Alamin ang dahilan kung bakit delayed ang PhilHealth sa pagbabayad ng hospital claims

ni Sonny Angara - @Agarang Solusyon | August 07, 2021

Sa ngayon, patuloy ang pagtaas ng bilang ng mga apektado ng Delta variant ng COVID-19 sa buong globa at isa ang Pilipinas sa mga sinasalanta nito sa kasalukuyan. Hindi pa man masasabing malaki na ang bilang dito sa atin, hindi naman dapat pang hintayin — dapat na itong agapan. At ang tanging maaasahan natin sa pag-combat sa pagkalat nito — ang ating mga pagamutan o ospital.

Nakalulungkot lang na hanggang ngayon ay patuloy palang nakatengga ang mga bayarin ng PhilHealth sa hospital claims ng iba’t ibang public at private hospitals sa bansa.

Hindi biro ang bilis ng pagkalat ng Delta variant at posibleng gumawa na naman ito ng malaking problema sa mga susunod na araw. Hanggang ngayon, hindi pa nakare-recover ang mga ospital sa sunud-sunod na kaso ng klasikong uri ng COVID-19, pero nagbabanta na ang Delta variant.

At ano ang maaaring sagot dito? Ang maayos na pasilidad, kahandaan, at kapasidad ng ating mga ospital. Pero, paano nila mapopondohan ang kanilang mga pangangailangan kung hanggang ngayon, nagkukulang sila sa budget dahil sa napakalaking utang ng gobyerno sa kanila. Bilyun-bilyon na pala ang bayarin ng PhilHealth sa hospital claims!

Sa krisis pangkalusugan na kinahaharap natin ngayon, hindi dapat nagkakaroon ng ganitong problema ang ating mga ospital. Higit kailanman, sila ang dapat “pinakaarmado” sa laban nating ito. Pero, paano natin sila masasandigan kung sila mismo ay mahina?

Napakasakit marinig na dahil sa kakulangan ng budget, napipilitan ang mga ospital na magbawas ng bed capacity at working hours. Ito pa naman ang mahahalagang aspeto ng ating mga pagamutan.

Noong Mayo, isiniwalat ng Philippine Hospital Association na ang hospital claims ng kanilang organisasyon sa PhilHealth ay nagkakahalaga nang mula P50 milyon hanggang P700 milyon. Isang member hospital pa nga umano ang nagsabing umabot na sa P1.2 bilyon ang kanilang unpaid claim.

Ganito rin ang problema ng Private Hospitals Association of the Philippines, Inc. o PHAPI. Umabot na raw kasi sa P28 bilyon ang dapat bayaran sa kanila ng PhilHealth sa hospital claims.

Sabi ni PhilHealth President and CEO Dante Gierran, kaya nangyari ‘yan ay dahil na rin sa pandemic. Hindi kasi naging maayos ang kanilang pagproseso ngayon dahil apektado ang kanilang workforce at kulang sila sa personnel.

Sabihin na nating totoo ang katwiran ni G. Gierran. Pero mas mahalaga ang kapakanan ng mamamayan dahil sa banta ng mapanganib na Delta variant. Dapat nilang gawan ng paraan ‘yan at huwag magmukmok sa katwirang “kulang kami sa tao na magproproseso.” Ilang buwan din naman tayong nagluwag sa mga restriksiyon dahil wala pa ang Delta variant noon. Bakit hindi naasikaso?

Sa ngayon, may isinusulong tayong resolusyon sa Senado. Ang Senate Resolution 774 na naglalayong alamin at silipin kung ano ang totoong dahilan ng PhilHealth sa pagka-delay ng pagbabayad nila sa hospital claims.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Kung walang pondo, hanggang pangarap na lang ang pagbangon

ni Sonny Angara - @Agarang Solusyon | July 31, 2021

Kamakailan ay nairaos ang huling SONA ni Pangulong Rodrigo Duterte. Sa kabila ng limitadong presensiya ng mga mambabatas, naitaguyod pa rin ang huling ulat sa bayan ng ating Punung-Ehekutibo.

At tulad nang nakagawian — inilatag niya ang lahat ng naging tagumpay ng kanyang administrasyon, gayundin ang mga maaari pa niyang gawin sa natitirang isang taon sa kanyang posisyon.

Kabilang sa mga binanggit ng ating Pangulo ang mga plano ng gobyerno para sa pagbangon ng ekonomiya sa susunod na taon.

Nararapat lang naman na malaking bahagi ng 2022 national budget ay ibuhos sa national recovery kahit patuloy pa rin tayong hinahagupit ng pandemya. Ito ay para maibangon na ang ating ekonomiya at makontrol ang patuloy na pagsadad ng ating kabuhayan.

Sa dami ng mga inilatag na plano ng Pangulo, dapat maisakatuparan ‘yan sa budget proposal na ihahatag ng Palasyo sa Kongreso. Kung walang kaukulang pondo ang pinapangarap nating pagbangon, mananatili na lang sigurong pangarap ‘yan. At kawawa ang mamamayan.

Magsisilbing “down payment” para sa hinahangad nating pagbangon ang maaaprubahang 2022 National Budget kaya’t sana naman — ituon ito sa mga pinakakritikal na programa at ‘yan ay pinangungunahan ng ating COVID-19 response.

Mahigit 300-araw na lang ang natitira sa panahon ng panunungkulan ni Pangulong Duterte. Sana ay magamit ito ng administrasyon at ng mga kinauukulan sa mas mabilis na pagkilos para maipatupad ang mga programang magbabangon sa ating lahat mula sa pandemyang ‘to.

◘◘◘

VIRAL ngayon ang pagkapanalo ng magiting na si Hidilyn Diaz sa weightlifting women’s category sa Tokyo Olympics. Siya ang kauna-unahang Pinoy athlete na nakasungkit ng gintong medalya. At umaasa tayong sa mga susunod na araw, marami pa sa ating mga atleta ang kukubra ng medalya — ginto man ‘yan, pilak o tanso. Ang mahalaga, ibinigay nila ang sapat na kakayahan.

Sa panalong ito ni Hidilyn, ‘matik na tatanggap siya mula sa gobyerno ng P10-M base sa isinasaad ng RA 10699 o ang National Athletes and Coaches Incentives Act of 2015. At maliban d’yan, tatanggap din siya ng Olympic Gold Medal of Valor mula sa Philippine Sports Commission.

Sa kabuuan, tatanggap si Hidilyn ng higit P30-milyon, kasama ang mga gantimpalang magmumula sa iba’t ibang sponsor na kinabibilangan ng bahay at condominium unit.

Sa kanyang video courtesy call sa Pangulo, igagawad din sa kanya ang Presidential Medal of Merit.

Dahil dito, tayo ay nagpapahatid ng taos-pusong “congratulations” kay Miss Hidilyn Diaz. Isa kang alamat! Mabuhay ka!

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Disente, maayos na living facilities, ibigay sa mga guro

ni Sonny Angara - @Agarang Solusyon | July 24, 2021

Ilang ulit na ba nating nasaksihan ang patotoo ng ilang public school teachers, lalo na sa malalayong lalawigan at lugar kung paano nilang sinasagupa ang panganib sa araw-araw, makapasok lang sa trabaho at makapagturo?

Sa napakaraming dokumentaryo na napanood na natin na nagpapakita sa tunay na sitwasyon ng public school teachers, ano pa ang puwede nating idagdag na tulong sa kanila liban sa mga umiiral na benepisyo sa ngayon?

Tuldukan na sana ‘yung nakikita nating teachers na tumatawid ng bundok sa kasukalan, halos malubog sa mapuputik na daan, nanganganib na malunod sa malalawak na ilog sakay ng mga lumang bangka, makapasok lang sa paaralan at makatupad sa kanilang tungkulin bilang teachers. Kung mayroon lamang silang libreng matitirhan sa mga lugar kung saan sila nagtuturo, hindi sana nila sasapitin ang ganitong paghihirap.

Kahit ang mga guro natin sa mga kalunsuran, hindi man nila nararanasan ang hirap na dinaranas ng mga teachers sa baryo at bundok, naroon pa rin ang panganib sa pang-araw-araw na pagko-commute dahil lantad sila sa banta ng COVID. Isa pa, kumakain din ng napakalaking oras nila ang maipit sa masikip na daloy ng trapiko.

Upang makatulong, isang panukalang-batas ang isinusulong natin ngayon sa Senado: ang Senate Bill 2317 o ang Teachers’ Home in School Act, na naglalayong magbigay ng maayos na pansamantalang tirahan sa mga guro. Maaaring ang mga ito ay nasa bisinidad ng paaralan kung saan sila nagtuturo, o kaya naman ay sa mismong lugar kung saan naroon ang kanilang pinapasukang eskuwelahan.

Sakop ng panukala nating ito ang public school teachers na nagtuturo sa malalayong lugar, gayundin ang teachers na naaabala dahil sa mahirap na pagbibiyahe sa araw-araw.

Inaatasan sa ilalim ng panukala ang Department of Education at ang Department of Public Works and Highways, na manguna sa konstruksyon ng living facilities na ito na popondohan ng DepEd.

Sakali mang mangailangan ng karagdagang pondo, maaari namang makuha ang additional funding sa Special Education Fund na nagmumula sa property tax collection ng local government kung saan itatayo ang living facilities.

Kahit sino sigurong guro na dumaranas ng matinding hirap makapasok lang sa trabaho, matutuwa sakaling magkaroon sila ng pansamantalang matutuluyan malapit sa paaralang kanilang pinagtuturuan.

Pagbibigay-galang ito sa kanilang propesyon na napakahalaga para sa ating mga anak.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com