Loman at Belingon, todo handa Vs. Bibiano at Jae

ni VA / MC - @Sports | November 17, 2022

Triple ang paghahanda nina fifth-ranked bantamweight contender Stephen Loman at dating bantam champion Kevin Belingon para sa kani-kanilang mga kalaban.

Sasagupain ni Loman si Bibiano “The Flash” Fernandes, habang sasalubungin ni Belingon si “The Fighting God” Kim Jae Woong sa bantamweight division sa dalawang kapana-panabik na salpukan sa ONE Fight Night 4: Abbasov vs. Lee sa Sabado ng umaga sa Singapore Indoor Stadium.

Dahil ilang beses na nakalaban ni Belingon si Fernandes, kaya ginagabayan nito ang kanyang nakababatang kasamahan sa pinakamalaking laban sa kanyang karera. “For sure I’ve shared a lot of things with Stephen, things that I’ve experienced with Bibiano. I’ve given him some tips entering this match,” ani Belingon, na apat na beses na lumaban kay Fernandes.

“I think he has really prepared well and he’s at an advantage against Bibiano. Naging smooth ang training niya, solid ang preparation niya, so I expect great things.”

Nang tanungin kung ano ang natutunan niya sa kanyang teammate, pabiro ang sagot ni Loman. “Sinabi niya sa akin na kaya kong talunin si Bibiano dahil matanda na siya,” natatawang sabi niya.

Samantala, muling magiging host ang Pilipinas sa isa sa mga preliminary event ng Volleyball Nations League men’s tournament sa 2023.

Inihayag ng liga noong Biyernes na ang Pasay City ang magiging venue para sa ilan sa mga laro sa Hulyo 4-9. Makakalaban ng Pilipinas sa Philippine leg ng torneo ang Japan, China, Slovenia, Brazil, Poland, Italy, Netherlands, at Canada. Noong nakaraang Hunyo ang Araneta Coliseum sa Quezon City ay nag-host ng mga laro para sa parehong men’s at women’s tournament sa Philippine leg ng VNL.

Bukod sa Pasay City, ang iba pang host city para sa men’s tournament ay ang Ottawa, Canada; Nagoya, Japan; Rotterdam, Netherlands; Orleans, France; at Anaheim sa California, USA.

Novino at Napoles, bida sa judo ng Martial Arts Fest

ni VA / MC - @Sports | November 16, 2022

Bumida sina Sophia Nicole Novino at Rhian Napoles sa kani-kanilang weight categories sa judo ng 8th Philippine Sports Commission Women’s Martial Arts Festival na idinaraos sa Philippine Judo Federation training gym sa loob ng Rizal Memorial Sports Complex sa Maynila.

Nanguna si Novino, ang sophomore ng National Academy of Sports sa women’s -44kg division matapos umiskor ng ippon win (1-0) kontra Mikeighla Louise de Vera ng Baguio Judo Club habang si Gabrielle Lorine Dizon at Princess Maurine Villafranca ang naka-bronze medals.

Ang 6-day event ay bahagi ng unang preparasyon ng bansa para sa 6th Asian Indoor Martial Arts Games sa Bangkok, Thailand sa 2023, eksaktong 365 na araw matapos ang closing ceremony ng WMA Festival sa Huwebes.

Ang iba pang gold medalists sa judo ay sina Analyn Dino (-52kg), Samara Nina Vidor (-57kg), Maegan Motilla (-63kg), Raphaela Estrada (-70kg) at Francesca Michaela Roces (+70kg).

Sa Rizal Memorial Coliseum, nagpakitang husay din sina national wrestlers Jiah Pingot at Grace Loberanes. Tinalo ni Pingot si Lady May Carabuena ng Mandaluyong City para sa gold medal sa freestyle -53kg senior habang ginapi ni Loberanes si Kimberly Jhoy Bondad sa traditional wrestling 57kg.

Nakaginto rin sina Cathlyn Vergara (classic 52kg), Mary Jhol Cacal (58kg), Jean Mae Lobo (63kg), junior grapplers Melissa Tumasis (52kg), Nicole Pinlac (58kg), Rhea Cervantes (63kg), Amber Arcilla (57kg at Nashica Tumasis (freestyle 53kg).

Habang isinusulat ito ay idinaraos ang kompetisyon sa arnis habang ang sambo, taekwondo at muay ay magsisimula sa Miyerkules.

Gilas, pinataob ang Arabs, Ramos at Pogoy, bumida

ni GA /VA - @Sports | November 15, 2022

Kinumpleto ng Gilas Pilipinas ang pangwawalis sa dalawang katunggali sa fifth window ng FIBA World Cup Asian qualifiers matapos pataubin ang Saudi Arabia sa iskor na 76-63 kahapon ng madaling araw sa King Abdullah Sports City sa Jeddah.

Nakabawi sa kanyang nagdaang laro si Dwight Ramos nang tumikada ng 13 puntos, 4 assists at 3 rebounds, na naging pangunahing arsenal sa opensa ng Gilas laban sa pisikal na laro ng Saudi Arabia.

Hindi man naulit ng Gilas ang pananambak nito sa Saudi Arabia sa unang 4th window na ginanap sa MOA Arena na nagtapos sa 84-46 kasunod ng malupit na laro ni Fil-Am at Utah Jazz guard Jordan Clarkson, matagumpay nitong napagwagian ang 2 laro kontra 35th ranked Jordan noong Biyernes at sa Arabo.

Naging malaking bagay si Roger Pogoy na tumapos ng 13pts, 4 rebounds at isang steal, habang ang 7-foot-2 center na si Kai Zachary Sotto ay may 11 pts, 9 rebounds, 5 blocks, 2 assists at isang steal gayundin si CJ Perez na may 10pts at 4 rebounds.

Nagpamalas din ng husay si Scottie Thompson sa 9 na puntos at 9 rebounds, habang nagdagdag si Bobby Ray Parks ng 8 puntos, 6 rebounds at tig-iisang assist, steal at block. “Well, first of all, kudos to the Saudi national team. I thought they played hard and came in with a very good game plan. We expected it,” wika ni Gilas head coach Chot Reyes.

Matapos makuha ang dalawang panalo, umangat sa 5-3 kartada ang Gilas Pilipinas na sunod na makakatapat sa sixth window sa Pebrero sa 2023 ang Lebanon at Jordan, habang bumagsak sa 2-6 rekord ang Saudi sa Group E.