Ateneo Men's at Women's champ sa UAAP Badminton

ni VA @Sports | November 14, 2023

Kapwa itinanghal na kampeon ang men's at women's team ng Ateneo de Manila sa pagtatapos ng Season 86 UAAP badminton tournament.

Nakamit ng Blue Eagles ang kanilang ika-4 na sunod na women’s badminton crown matapos dispatsahin ang University of the Philippines Fighting Maroons, 3-1, sa finals na idinaos noong nakaraang Linggo-Nobyembre 12 sa Centro Atletico Badminton Center sa Quezon City.

Nauna rito, winakasan ng Ateneo ang pitong taong dominasyon ng National University matapos nilang ungusan ang huli, 3-2 sa title match ng men's division.

Itinanghal ang mga Ateneo stars na sina Mika de Guzman at Jochelle Alvarez bilang women’s Most Valuable Players, habang nahirang naman sina Arthur Salvador at Lyrden Laborte bilang MVPs sa men’s side.

Samantala, napili naman ang nagsilbing bayani sa tagumpay ng Ateneo na si Lance Vargas bilang Rookie of the Year.

Ang nasabing titulo ang ikapitong women's championship na nakamit ng Ateneo, isang panalo na lamang na nahuhuli sa UP na mayroong walo.

Nakopo naman ng men’s team ang una nitong kampeonato makalipas ang sampung taon.

Huling nawalis ng Ateneo ang men's at women's titles ng UAAP noong Season 76, sampung taon na ang nakalilipas.

Wong at Tabugara, silver sa World Combat Games

ni VA @Sports | October 24, 2023

Nagsipagwagi ng silver medals para sa Team Philippines ang mga wushu artists na sina Agatha Wong at Clemente Tabugara Jr. noong Linggo sa 2023 World Combat Games sa King Saud University Arena sa Riyadh, Saudi Arabia.

Nakatipon ang 5-time Southeast Asian Games gold medalist na si Wong ng kabuuang 19.486 puntos at masungkit ang silver medal sa women's taolu taijiquan (9.743) and taijijian (9.7466) final. Sumegunda siya kay Hu Shuting ng China na nagtala ng 19.533 puntos mula sa dalawang events.Tumapos namang pangatlo sa kanila ang South Korean bet na si Choi Yujeong na may 19.470 puntos.

Nakabawi si Wong mula sa kabiguang magwagi ng medalya pagkaraang tumapos lang na pampito noong nakaraang 19th Asian Games sa Hangzhou, China. Nanalo naman ng silver si Tabugara nang matalo ito sa Egyptian na si Elsayed Mohsen sa men's 65 kilogram finals.

Bronze naman ulit ang nakamit ni Asian Games bronze medalist Jones Llabres Inso sa men's Taolu Taijiquan and Taijijian makaraang magtala ng pinagsanib na iskor na 19.339. Isa pang bronze ang kinopo naman sa men's Taol Nanquan and Nangun ni Thornton Sayan matapos magtala ng 19.410.

Paglahok ni Pacman sa Olympics inapela ng POC

ni VA @Sports | October 10, 2023

Umapela ang Philippine Olympic Committee (POC) sa International Olympic Committee (IOC) para payagan si Filipino boxing icon Manny Pacquiao na makalahok sa darating na 2024 Paris Olympics.

Ayon kay POC president Abraham “Bambol” Tolentino, nagpadala na sila ng liham para iapela sa IOC upang mabigyan si Pacquiao ng slot sa Paris Games sa pamamagitan ng universality principle.

Ang nasabing universality principle ay ipinagkakaloob sa mga atletang mula sa mga bansang nagkakaproblema na umabot sa Olympics sa pamamagitan ng mga normal qualifying tournaments.

Ngunit dahil sa kasalukuyang estado ni Pacquiao, umaasa ang POC at maging ang Association of Boxing Alliances in the Philippines (ABAP) na mabibigyan ng exception ang dating senador.

“Who doesn’t want Manny Pacquiao in their Olympic lineup? Obviously, he’s an absolute legend, but there are rules in place that we have to consider also,” wika ni ABAP secretary-general Marcus Manalo.

Hindi na rin naman puwedeng sumali si Pacquiao sa mga Olympic qualifying tournaments dahil lagpas na ito sa itinakdang age limit na 40-anyos dahil 44 na taong gulang na ito. “We can probably challenge that age limit since we can assume that its purpose is to protect the [older] boxers because you’re unsure about their conditioning, their level of training,” dagdag ni Manalo.

Kung sakali, naniniwala ang ABAP na isang malaking morale booster para sa Team Philippines kung mapapasama sa koponan si Pacquiao. “Obviously, that would be extremely beneficial for us. The presence alone of Manny Pacquiao would be a big boost already for the team,” ayon pa kay Manalo. “We hope the IOC considers. But the question is are they going to make exceptions for the policies in place?”