Final decision sa 'Pinas hahawakan na ng CAS

ni VA @Sports | February 17, 2024

Nabigyan pa ng palugit ang Pilipinas hinggil sa alegasyong hindi pagsunod sa World Anti-Doping Agency (WADA) international standard for code compliance, makaraang ipaubaya na ng huli ang nasabing isyu sa Court of Arbitration for Sport.

Ang Philippine National Anti-Doping Agency (PHI-NADO), sa ilalim ng tangkilik ng Philippine Sports Commission ay kinuwestiyon ang nasabing alegasyon ng WADA na naging sanhi upang itaas nito ang naturang bagay sa CAS.“On 13 February, WADA received formal notification from the NADO (national anti-doping agency) of the Philippines that it disputes the allegations of non-compliance against it,” ayon sa post ng WADA sa kanilang website. “WADA will now refer the matter to the Court of Arbitration for Sport (CAS) for its consideration. As such, the consequences will not apply until CAS makes its ruling."Wala pang reaksiyon si PSC chairman Richard Bachmann ukol dito gayundin si PHI-NADO chairman Dr. Alejandro Pineda Jr.

Kaugnay nito, pansamantalang nakaiwas ang Philippine sports sa parusang ipinataw sa bansang Angola na hindi na papahintulutang makalahok sa mga WADA-sanctioned events kabilang na ang Olympics.

Hindi gaya ng Pilipinas, nagdesisyon ang Angola na hindi na kuwestiyunin ang alegasyon ng WADA na naging dahilan ng pagpapataw dito ng matinding sanction.

Ang naging kasalanan ng Angola ay ang kabiguan nitong maipatupad ang 2021 version ng WADA Code habang inakusahan naman ang Pilipinas ng kabiguang resolbahin ang ilang kritikal na hindi pagsunod sa WADA Code Compliance Questionnaire exercise. Sa ngayon, nasa kamay na ng CAS ang magiging kapalaran ng Philippine sports.

Veteran forward Aguilar muling sasabak sa Gilas

ni VA @Sports | February 16, 2024

Muling lalaro para sa Gilas Pilipinas sa darating na unang window ng FIBA Asia Cup qualifiers sa susunod na linggo ang beteranong forward ng Barangay Ginebra sa PBA na si Japeth Aguilar.Ayon kay Gilas Gilas head coach Tim Cone, si Aguilar ay itinalaga niya bilang kapalit ng injured na si AJ Edu. Hindi naman kataka-taka ang desisyon ni Cone dahil noon pa man ay bahagi na ng Gilas si Aguilar mula sa orihinal na Gilas team na hawak pa noon ni coach Rajko Toroman.

Nakapaglaro rin ito sa tatlong edisyon ng FIBA World Cup noong 2014 sa Spain, 2019 sa China at 2023 dito sa Manila.

Kasama rin si Aguilar sa koponang nagwagi ng gold medal noong nakaraang 19th Asian Games. Ngunit nang italaga si Cone bilang mentor ng Nationals, hindi kasama si Aguilar sa 12-man line-up na binuo nito dahil mas pinili niya ang mga nakababatang mga big men na sina June Mar Fajardo, Kai Sotto, Carl Tamayo at Kevin Quiambao.

Ngunit sa hindi inaasahang pangyayari, nagtamo si Edu ng torn meniscus habang  naglalaro sa koponan ng Toyama Grouses sa Japan B. League noong Nobyembre kaya nagdesisyon si Cone na muling kunin ang serbisyo ni Aguilar para sa GIlas.

Ngunit inaasahan namang hanggang first window lamang lalaro si Aguilar sa national team dahil babalik na si Edu sa second window na gaganapin sa Abril.

PBA PH Cup, aagahan din para bigyang daan ang Gilas

ni VA @Sports | February 3, 2024

Sisimulan ng PBA nang mas maaga ang Commissioner’s Cup finals habang mapapaaga rin ang pagbubukas ng 2024 Philippine Cup upang bigyang daan ang preparasyon at paghahandang gagawin ng Gilas Pilipinas para sa unang dalawang windows ng FIBA Asia Cup 2025 qualifiers.

Ayon kay PBA commissioner Willie Marcial, ginawa nila ang kaukulang adjustment para sa nakatakdang pagsabak ng Gilas sa darating na Fiba Asia Cup qualifiers na idaraos sa Hong Kong sa Pebrero 22 at sa Chinese Taipei sa Pebrero 25 gayundin sa Fiba Olympic qualifying tournament 2024 na gaganapin naman sa Riga, Latvia sa  Hulyo 2 - 7.

Kaya naman sinimulan na ang Commissioner's Cup finals kagabi, dalawang araw pagkatapos makamit ng Magnolia ang huling finals berth makaraang talunin ang Phoenix Super LPG sa semis.

Ang opening ng 48th season Philippine Cup ay isasagawa sa Pebrero 28 sa halip na Marso 3, ayon pa sa PBA chief upang mabigyan pa ang Gilas Pilipinas ng karagdagang mga araw upang mapaghandaan ang OQT kung saan may apat na spots na nakataya para sa 2024 Paris Olympics. “Etong finals, dapat may gap ito ng isang araw pa. Dapat Linggo pa ito. Pero ito ay dahil sa Gilas para mapakawalan natin sa Gilas ang mga players,” paliwanag ni Marcial.