Pinoy graduates at talents, tulungang makahanap ng local decent jobs para ‘di na mag-abroad!

ni Sonny Angara - @Agarang Solusyon | September 26, 2020

Kung talento at galing din lang ang pag-uusapan, malaki ang maibubuga nating mga Pinoy, lalo na ang henerasyon ngayon na may malawak na kaalaman sa teknolohiya at sa matataas na antas ng sining.

Pero ang masakit lang, matapos silang grumadweyt sa unibersidad at kolehiyo, mas pipiliin nilang mag-abroad dahil mas malaki ang nakikita nilang oportunidad sa ibayong-dagat.

Hahayaan na lang ba nating iba ang makinabang sa ating homegrown talents?

Para sa atin, hinog na ang panahon upang pagsikapan naman nating mapanatili sila rito at tulungang maisulong ang kanilang talento sa sariling bayan, kaysa ipirata ng mga tinatawag na “overseas headhunters.”

At bilang tayo ang chairman ng finance committee ng Senado, ipinanukala natin sa Commission on Higher Education (CHEd) at sa mga state universities and colleges (SUCs) na tutukan ang pagtulong sa iba’t ibang industriya sa bansa. Kung mas malakas ang ating mga industriya, nangangahlugan ito ng dagdag na mga trabaho. At kung makalilikha tayo ng mga trabaho, mas marami tayong kababayang matutulungan lalo na ‘yung mga bagong gradweyt. Hindi na nila kailangang magtrabaho sa abroad at mahiwalay pa sa kani-kanilang pamilya.

Pinakamarami sa kanila ay medical graduates na pinipiling mag-abroad dahil sa mas malalaking oportunidad na hindi nila nakikita sa sariling bansa.

Sana matuldukan na ang nakasanayan nating nakapagpa-graduate nga tayo ng magagaling na Pilipino, pero hindi naman natin mapakinabangan ang kanilang talento dahil mas madali silang nakakukuha ng disenteng trabaho sa abroad. Parang ipinamigay lang natin ang sariling atin.

Dahil nga rito, hiniling natin sa CHED ar sa SUCs na makipag-ugnayan sa manufacturing sector at sa 21st century industries sa paglikha ng mas maraming trabaho para sa Pilipino.

Kung ating mababatid, marami sa mga mayayamang bansa, may mga unibersidad na nagsisilbing “startup incubators” para sa mga mag-aaral nilang nagnanais maging malaking negosyante, innovators, partikular ang mga nasa sektor ng teknolohiya. At ang mga mag-aaral na ito, suportado ng public and private sector sa kanilang mga pagsisikap, matupad lang ang kanilang mga pangarap sa buhay.

Umaasa tayong may magagawang tulong ang mga nasabi nating institusyon, para maisulong ang ating panukala.

Sa ilalim ng Bayanihan to Recover as One o ang Bayanihan 2, kaukulang P3 bilyon ang inilaan sa development ng smart campuses sa mga SUC, habang umaabot naman sa P1 bilyon ang inilaan para sa Technical Education and Skills Development Authority o TESDA.

Ang mga institusyong ‘yan ang ating sandigan sa pagbibigay ng suporta, pagsasanay at tulong sa mga mag-aaral na masigasig sa pagtupad ng kanilang mga pangarap.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

Dagdag-budget para sa cash DOLE outs, ikinakasa na!

ni Sonny Angara - @Agarang Solusyon | September 19, 2020

Marami ang nagtatanong, ano raw ang programa ng gobyerno para sa mga kababayan nating mahirap para sa susunod na taon?

Aminin natin, wala pa tayong nasisilip na pag-asa na matatapos na ang COVID sa mga darating na raw. Kung pagbabasehan natin ang mga lumalabas na datos, hindi pa rin natin nakikita ang tinatawag na flat curve.

Sa pandemyang ito, numero-unong nilatay ang mahihirap nating kababayan. ‘Yung dating naghihirap na, mas lalo pang nakararanas ng dagdag-hirap ngayon dahil sa hindi normal na takbo ng ating pamumuhay. Marami ang nawalan ng trabaho, marami ang mga nagsarang kompanya.

Nitong Huwebes, natanggap natin sa Senado ang proposisyon ng iba’t ibang ahensiyang may kinalaman sa anti-poverty program hinggil sa hinihiling na dagdag budget para sa cash dole outs sa susunod na taon.

Sa proposisyon ng DSWD, NAPC o National Anti-Poverty Commission, DoLE, at iba pang ahensiya, hiniling nilang maglagak ng dagdag cash dole outs para sa pinakamahihirap na kababayan natin na ipapaloob sa P4.506 trilyong 2021 budget.

Sa pagtatala ng DSWD, posibleng pumalo sa 20 milyon ang bilang ng mahihirap na pamilya sa susunod na taon kaya’t kinakailangang may nakahandang ayuda ang gobyerno para sa kanila.

Bilang tayo ang chairman ng senate committee on finance na siyang mangunguna sa pagdinig sa national budget, pag-aaralang mabuti ng ating komite ang proposisyong ito ng mga nabanggit na ahensiya.

Maging si Senate President Tito Sotto ay umayon sa atin na kailangang balangkasin ng Mataas na Kapulungan ang panukalang ito dahil kapakanan ng naghihirap nating mga kababayan ang nakasalalay dito.

Mapapansin natin na sa mahigit P4 trilyong proposed budget ng gobyerno, walang nakapaloob na COVID-19 emergency cash assistance para sa pinakamahihirap nating kababayan.

Nabanggit din sa isang budget hearing sa Kamara ng DSWD na base sa kanilang programa, ang National Household Targeting System for Poverty Reduction, nilalayon nilang maisailalim dito ang may 16 milyong mahihirap na pamilya. Gayunman, dahil wala pang katiyakan sa COVID at patuloy itong nagpapahirap sa lahat, posibleng tumaas din ang bilang ng poorest households hanggang 20 milyon dahil marami pa rin ang patuloy na nawawalan ng trabaho.

Layunin ng programang ito ng DSWD na matukoy ang tunay na bilang ng poorest of the poor na tatanggap ng cash dole outs sa pamamagitan ng 4Ps program ng gobyerno.

At kami sa Senado, sa pangunguna ng ating komite, titiyakin nating pag-aaralan itong mabuti.

Sa panahong ito, dapat kapakanan ng mga kababayan nating halos hindi na makakain sa isang araw ang prayoridad natin. Sila ang dapat tutukan dahil sila ang talagang pinaka-apektado ng mga pangyayaring ito.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

Digital payment system, kailangan natin sa new normal; kaligtasan ng publiko, mas masisiguro

ni Sonny Angara - @Agarang Solusyon | September 13, 2020

Itong pandemyang ito, samu’t saring sakit ng ulo ang ibinigay sa mga tao. Kung anu-anong problema ang nararanasan natin mula sa pinakamaliliit hanggang sa pinakamalalaki.

At dahil nananatili ang pagpapatupad ng social distancing, isa rin sa mga nagpapahirap sa atin ang pag-a-adjust sa bagong sistema lalo na sa mga interaksiyong pinansiyal na nanganagailangan ng physical presence.

Ihalimbawa na lang natin ang pagtanggap ng tulong-pinansiyal mula sa gobyerno. Ang sistema kasi ay personal na kukunin ng mga benepisaryo ang financial assistance tulad ng SAP, kaya ang problema, mae-expose tayo sa posibleng panganib ng COVID dahil sa pagpila-pila.

Ang punto natin dito, ngayon natin kailangang maipatupad ang pagkakaroon ng digital payment system, hindi lang sa gobyerno, kundi maging sa mga pribadong sektor. Ganito rin dapat ang sistemang ipatupad sa lahat ng mga ahensiya at establisimyento para makatulong din ito sa pagsisikap nating mapababa ang pagkalat ng COVID sa bansa.

Nitong mga huling araw, nakita natin kung paanong dagsain ng mga benepisaryo ang pilahan ng distribusyon ng SAP. Hindi dapat ganito. Mismong gobyerno ang nagpapatupad ng batas sa social distancing, pero dito sa SAP distribution, hindi gumagana ang mga alituntunin dito.

Sa kasalukuyan, ayon sa datos ng Banko Sentral ng Pilipinas, napakababa ng digital payments natin lalo na sa malalayong lugar sa bansa. Ang dahilan, marami sa mga lugar na ito, walang banko o marami sa mga pamilya natin ang walang sariling bank accounts.

At dahil rito, tayo ay nagsusulong ngayon ng panukalang-batas sa Senado, ang Senate Bill 1764 o ang Use of Digital Payments Act of 2020. Sa pamamagitan nito, tiyak na mas magiging madali ang pagpapatupad ng digital payments sa lahat ng financial transactions sa iba’t ibang panig ng bansa.

Sa ilalim ng panukala nating ito, aatasan ang lahat ng ahensiya ng gobyerno, ang mga government owned and controlled corporations o GOCCs, gayundin ang lahat ng pamahalaang lokal na ipatupad ang digital payment system partikular sa pagkolekta nila ng buwis, fees, tolls, imposts at iba pang uri ng revenue. Ganitong sistema rin ang dapat pairalin sa pagbabayad ng mga bayarin, serbisyo at iba pang tulad nito.

Sa ganitong paraan, direktang matatanggap ng target recipients ang government payments sa pamamagian ng kanilang banko o digital accounts.

Kung maipatutupad ito sa lalong madaling panahon, makikita natin ang mas mabilis at mas episyenteng serbisyo para sa ating mga kababayan at siguradong hindi rin sila mae-expose sa panganib ng COVID dahil hindi na sila kailangang pumila.

Isa pa, paborable rin ang ganitong sistema sa gobyerno dahil tiyak na mas makatitipid sila ng daang milyong piso kada taon. Pero ang pinakamahalaga, nasisiguro natin ang kaligtasan ng ating mga kababayan mula sa iba’t ibang panganib tulad nga po nitong COVID-19.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co