNVF) na magpasok ng dalawang koponan sa nasabing club championship na gaganapin sa Oktubre 1-7 sa Nakhon Ratchasima, Thailand. Kung pauunlakan nila ang imbitasyon, makakasama nila sa pool sina Majoy Baron, Mhicaela Belen, Kamille Cal, Rhea Dimaculangan, Kim Dy, Imee Hernandez, Ivy Lacsina, Eya Laure, Dawn Macandili, Dindin Santiago-Manabat, Aby Maraño, Kalei Mau, Ria Meneses, Jennifer Nierva, Faith Nisperos, Mylene Paat, Dell Palomata, Bernadette Pepito, MJ Phillips, Jaja Santiago, Tin Tiamzon, at Iris Tolenada.

Samantala,hindi pa naman sigurado kung makakalaro sa torneo si Jaja Santiago dahil hindi pa batid kung papahintulutan ito ng kanyang team sa Japan na Saitama Ageo Medics kaugnay ng paghihigpit ng pamahalaan ng Japan sa mga imports ng iba't-ibang team sports.

Obiena, winasak ang national record, 2nd sa Wanda League

ni VA / Gerard Arce - @Sports | August 30, 2021

Naitala ni EJ Obiena ang maituturing na best-ever performance niya sa pole vault mayapos muling i-reset ang hawak niyang national record pagkaraang tumapos na pangalawa sa Paris leg ng 2021 Wanda Diamond League sa Stadium Charelty kahapon. Nilampasan ni Obiena ang dating record na 5.87 meters na nakuha sa Irena Szewinska Memorial Cup sa Poland bago ang Summer Olympic Games, kung saan nagtapos ito ng 11th place finish nito lamang Agosto matapos matalon ang baras na itinaas ng 5.91 meters

Pumangalawa siya sa Tokyo Olympics gold medalist at world record holder na si Armand Duplantis ng Sweden na nakatalon ng 5.96 meters. Nangibabaw pa ang 25-anyos na Pinoy Olympian nang matalon nito ang nasabing taas sa kanyang unang attempt. Dito na nag-passed ang mga pinakamahigpit na mga katunggaling sina Duplantis at Christopher Nilsen ng US kaya itinaas ulit ang baras sa 5.96 meters kung saan ang Swedish ang nagwagi matapos na mag-passed si Obiena sa kanyang final attempt habang umayaw naman si Nilsen.

Tinangka pa ni Duplantis na sirain ang kasalukuyang world record na 6.19 meters ngunit hanggang 6.01 meters lamang ang kanyang naitala. “I felt good. I felt like it was really important for me to come back and try to get into the victory mode again, to try to get over the 6m. Especially after the competition in Lausanne. It was very important to do what I did today,” pahayag ni World record holder at champion na si Duplantis na sinubukan muling sirain ang kanyang personal at world record na 6.15 (outdoor) at 6.18 (indoor) sa pagsubok na makuha ang 6.19 meters. Inaasahang muling sasabak ang dating University of Santo Tomas engineering student-athlete sa Brussels Diamond League sa Setyembre 3 na susundan ng Zurich Diamond League sa Setyembre 8-9 sa Germany.

Official Draw Ceremony, idaraos para sa 2023 FIBA World Cup

ni VA - @Sports | August 29, 2021

Nakatakdang idaos ang Official Draw Ceremony para sa darating na FIBA Basketball World Cup 2023 Qualifiers sa Martes-Agosto 31 sa Patrick Baumann House of Basketball. Ang qualifier draw ceremony ay magsisilbing tip-off para sa mga koponan upang maghanda at mag qualify para sa World Cup. Isasagawa at ihu-host ng tatlong bansang Indonesia, Japan at Pilipinas, ito ang unang pagkakataon na may mahigit sa isang bansang magsisilbing punong abala sa pagdaraos ng FIBA Basketball World Cup.

Ang FIBA Basketball World Cup 2023 competition system ay mayroong anim na windows na lalaruin ng mahigit 15 buwan para sa apat na rehiyong miyembro ng FIBA na kinabibilangan ng Africa, America, Asia/Oceania at Europe. Bawat qualification window ay matatapos sa loob ng siyam na araw mula sa Nobyembre 2021 hanggang Pebrero 2023.

May 16 na national teams ang maglalaban sa rehiyon ng Africa para sa nakalaang limang slots sa kanila para sa World Cup. Labing-anim din na bansa ang magtutunggali para sa Americas qualifiers kung saan pitong slots ang pag-aagawan.

Parehas din ang bilang ng mga bansang magtutuos sa Asia/Oceania region na mag-uunahang magkamit ng 6 na spots na magiging apat na lamang dahil bilang mga hosts ang Philippines at Japan ay awtomatiko ng qualified.

Pero maglalaro pa rin sila sa first at second round ng FIBA Basketball World Cup 2023 Asian Qualifiers. Para sa isa pang host na Indonesia, base sa naging desisyon ng FIBA Executive Committee, kinakailangan pa ng Indonesia na pumasok sa top 8 teams ng FIBA Asia Cup 2021 upang mag-qualify.

Pinakamaraming magsasagupa sa European qualifiers na binubuo ng 32 mga bansa na mag-uunahang mapabilang sa nakalaan sa kanilang 12 slots.