Panawagan sa COVID-19 survivors, mag-donate ng blood plasma

ni Sonny Angara - @Agarang Solusyon | July 4, 2020

Sa pamamagitan ng kolum nating ito, tayo ay mananawagan sa ating mga kapwa COVID survivors na tumulong o umagapay sa mga kababayan nating nakikipaglaban ngayon sa COVID-19.

Tulad ng inyong lingkod, tayo ay masigasig na nagdo-donate ng ating blood plasma dahil ang ating antibodies bilang survivors ng COVID-19 ay makatutulong sa COVID-19 patients na makaligtas mula sa malubhang impeksiyon. Ang prosesong ito ay sa pamamagitan ng pagsailalim ng mga pasyente sa convalescent plasma transfusion.

Bilang isa sa mga survivors ng sakit na ito, ang pangunahing naisip nating paraan upang tumanaw ng utang na loob sa ating frontliners na nagsumikap na tayo ay maisalba ay ang pagpapalaganap ng donasyon ng blood plasma mula sa mga survivor ng sakit na ito.

Ang ating tanggapan, sa tulong ng Bacolod-based web developer na Talking Myna na siyang lumikha ng website na #PlasmaNgPagasa ay nagsulong nito upang manawagan sa iba pang COVID-19 survivors na magparehistro sa mga (you can privately register with) collecting hospitals. Magligtas tayo ng buhay ng ating kapwa.

***

Tulad ng mga nauna na nating nabanggit tungkol sa digital skills na tiyak na lolobo ngayon sa ating new normal, tayo ay may bagong panukala na naglalayong mapalawak ang sakop ng pagsasanay para rito.

Ang digital skills training, bagaman naaayon sa kaalamang teknolohikal ng mga kabataan sa kasalukuyan ay maaari rin namang ibahagi sa ating seniors o mga nakatatandang populasyon. Marami sa ating senior citizens ay matatawag pang ‘able’ at may sapat pang lakas ng katawan at pag-iisip para sumabak sa ganitong sistema at makapagtrabaho sa kabila ng patuloy na pananalasa ng pandemya.

Sa ibayong dagat tulad ng bansang Sweden, sinasanay nila sa digital skills ang kanilang senior citizens. Maaari rin natin itong gawin, lalo pa’t marami pa naman sa ating senior retirees ang masasabing may kakayahan pa ring magtrabaho.

Malaki ang maitutulong ng digital careers sa senior citizens dahil sa karerang ito, hindi naman minamanduhan ang mga empleyado na mag-full-time. Maaaring nasa bahay lamang sila at doon magtrabaho kaya’t pasok din dito ang housewives o ang ating mga ginang ng tahanan.

Sa ating panukala, ang Senate Bill 1469, hinihiling natin ang suporta para mapaunlad ang digital careers dito sa atin. Ito ang nakikita nating paraan upang makapag-adjust tayo sa new normal — ang pagpapaigting sa kaalaman ng bawat isa sa takbo ng teknolohiya.

Inaasahan natin ang ilang ahensiya tulad ng Technical Education and Skills Development Authority (TESDA), Department of Education (DepEd) at Department of Information and Communications na manguna sa pagpapalaganap ng mga oportunidad na may kaugnayan sa digital skills. Kaagapay dito ang Department of Labor and Employment (DOLE) para sa job-matching task.

Ang ilan sa kilalang digital careers ay tulad ng transcription and data entry; customer service and technical support; online teaching and tutoring; content creation; digital marketing at medical coding and billing at marami pang ibang may kaugnayan sa teknolohiya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Suportahan natin ang mga lokal na produkto at maliliit na negosyo...

Sabay-sabay tayong bumangon sa panahon ng pandemya!

ni Sonny Angara - @Agarang Solusyon | June 27, 2020

Imbes na unahin ang pagpapataw ng buwis sa mga online seller, bakit hindi na lang ito mas palawigin pa? Sa ganitong paraan, mas kumbinyente para sa publiko ang pamimili ng kani-kanilang mga kailangan na hindi na kailangang magtungo pa sa mga pamilihan na maaaring maging banta pa sa kanilang kalusugan.

Matatandaan natin na nitong nakaraang linggo, lumutang ang plano ng Bureau of Internal Revenue (BIR) na patawan ng buwis ang mga online sellers.

Ang sabi nga natin, bakit ngayon pa ito naisipan ng gobyerno kung kailan nasa panahon tayo ng pandemya? May pandemic tayo at hindi nakakatulong ang ganito sa maliliit na negosyo.

Marami sa mga kababayan natin ang nawalan ng trabaho at para kumita kahit sa maliit na paraan, sumubok sila sa online selling. Huwag na nating dagdagan ang mga pasanin nila sa buhay ngayong mga panahong ito sa pamamagitan ng pagbubuwis sa kanilang maliit na kabuhayan.

At kaugnay niyan, tayo ay may panawagan sa Department of Trade and Industry (DTI) na mas palakasin ang kanilang suporta sa MSMEs o micro, small and medium enterprises. Suporta para makilala sa merkado ang kanilang mga negosyo na lubhang naapektuhan ng pandemya. Ito ay ang tulungan silang mapabilang sa online selling.

Alam naman ng lahat, tatlong buwan tayong sumailalim sa mahigpit na community quarantine, kaya ang MSMEs natin, lalo na ‘yung mga nasa indigenous community, talagang nagkalugi-lugi dahil wala na halos namimili.

Ihalimbawa na lang natin sa kanila ang mga community weaver o maghahabi sa Batangas. Paano nila maibebenta ang kanilang mga produkto ngayong wala pang panuntunan ang gobyerno na nagpapahintulot sa mga pagbiyahe? ‘Yung mga katulad nila ang ilan sa mga dapat tutukan ng DTI para naman magtuluy-tuloy ang takbo ng kanilang hanapbuhay. At dito, malaking tulong sa kanila kung masusuportahan silang mag-online selling.

Napakasakit na ang isang kulturang tulad ng paghahabi ay tatalikuran na lang dahil sa pandemya. Ang sabi raw kasi ng ating Batangas weavers, dahil hindi na bumibenta ang kanilang mga produkto ay magtitinda na lang sila ng gulay at isda. Nakakalungkot namang isipin ‘yan. Naniniwala tayo na kung patuloy na makikita ng ating mga kababayan ang mga produktong ‘yan, muli itong aalagwa.

Napakaraming sektor pangkabuhayan ang naapektuhan kaya pakiusap din natin sa DTI, maging ang mga magsasaka at mangingisda ay matulungan din. Kung ito ngang mga negosyo sa siyudad ay apektado, paano pa ang mga kabuhayan sa malalayong probinsiya?

Sana, maging ang mga kababayan nating may maliit na pangkabuhayan sa far flung areas, masuportahan din ng gobyerno sa pamamagitan ng online selling o kung hindi man ay sa iba pang mga posibleng paraan.

Masigasig ang pagsusulong natin sa kapakanan ng ating MSMEs dahil may kinalaman din ito sa adbokasiya nating mapalakas ang mga ating mga produktong lokal.

Kaya nga’t hinihikayat din natin ang DTI na patuloy na makipag-ugnayan sa e-commerce platforms tulad ng Lazada at shopinas upang manatiling available online ang ang mga produkto ng “Go Lokal”.

Hinihikayat din natin ang ating mga kababayang suki ng online sellers na suportahan din natin ang maliliit na negosyong pag-aari ng mga kapwa nating Pinoy. Bumili tayo ng kanilang mga produkto dahil sa ganitong paraan, makatutulong tayo ng malaki sa kanila lalo na ngayong panahon ng pandemya. Hindi lang kasi natin mapapalakas ang negosyo nila sa ganitong paraan, nakatutulong din tayong makalikha ng trabaho para sa mga nangangailangan. Liban pa riyan, nagkakatulungan tayong ibangon ang ating ekonomiya na dumaranas ng matinding hagupit ngayon dulot ng COVID-19 pandemic.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Class opening sa Agosto, dapat nga bang ituloy?

ni Sonny Angara - @Agarang Solusyon | June 20, 2020

Nangalahati na ang buwan ng Hunyo. Alam naman natin — ito ang buwan ng pasukan sa eskuwela lalo na sa mga pampublikong paaralan. Pero dahil sa lockdown dulot ng COVID-19, wala munang magaganap na pisikal na klase ng mga bata at ipinagpaliban ang pormal na pagbubukas nito sa buwan ng Agosto.

Pero ang tanong, handa na nga ba tayo? Isusugal ba natin ang kalusugan ng mga anak natin sa Agosto?

Sa nakalap nating datos sa mga pagdinig na isinagawa ng committee on basic education, arts and culture sa Senado, nabatid na 10 milyong mag-aaral na ang nakapagparehistro para sa school year 2020-2021.

At dahil patuloy na naka-quarantine ang mga mag-aaral, magpapatupad ang Department of Education ng iba’t ibang learning resources tulad ng DepEd Commons website kung saan 8 milyong users na ang nakapagtala rito. Kasabay nito, ilulunsad din sa mga lugar kung saan mahina ang signal ng internet ang TV at radio-based learning base sa inilalahad ng RA 8375.

Base sa batas na ito, 15% ng mga programa sa radyo at telebisyon ang ilalaan sa mga programang edukasyonal para sa mga bata. Isasailalim din sa pagsasanay ang mga guro sa ganitong sistema simula sa susunod na buwan.

At kung may ganito na rin lang naman pala tayong sistemang ipatutupad, kailangan pa bang ituloy nagpagbubukas ng klase sa Agosto? Kung tayo ang tatanungin, dahil tatlo ang ating anak na nag-aaral, para sa atin ay hindi pa hinog ang panahon para bumalik sila sa eskuwela para sa pisikal na pagdalo sa klase. Kung kakayanin naman sa online education, bakit hindi?

Sa pagtatantiya natin, maaari sigurong sumulong na tayo sa face to face classes dakong Nobyembre o kaya ay sa Enero na nang susunod na taon. Sa mga panahong ‘yan, siguro naman ay masasabi nating kahit paano ay safe na.

Sabi ng iba, parang napakadali lang sabihin ng ‘online classes’ pero ‘yung kondisyon ng internet natin, mapurol. Paano nga naman makapag-aaral online ang mga bata kung buffering lang ang internet connection nila?

Sa pagkakataong ito, napakahalagang mapabilis ang implementasyon ng RA10929 o ang Free Internet Access in Public Places Act na nag-aatas sa public education institutions, state universities and colleges at sa TESDA technology institutions na magkaroon ng libreng Wi-Fi connections.

Sana ay maging maagap ang gobyerno pagdating sa edukasyon ngayong panahon ng pandemya. Isa ito sa mga pinakanaapektuhan. Lahat ng problema tungkol dito ay dapat maresolba na sa lalong madaling panahon.

Pero hinihiling ko rin sana na kung maaari, kung hindi pa tiyak ang kaligtasan ng ating mga anak para sa pisikal na klase, huwag munang ipilit ang class opening sa Agosto. Pag-isipan at paghandaan muna nating mabuti. Tiyakin nating walang panganib para sa ating mga anak.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com