Gilas Youth team, kinapos vs. Japan sa FIBA U16 Qatar

ni MC / VA - @Sports | June 16, 2022

Kinapos ang Gilas youth team kontra Japan, 73-67, para sa ikalawa nilang laro sa 2022 FIBA Under-16 Asian Championship noong Martes ng gabi sa Al-Gharafa Sports Club Multi-Purpose Hall sa Doha, Qatar. Nauwi sa wala ang double-double na 18 puntos at 16 rebounds ni Caelum Harris para sa Philippine Under-16 squad matapos nilang mabigo sa mga Hapon na pinamunuan ni Yuto Kawashima na nagtala ng 26 puntos

May dalawa ring Hapones ang nagtala ng double double performance sa katauhan nina Leon Watanabe at Eijiro Ogawa na kapwa tumapos na may 16 puntos at 14 rebounds. Sanhi ng kabiguan, bumaba ang Gilas sa no. 2 spot sa kanilang grupo. Sunod nilang kakalabanin ang Kazakhstan para patuloy na buhayin ang tsansang umabot ng susunod na round.

Samantala, usapin sa kalagayan ng Philippine professional sports ang tatalakayin at hihimayin sa pagbabalik ng sesyon ng Tabloids Organization in Philippine Sports, Inc. (TOPS) ‘Usapang Sports’ ngayong Huwebes, Hulyo 16, via Zoom.

Pangungunahan ni Chairman Abraham ‘Baham’ Mitra ang pagsabak ng Games and Amusements Board (GAB) – ang ahensiya ng pamahalaan na nangangasiwa sa pro athletes, coaches, at officials, gayundin ang pro leagues at tournaments – sa malayang usapan ng 10 a.m. sa lingguhang sports forum na itinataguyod ng Philippine Sports Commission (PSC), GAB at PAGCOR.

Inaasahan din ang partisipasyon nina Commissioners Ed Trinidad at Raul Lagrisola, kasama ang ilan pang mga opisyal ng ahensiya na nasa ilalim ng Office of the President. Nakasentro ang usapin sa kaganapan sa pagdalo ng GAB sa International Boxing Federation (IBF) convention kamakailan, gayundin sa ilang programa na naging dahilan para sa pagdami ng mga pro league sa bansa sa kabila nang pinagdaanang hamon dulot ng COVID-19 pandemic sa nakalipas na dalawang taon.

Gilas U16, inilampaso ang Kuwait sa Doha FIBA Asia

ni MC / VA - @Sports | June 15, 2022

Inilampaso ng Gilas Pilipinas Youth ang koponan ng Kuwait, 82-45 kahapon sa pagsisimula ng kanilang kampanya sa FIBA Asia Under-16 Championships sa Gharafa Sports Club Multi-Purpose Hall sa Doha. Maagang kumalas ang mga kabataang Pinoy at agad lumamang ng double-digit sa unang apat na minuto ng laro,14-4, na umabot pa sa 25-9 sa pagtatapos ng first quarter hanggang lumobo ng 38 puntos sa katapusan ng laro.

Namuno paŕa sa mga kabataang Pinoy ang 6-foot-6 center na sì Zain Mahmood na nagtala 16 puntos at 5 rebounds na sinundan ni team captain Jared Bahay na may 12 puntos, 8 rebounds at 6 na assists. Sunod nilang kakalabanin kagabi rin ganap ng alas-8:45 para sa ikalawang laro nila sa Group C ang koponan ng Japan na nanaig din sa Kuwait noong Linggo,98-33.

Ang mga mangungunang koponan sa apat na grupo ay uusad sa quarterfinals habang magtutuos sa knockout round ang mga second at third-placed teams upang alamin ang apat pang quarterfinalists. Lahat ng magiging semifinalists ay magku-qualify na sa FIBA Under-17 World Cup sa Hulyo.

Idinagdag si University of the Philippines coach Goldwin Monteverde sa mga deputy coaches ng Gilas Pilipinas para sa July window ng 2023 FIBA World Cup qualifiers.

Kinuha si Monteverde para umasiste kay head coach Nenad Vucinic sa darating na qualifiers.

Ginabayan ni Monteverde ang UP Fighting Maroons sa pag-upset sa dating kampeong Ateneo Blue Eagles sa katatapos na UAAP Season 84 men's basketball finals upang tapusin ang kanilang 36-year title drought.

Dalawang miyembro ng UP champion team sa katauhan nina Carl Tamayo at Ricci Rivero, ang kabilang sa Gilas pool para sa darating na qualifiers.

Thailand, dinomina ang Pinay sa PNVF Int'l Challenge

ni VA - @Sports | June 13, 2022

Ipinakita ng Thailand ang dahilan kung bakit kabilang sila sa mga nangungunang koponan sa buong mundo matapos dominahin ang Philippine women's volleyball team sa loob ng straight-sets, 25-13, 25-10, 25-16, sa PNVF International Challenge,noong Sabado ng gabi sa Filoil Flying V Centre sa San Juan City.

Umpisa pa lang ay ratsada na ang mga Thais sa pagbubukas ng opening set ng 9-0 run hanggang sa tuluyang tapusin ni Sasipapron Janthawisut ang panalo ng kanyang down the line hit sa iskor na 25-13.

Sinundan ito ng 25-10 panalo sa second frame na tinampukan ng 16 na puntos mula sa attacks.

Hindi na sinayang ng koponan ni coach Danai Sriwacharamaytakul ang momentum at tuluyang tinapos ang laban sa pamamagitan ng 25-16 panalo sa third frame.

“This is something new to us also, we’ve never had this international friendly match here in the Philippines,” ani Alyssa Valdez. “Nagpapasalamat kami dahil every time we play against them [Thailand], andami naming natututunan."

“Nagkakaroon pa kami ng inspiration at bagong motivation as players individually and as a team also, na puwede pa naming ma-improve ‘yung mga sarili namin.”

Si Aby Maraño ang nanguna sa Team Philippines sa itinala nitong 6 na puntos kasunod si Dell Palomata na may 5 puntos.

Namuno sa Thailand si Pimpichaya Kokram na may 15 puntos kasunod si Sasipapron Janthawisut na nagposte ng 13 puntos.

Habang isinasara ang pahinang ito ay naglalaban ang Philippines at Japan para sa ikalawang exhibition match kahapon sa Big Dome kung saan idaraos ang Volleyball Nations League second week simula sa Martes.