Pautang mula sa SBCorp, makakatulong sa sektor ng turismo

ni Sonny Angara - @Agarang Solusyon | March 19, 2022

Tuluy-tuloy ang pagbaba ng mga kaso ng COVID-19 sa bansa. At sana nga, huwag na itong magbago para tuluyan naman tayong makabangon.

Marami sa mga negosyo ang talagang hinagupit ng pandemya, marami ang nawalan ng trabaho at napakaraming sektor ang nalumpo at ngayon ay nagsisikap na makabawi sa abot ng kanilang kakayahan. At kabilang sa mga ito ang turismo at ang maliliit na negosyo o ang micro, small and medium enterprises (MSMEs).

Sa Senado, nagsilbi po tayong sponsor ng Bayanihan 2 o ang Bayanihan to Recover As One Act kung saan kabilang sa mga inaprubahang pondo ang may P10B ipapasok sa Small Business Corporation o SBCorp. Ang naturang halaga ay para mapautang ang tourism sector at ang MSMEs na kapwa dumanas ng pinakamatinding hirap sa pandemya.

Nang mag-expire ang B2, kasama ring nagpaso ang mga pondong nakapaloob dito, pero hindi ang nasa SBCorp, dahil naging bahagi na ito ng pondo ng korporasyon na pingangasiwaan ng Department of Trade and Industry (DTI).

Halagang P4B sa nasabing halaga ang maaaring ipautang ng SBCorp sa sektor ng turismo, pero nagpahayag ang korporasyon na mula nang mailagak sa kanila ang naturang alokasyon ay P278 milyon pa lamang ang naipapautang nila sa sektor.

Gayunman, sinabi nila na nasa proseso na ang may P524 milyon pang loan applications.

Nangangahulugan na malaking pondo pa ang hindi nagagamit ng korporasyon para sa pagpapautang. Ang pondo para naman sa pagpapautang sa MSMEs, ayon sa SBCorp ay naipalabas nang lahat.

Nagdadalawang-isip kasi ang tourism sector na mangutang dahil sa pangambang posibleng hindi pa rin sila kumita, dahil nga sa paiba-ibang klasipikasyon ng quarantine status nitong nakaraang dalawang taon.

Pero ngayong unti-unti na tayong umaalagwa at binuksan na rin ng gobyerno ang turismo para sa mga lokal at dayuhang turista, posibleng kahit paano ay may masasandigan na sila sa kanilang pagbangon. Malaking factor din na milyun-milyong Pinoy at dayuhan na ang bakunado kaya’t mas malaya na ang takbo ng tourism industry dahil dito.

At dito na maaaring magamit ang unused funds na nakapaloob sa SBCorp para mas matulungan ang tourism sector sa hangad nilang bumangon at muling magpalakas.

Nagluwag ang IATF sa mga regulasyon kaugnay sa foreign tourist arrivals, pero mahigpit na ipinatutupad na kailangang kumpleto sa bakuna ang mga dayuhang papasok sa bansa at kailangang makapagprisenta ng negative result ng kanilang COVID test at 24-hour result ng laboratory-based antigen test.

Napakahalaga pong makabangon na ang tourism industry para makabawi ang economic status ng mga pamahalaang lokal, at ang mga manggagawa ng sektor. Kaya’t hinihikayat natin ang SBCorp at ang DOT na makipag-alam sa mga operators na nangangailangan ng tulong pinansiyal para maipagpatuloy na ang kanilang operasyon sa lalong madaling panahon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

PDIC charter amendments, magbibigay-proteksiyon sa banking system ng ‘Pinas

ni Sonny Angara - @Agarang Solusyon | February 26, 2022

Pagpapalakas, mas pinaigting na proteksiyon at iwas-problema sa banking system sa bansa ang pangunahing layunin natin sa isinulong na pag-amyenda sa Philippine Deposit Insurance Corp., charter.

Sa ngayon, matapos pumasa sa Mataas na Kapulungan ang panukala, kung saan tayo ang pangunahing awtor at tumayong sponsor sa Senado, naghihintay na lamang ito ng lagda ng Pangulo at tuluyan nang magiging batas.

Sa sandaling mapagtibay at maisabatas, mas magiging epektibo ang koordinasyon sa pagitan ng PDIC na siyang nakatoka sa insurance ng bank deposits at ng Bangko Sentral ng Pilipinas (BSP) na siya namang nagpapatupad ng ating monetary policy at nangangasiwa sa lahat ng bangko sa bansa.

Sa ilalim ng reconciled version ng PDIC amendments, ang BSP Governor ay siya na ring tatayong chairman ng ng PDIC board, habang ang kalihim ng Department of Finance na dati-rati’y ex-officio chairperson ng PDIC Board ay magsisilbi ng vice-chairperson.

Pinag-aralan natin ito sa ating komite, ang Senate Committee on Finance para masigurong may koordinasyon o pagkakaunawaan ang dalawang ahensiya at matiyak din na walang saklaw ng trabaho. Kumbaga, ang iiwasan dito ay ang pagdoble ng trabaho.

Isinama rin natin sa mga inamyendahang bahagi ng batas ang mga Islamic banks na sakop ng PDIC, base sa isinasaad ng RA 11439 o ang batas na nakatuon sa regulation at organization ng Islamic banks.

Maaari rin namang magtatag ng hiwalay na insurance funds and arrangements ang PDIC bilang konsiderasyon sa mga ipinatutupad na batas ng Islamic banking.

Sa kasalukuyan, ipagpapatuloy ng PDIC ang pagpapatupad ng P500,000 insurance sa monetary deposits. Pero sa sandaling pagtibayin ng Pangulo ang ating panukala, maaari nang itaas ng PDIC board ang maximum deposit insurance coverage base sa halagang naka-index sa inflation o bilang konsiderasyon sa iba pang economic indicators.

Binibigyang-diin pa rin natin dito ang pag-aatas sa PDIC board na repasuhin ang maximum deposit insurance kada tatlong taon. Ang bank records ay maaari lamang busisiin kung may bahid ng anomalya o hindi ligtas ang bank deposits.

Sa ilalim pa rin ng ating panukala, pinapayagan ang PDIC na i-convert sa cash ang assets ng nagsarang bangko once a bank is under receivership. Pinapayagan din dito ang PDIC na ibenta ang mga asset sa Financial Institutions Strategic Transfer Corporation na ibabase pa rin sa umiiral na banking laws.

Pangunahing layunin kasi natin sa panukalang ito na mapalakas at mas maging matatag ang ating banking system. Tandaan natin, sa mga darating na panahon, ang prayoridad ng gobyerno ay maibangon ang ekonomiya ng Pilipinas mula sa hagupit ng pandemya. At dahil dito, malaki ang gagampanang papel ng ating banking sector.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

EDCOM 2, napapanahon na!

ni Sonny Angara - @Agarang Solusyon | February 19, 2022

Pinayagan kamakailan ng Department of Education ang kanilang regional units na nasasailalim sa Alert Levels 1 and 2 na mapalawak na ang pagpapatupad ng face-to-face classes at dagdagan ang mga baitang na maaari nang sumabak sa normal na sistema.

Sa datos ng DepEd, tinatayang 304 na paaralan ang maaari nang magpatupad ng face-to-face classes, lalo pa’t tuluy-tuloy din naman ang pagbabakuna sa mga bata. Ang isa lang sa mga problema sa kasalukuyan ay kung paano maisasama sa F2F ang may 47,000 public schools, 12,000 private schools at ang mahigit pang 200 public universities sa bansa.

Maraming estudyante, ayon sa pag-aaral ang nagkaroong ng learning difficulties ngayong pandemya dahil sa mga posibleng dahilan tulad ng kakulangan ng gadgets, tulad ng mobile phones, laptop o anumang kagamitan na naaangkop sa online learning.

Isa pang problema ay ang hindi tiyak na uri ng sistemang pang-edukasyon na naghihintay sa ating mga mag-aaral sa kanilang pagbabalik-paaralan. Dahil sa dalawang taong online classes at distant learning system, posibleng kailanganin ang epektibong paraan para makahabol pa sa kanilang mga asignatura ang mga bata.

Noong July 2021, sa pag-aaral ng Movement for Safe, Equitable, Quality, and Relevant Education, nabatid nila mula sa pag-survey sa may 1,299 estudyante na kakaunti lamang sa kanila ang may natutunan sa distant learning, kumpara sa normal na paraan ng pag-aaral.

Noon namang Nobyembre noong nakaraang taon, iniulat ng World Bank na 90 porsiyento ng mga batang Pinoy na may edad 10 ang posibleng mabaon sa “learning poverty”dahil sa kawalan ng kakayahang makapagbasa at kakulangan ng tamang pang-unawa sa kanyang mga binabasa, dahil sa tagal na napirmi lamang ito sa bahay dulot ng pandemya.

Sa katunayan, sa mga nakaraang academic performance surveys na kinabibilangan ng Pilipinas, lahat ay sadsad ang resulta para sa ating mga kinatawan. Ito ang dahilan upang itulak naming Senado, kasama sina Senate Minority Leader Frank Drilon, Basic and Higher Education Committee chairpersons Sherwin Gatchalian at Joel Villanueva, Senators Grace Poe at Imee Marcos ang resolusyon na humihikayat sa pagtatatag ng Congressional Commission on Education o EDCOM.

Maihahalintulad ito sa komisyong pinamunuan ng ating yumaong ama na si dating Senate President Edgardo Angara noong 1989 na ang layunin ay suriin ang kasalukuyang estado ng ating education system.

At bago nag-recess ang Senado ngayong buwan, ipinasa natin at ng ating mga kasamahan ang paglikha ng EDCOM 2 na principally sponsored ng ating seatmate at kaibigang si Senator Win Gatchalian.

Lagda na lamang ng Pangulo at tiyak na makatutulong nang malaki ang panukalang ito sa mga darating pang henerasyon ng mga mag-aaral.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com