Healthcare system ng ‘Pinas, unahing palakasin!

ni Sonny Angara - @Agarang Solusyon | July 25, 2020

Dahil sa mabilis na pagdami ng mga kaso ng COVID-19 sa bansa, nasa tinatawag nang ‘danger zone’ ang mga ospital dahil sa pagdagsa ng COVID-19 patients.

Halos isang lingo na ang nakalilipas nang magdeklara ang ilan sa malalaking ospital natin tulad ng Makati Med, ang dalawang St. Luke’s Hospital (Quezon City at BGC), ang PGH, ang San Lazaro Hospital at iba pa na nasa maximum capacity na sila. Ibig sabihin, punuan na ng mga pasyente.

At itong linggong ito, maging ang mga ospital tulad ng Bataan General Hospital, Antipolo City Medical Hospital at ang NKTI ay nagdeklara na rin ng maximum capacity.

Ito ang pinakamalaking problema ngayon sa bansa — ang kapasidad ng ating healthcare system. Kaya’t kung mamarapatin ng ating gobyerno, mas bigyan muna ng prayoridad ang sistemang pangkalusugan, bago natin simulan ang pagbabangon ng ating nananamlay na ekonomiya.

Kaugnay nito, ilang panukalang-batas ang ating isinusulong ngayon tulad ng Bayanihan to Recover as One Bill o ang SB 1564. Hinihintay na lang nito ang huli at pinal na pagbasa sa Senado para tuluyang pumasa.

Pangunahing layunin ng panukalang ito na mas mapalawak pa ang ating COVID testing at makakuha ng dagdag-serbisyo ng medical technologists at iba pang health professionals na tutulong sa testing centers.

Ang isa pang panukalang-batas na itinutulak natin sa ngayon ay ang SB 1535 o ang Crushing COVID Bill na counter bill sa isinumite naming panukala ni Congw. Janette Garin sa House of Representatives.

Nilalayon naman nitong makapagtatag ng PCR testing protocols para sa mga manggagawang Pinoy na nagtataglay ng iba’t ibang karamdaman tulad ng diabetes at para sa mga indibiduwal na pumapasok sa bansa. Lahat ng magagastos ng ating mga kababayan sa testing ay babalikatin ng PhilHealth.

Mayroon din tayong proposisyon — ang eHealth System and Services Bill (SB 1472) na magsisilbi namang legal framework para sa ating telemedicine. Sa pamamagitan nito, hindi na obligado ang mga pasyente na magtungo nang personal sa kani-kanilang doktor dahil maaari na silang makapagpakonsulta via chat. Sa pamamagitan din nito ay maaaring resetahan ng doktor ang pasyente na kung tawagin ay e-prescriptions.

Walang alinlangan, mahirap na bansa lamang tayo, pero hindi kailangang maging hadlang ito upang maisulong natin ang pagpapalakas sa ating health system. Napakalahaga ng kalusugan dahil pundasyon ito ng isang tao sa kanyang pag-unlad; pundasyon ng isang bansa ang malusog na mamamayan para maging malusog din ang kanyang ekonomiya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

Sitwasyon ng COVID-19, siguraduhing tama bago isapubliko

ni Sonny Angara - @Agarang Solusyon | July 18, 2020

Nitong mga nakaraang araw, medyo nagulat tayo sa pahayag ni Health Secretary Francisco Duque III. ‘Yun ngang aking barber, parang natulala. Saan daw ba inapuhap ni Sec. Duque ‘yung pahayag niya?

Kung ating maaalala, ang sabi kasi ng ating Kalihim, “We have successfully flattened the COVID-19 curve since April.” Ang tinutukoy niya, ‘yung kurba raw ng grapiko na nagpapakita sa mabilis na galaw ng COVID cases sa bansa, pumapatag na.

Ang kaso ng COVID ngayon dito sa ating bansa, ngayong oras na tinitipa natin ang kolum na ito, pumapalo na sa mahigit 61,000 at tiyak na tataas pa sa mga susunod na araw. Hindi natin ipinapanalangin ang pagtaas, pero hindi rin magmimilagro na bigla itong bababa o titigil. Realidad lang po.

Kung ibabase natin sa mga pigurang ‘yan ang sinasabing flattened curve, parang kahit saan natin siguro sipatin, hindi natin makikita. ‘Ika nga, ‘Saang banda ‘yung sinasabing flattened’?

Ang sabi ni Sec. Duque, ito raw pahayag niyang ito ay dahil ang case doubling time at ang mortality doubling time noong Abril ay napunta sa klasipikasyong moderate o bumagal.

Sabi niya, bago raw maideklara ang ECQ, ang mga kaso ay tumataas kada dalawang araw, kumpara raw sa ngayon na sa loob daw ng 12 days saka pa lamang tumataas ang mga kaso.

Nagawa raw nating maipatag sa hanggang 220 cases per day ang COVID.

Marahil, napansin ng ating butihing kalihim na marami ang nabigla sa kanyang pahayag kaya bigla siyang kumambiyo. At ang sabi naman niya, nagkaroon ng curve “bent” ang COVID cases noong Abril dahil sa lockdown.

Ang ibig niyang sabihin, lumiko raw ‘yung kurba o bumaba ang COVID cases noong magpatupad ng lockdown ang gobyerno. Kumalma raw ‘yung bilis ng pagdami ng kaso. Pero bigla raw ulit tumaas nang mag-relax tayo ng lockdown. Ganyan ang paliwanag ng ating sekretaryo.

Siguro, kung noong mga ilang linggong nakaraan pa sinabi ni Sec. Duque ang “flattened curve”, baka may naniwala pa. Pero kung ngayon ito ipahahayag ng ating butihing kalihim, tila, nagbibigay ito ng maling impormasyon sa publiko.

Walang masama na bigyan natin ng pag-asa ang ating mga kababayan — na maging positibo sa kabila ng pandemyang ito. Pero para sa inyong lingkod, ang pagbibigay ng pag-asa sa publiko ay dapat nakabase sa katotohanan o realidad lamang. Huwag tayong magbigay ng false hope. Maging makatotohanan tayo sa pagbibigay ng impormasyon sa mamamayan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

Iprayoridad ang Informal Economy Registration and National Database Act para sa tulong-pinansiyal...

ng mga pedicab driver, magtataho at iba pa

ni Sonny Angara - @Agarang Solusyon | July 11, 2020

Bilang isa sa mga survivor ng COVID-19, tayo ay nagpapasalamat, unang-una sa ating Panginoon at siyempre, sa ating mga minamahal na doktor at nurse na sumuri at nagpagaling sa inyong lingkod.

Bagaman, dalawang beses tayong nagkaroon ng COVID-19 (‘yung pangalawa ay hindi naman masasabing malala dahil remnants o “sapal” na lamang ng virus ang nakita sa atin), ngayon ay tiniyak sa atin ng mga doktor na tayo ay tuluyan nang gumaling. Katunayan, muli tayong nag-donate ng ating blood plasma na base sa mga eksperto ay maaaring makapagligtas sa buhay ng mga kababayan nating naghihirap ngayon sa karamdamang ito.

At dahil sabi nga ng mga espesyalista na dumarami na ang mga COVID-19 patients na natutulungan ng convalescent plasma therapy, tayo ay mananawagan pa sa mga kapwa ko COVID-19 survivors. Mag-donate tayo ng ating blood plasma at magligtas ng buhay na maaaring mapahamak dahil sa virus na ito.

Para sa ilan pang kaalaman at detalye ng pagdo-donate, maaari tayong makipag-ugnayan sa plasmangpagasa.com. Sa nasabing website, maaari tayong magparehistro at piliin ang ospital na nais ninyong kumuha ng inyong donasyong blood plasma. Huwag tayong mag-alala na maikalat ang ating identity at iba pang datos, sapagkat ang ating rehistrasyon ay mananatiling pribado.

*****

Nakalulungkot isipin na nitong nakaraang tatlong buwan na walang pinagkakakitaan ang marami sa ating mga kababayan dahil sa lockdown dulot ng COVID-19 pandemic, may ilan pala sa kanila ang walang natanggap na ayuda dahil sa kawalan ng kumpletong datos ng mga kinauukulan.

Marami tayong natanggap na ulat na kabilang sa mga hindi nakatanggap ng tulong-pinansiyal tulad ng SAP ay mga manggagawa natin sa informal sector. Sila ‘yung mga magtataho, pedicab driver, vendor, etc — sila ‘yung mga walang seguridad sa trabaho at kumikita nang barya-barya. Isipin niyo, barya-baryang kita, nawala pa dahil sa lockdown. Pero kung nakatanggap man lang sana sila ng ayuda, siguro nakatulong din ito kahit paano. Pero ang kaso — wala.

Matagal na nating isinusulong ang kapakanan ng informal workers natin. Noon pang 2004 nang una nating itulak ang Magna Carta of Workers in the Informal Sector na mangangalaga sana sa kanilang kalagayan sa lipunan.

Ngayon, isinusulong naman natin sa Senado ang Senate Bill 1636 o ang panukalang Informal Economy Registration and National Database Act. Sa pamamagitan po nito, magkakaroon tayo ng kumpletong datos ng informal workers natin at sa sandaling kailangang makatanggap sila ng relief goods o anumang tulong sa gobyerno ay madali lamang silang mahahanap ng mga kinauukulan.

Kung itong mga manggagawa natin sa formal economy, dumanas din ng hirap sa kasagsagan ng lockdown — isipin naman natin kung gaano kahirap ang dinanas ng mga kababayan nating informal workers? Maliit na tulong ng gobyerno, hindi pa nila natanggap dahil hindi sila nakatala sa mga dapat matulungan.

Kaya, huwag na sana tayong maghintay ng panibagong lockdown para lang maaalala nating muli ang mga magtataho at mga pedicab driver at mga vendor natin. Dapat, magkaroon na tayo ng informal workers database sa lalong madaling panahon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com