Patuloy ang benepisyo ng mga medical frontliners kahit expired na ang bisa ng Bayanihan 2

ni Sonny Angara - @Agarang Solusyon | April 10, 2021

Bago tayo tumuloy sa ating kolum, nais muna nating kumustahin ang ating mga kababayan. Sana, patuloy tayong mag-ingat, sumunod sa health and safety protocols at sumangguni sa mga nararapat na awtoridad kung kayo ay may mga nararamdamang sintomas.

Patuloy ang pagtaas ng kaso ng COVID-19 dito sa bansa. Ramdam natin ang hirap at pagod ng ating health workers, lalo na ng mga doktor at nurses.

Noong nakaraang taon, isinabatas natin ang Bayanihan to Recover as One Act o mas kilala bilang Bayanihan 2.

Nakasaad sa batas na ang mga itinakdang benepisyo para sa ating medical frontliners at healthcare workers.

Magpapaso o matatapos ang bisa ng Bayanihan 2 ngayong Hunyo 30, 2021 kaya’t marami tayong naririnig na pag-aalala mula sa ating mga kaibigan at kakilalang healthcare workers. Ang ibig bang sabhin, kapag nag-expire na ang bisa ng Bayanihan 2 ay tapos na rin ang kanilang benefits?

Paniniguro natin sa ating medical frontliners, tuluy-tuloy ang inyong mga benepisyo kahit expired na ang bisa ng Bayanihan 2.

Malinaw na nakasaad sa nilalaman ng Bayanihan 2 na mananatili ang kanilang benepisyo habang nasasailalim ang bansa sa national emergency.

Ano ba ang mga benepisyong ito?

Kasama riyan ang P15,000 financial support sa medical frontliner na tatamaan ng mild to moderate COVID; P100,000 para naman sa severe o critical cases. At para naman sa mga medical frontliners na papanaw habang aktibo sa kanyang propesyon, ang kanyang immediate family ay tatanggap ng P1-M.

Ang probisyong ‘yan ay nariyan na sa batas mula pa noong Bayanihan 1 kaya’t patuloy lang ‘yan habang nasa health crisis tayo.

At liban sa mga kompensasyong ‘yan, mananatili rin ang iba pang benepisyo kahit paso na ang Bayanihan 2. Kabilang sa mga ito ang mga sumusunod: Buwanang special risk allowance para sa lahat ng public or private health workers na nakadetalye sa COVID patients; hazard duty pay para sa lahat ng frontline health workers; life insurance, accommodation, libreng transportasyon at pagkain para sa lahat ng public at private healthworkers, at lahat ng medical expenses ng public at private health workers na nagkasakit ng COVID at iba pang karamdaman habang nasa active duty ay sakop din ng batas na ito.

Para naman sa mga gustong malaman kung may mga healthcare workers na bang nakatanggap ng mga benepisyo — base sa report ng DOH, umaabot na sa 7,963 health care workers na nagka-COVID ang nakatanggap na ng mga nabanggit.

At dahil patuloy ang pagsisilbi ng ating health care workers sa kabila ng panganib at kahit kakagaling pa lang nila sa COVID ay diretso trabaho na, natural lang na patuloy din ang pagbibigay-benepisyo sa kanila. Ang mga tulong na ito ay maliit na bagay kumpara sa napakalaking tulong na ibinibigay nila sa atin para maisalba ang ating buhay.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Health care system palakasin; bed capacity ng mga ospital, pataasin!

ni Sonny Angara - @Agarang Solusyon | April 05, 2021

Sunud-sunod na araw nitong mga nakalipas na linggo ang pagsirit ng bilang ng mga tinamaan ng COVID-19.

Nakakagulat ang bilang. Mas matindi pa sa nakaraang taon.

Ang nakakabahala, mas may namamatay. Matindi ang mutation ng virus na ito. Parang isang tao, pinagkaisahan ng iba’t ibang uri ng COVID-19 virus. Napakasaklap.

Naririnig natin sa ating mga kaibigan at kakilala na nako-confine na miserable ang kalagayan ng mga ospital dahil kulang sa kuwarto, kulang sa hospital beds. Ang mga pasyente, sama-sama sa iisang tent o kaya naman, mga nakapila habang naghihintay ng kanilang pagkakataon.

Dahil d'yan, mananawagan tayo sa mga kinauukulan na kung maaari ay gawan ng paraan na maitaas ang bed capacities sa mga ospital. Kadalasan, tinatanggihan na ang mga pasyente dahil wala na talagang malugaran.

Nakakaawa ang mga pasyente na napipilitang itaboy ng mga ospital dahil wala na talagang mapaglagyan.

Nakaaalarma ang pahayag ni Dr. Jaime Almora, pangulo ng Philippine Hospital Association na umaapaw na sa pasyente ang mga ospital. Liban d'yan, kulang na rin sa mga doktor at nurse dahil pati sila nagkakasakit dahil overworked at ang ilan, tinatamaan din ng COVID.

Napakalala ng sitwasyon natin ngayon. Aminin man natin o hindi, parang tinatalo na tayo ng virus. Huwag naman nating hayaang magtuluy-tuloy ang panganib na ito.

Bilang chairman ng Senate Committee on Finance at bilang solidong suporta natin sa pagpapalakas ng ating health system sa pamamagitan ng budgetary interventions, ilang mahahalagang panukala rin ang isinusulong natin ngayon na may kaugnayan dito.

Nariyan ang Senate Bill 1850 o ang Healthcare Facility Augmentation Act.

Layunin ng panukala nating ito na magtatag ng mga ospital sa ating SUCs o state universities and colleges na may mga kursong medisina. At iniaatas na bawat ospital sa SUCs ay kailangang mayroong hindi bababa sa 50 hospital beds.

Ang mga ospital na ito ang magsisilbing training ground ng ating SUC medical students.

Isa pa kasing nakaaalarma ang resulta ng pag-aaral ng University of the Philippines na nagsasabing mayroon lamang tayong average of 3.7 doctors sa kada 10,000 Pilipino. Napakababa. Hindi ‘yan pasok sa inirerekomendang 10 doktor sa bawat 10,000 tao.

Nalaman din natin sa pag-aaral ng UP na mayroon lamang tayong 6.1 beds para sa 10,000 Pinoy. Pero sa NCR, mataas ang sinasabing bed capacity natin na may 13.5. Pero ngayon, dahil sa nangyayaring ito, pati naglalakihang ospital natin sa Metro Manila, wala na – punuan na.

Kaya, sana – panawagan natin sa mga kinauukulan, gawan natin ng paraan ang mga problemang ito sa lalong madaling panahon. Iligtas natin ang isa’t isa.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Reporma sa SK Law, magpapalakas sa kapangyarihan ng kabataan

ni Sonny Angara - @Agarang Solusyon | March 27, 2021

‘Ika nga ng ating Pambansang Bayani na si Dr. Jose Rizal, ang kabataan ang pag-asa ng bayan.

Kung gayun, hindi dapat sila isinasantabi — hindi dapat sila binabalewala at dapat binibigyang-pagkakataong makapaglingkod at tumulong sa pagpapaunlad ng ating bayan.

At ang tanging paraan, bigyan sila ng pagkakataong tuparin ang mga adhikaing ito.

Bilang chairman ng Committee on Youth sa Senado, masigasig nating itinutulak ang panukalang nagpapalakas sa kapangyarihan ng Sangguniang Kabataan (SK). Sa pamamagitan niyan, masisiguro nating sila ay diringgin, kikilalanin at maikakatawan sa bawat pagpupunyagi ng ating bansa.

Sa ating konsultasyon sa iba’t ibang sangay ng gobyerno at mga pribadong sektor, binigyang-diin ang kahalagahan ng kabataan, lalo na bilang bahagi ng elektorado at ang kakayahan nila sa pagpapalakas ng ating lipunan.

Ano nga ba ang dapat baguhin sa umiiral na batas ng Sangguniang Kabataan?

Marami tayong natatanggap na reklamo mula sa SK officers dahil base sa kasalukyang batas, ang mga SK staff tulad ng SK Secretary, SK treasurer na nagpapakapagod sa pagtratrabaho ay wala palang natatanggap na anumang kompensasyon.

Sa ating panukala, papayagan natin ang SK na gamitin ang ilang bahagi ng kanilang pondo upang may maipangsuweldo o maipang-allowance sa mga nabanggit nating opisyal.

Upang mas maliwanag, sa ilalim ng ating panukala, bibigyan ng buwanang honoraria ang SK members mula sa SK Funds [CAA1]. Ang prosesong ito ay isasailalim sa panuntunang ipinatutupad ng DBM.

Kailangan ding ang alokasyon ay hindi hihigit sa 25% ng kabuuang pondo na inilaan sa SK. Sa pamamagitan naman ng local ordinance ng local government unit, ang kanilang SK chairman, maging ang mga tauhan nito ay maaari ring tumanggap ng karagdagang honorarium mula sa kanilang pamahalaang lokal.

At dahil kritikal ang posisyon ng SK Treasurer, mayroon tayong karagdagang kuwalipikasyon. Dapat nakapagtapos ito ng alinman sa mga kursong ito: Business Administration, Accountancy, Finance, Economics at Bookkeeping. At lahat ng SK Treasurers ay inaatasan munang mag-training ng Bookkeeping sa TESDA bago tuluyang umupo sa puwesto.

Tungkol naman sa mga panuntunan sa SK Funds, dapat targeted ang paggagamitan nito tulad ng student stipends, books, educational allowances at iba pang may kinalaman sa pag-aaral ng estudyante.

Sa ilalim pa rin ng ating panukala, may mga dagdag-pribilehiyo ang SK officials tulad ng: Hindi na sila kailangang kumuha ng anumang National Service Training Program o NSTP; may civil service eligibility sa kondisyong natapos ng opisyal ang kanyang buong termino.

Anumang reporma sa ating lipunan ay hindi natatapos sa iglap. Mahabang proseso ito na kung susuriing mabuti — parang walang katapusan at marami pang dapat tutukan. At isa ang sektor ng kabataan sa maaaring umagapay sa atin tungo sa tagumpay at maunlad na bayan sa darating na panahon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com