Hindi tatanggalin ang K-12, ire-review lang

ni Sonny Angara - @Agarang Solusyon | June 25, 2022

Plano ni President-elect Ferdinand “Bongbong” Marcos, Jr., na ipa-repaso sa Department of Education sa ilalim ng bagong Education Secretary at VP-elect Sara Duterte ang programang K-12 ng gobyerno.

Sa totoo lang, pabor tayo rito, gayundin ang ilang kasamahan natin sa Senado, tulad nina Sens. Win Gatchalian at Chiz Escudero.

Pero para mas malinaw — hindi hangarin dito na baklasin ang K-12 program, kundi rebyuhin at mas mapahusay ang implementasyon nito. At siyempre, para mabigyan din ng sapat na pondo.

Dapat masilip kung natupad ba ang mga pangako ng programa, tulad ng pagkakaroon ng maayos na Science track or Arts and Sports track para sa mga nasa Grades 11 and 12. Sa totoo lang, hindi ‘yan nakikita sa iba’t ibang bahagi ng bansa kaya panahon na talaga para repasuhin ang pagpapatupad ng K-12.

Suhestiyon naman ng ating kaibigan at seatmate sa Senado na si Sen. Win, repasuhin din ang isa sa mga pangako ng K-12 na maaari nang makapag-apply ng trabaho ang K-12 graduates. Lahat kasi ng mga kumpanya ay college graduates pa rin ang mas paborable. Nag-aalangan kasi sila sa mga training at antas ng kaalaman ng K-12 graduates.

Maraming kuwestiyon na maaaring masagot sa pagrepaso ng programang ito ng gobyerno sa ilalim ng bagong administrasyon.

◘◘◘

At kaugnay naman sa pansamantalang pag-upo ni President-elect BBM bilang Agriculture secretary, wala tayong nakikitang problema rito. That’s his prerogative. At isa pa, marami rin tayong kasamahan sa Senado na aprub sa hakbang na ito ng susunod na punong-ehekutibo.

Dito kasi, nakikita natin ang sinseridad ng bagong pangulo na lutasin ang mga problemang kinahaharap ng sektor agrikultura, lalo na ang seguridad sa pagkain. Bentahe ito sa agriculture department dahil posibleng mas magiging madali na sa ahensya na makuha ang suporta ng gobyerno, lalo na pagdating sa pondo.

At umaasa rin tayo na ang mga ahensya na nasa ilalim ng pangasiwaan ng DA ay makipagtulungan din sa bagong pangulo para masigurong mailigtas natin ang agriculture sector mula sa krisis na pinagdaraan nito ngayon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Patuloy nating suportahan ang ating mga atleta

ni Sonny Angara - @Agarang Solusyon | June 11, 2022

Kabuuang 226 na medalya ang nahakot ng Pilipinas sa nakaraang 31st SEA Games sa Hanoi, Vietnam. At maganda pa riyan, pang-apat tayo sa overall standing.

Kung ikukumpara natin ang tikas ng Pilipinas noong ginanap ang 22nd SEA Games sa Hanoi, may halos dalawang dekada na ang nakararaan, iba ang gilas natin sa kasalukuyan. Mas brusko. Mas malakas. Mas handa. Lumalaban.

Nitong nakaraang SEA Games, nakakuha tayo ng 26 medalya sa Athletics kung saan 5 ang ginto, 7 ang silver at 14 bronze. Sa Gymnastics naman, nakakuha tayo ng 14 medals (7 Gold, 4 Silver, and 3 Bronze), sa Dancesport, 12 medals (5 Gold, 5 Silver, and 2 Bronze) at sa Wrestling 12 na medalya rin (7 Silver and 5 Bronze).

Iba ang ipinakitang husay ngayon ng ating mga atleta. Kulang ang mga papuri para ipakita natin sa kanila na ipinagmamalaki natin ang kanilang ipinakitang pagsisikap. Sa opening ceremonies pa lang, nagbadya na ng malaking laban ang ‘Pinas dahil unang sargo pa lang, ginto na agad ang nasungkit natin dahil si Francine Padios ay kumana agad ng ginto sa Pencak Silat Women’s Artistic Single event.

Matagal din tayong dumanas ng tagtuyot sa medalya at dito nga sa ginanap na SEA Games, hindi lang tayo humakot ng medalya, nakapag-break pa tayo ng record, lalo na sa estado ng napakagaling na pole vaulter na si EJ Obiena. Nakapagtala si EJ ng bagong record sa SEA Games men’s pole vault record sa one take lang, ang weightlifter namang si Vanessa Sarno, inungusan niya ang lahat ng SEA Games records sa women’s 71kg event. Sa swimming naman, breaking the record din si Jess Geriane nang matapos niya sa 29.38 seconds lang ang women’s 50-meter backstroke.

Tinapos din ni Chloe Isleta ang gold medal drought ng Pilipinas sa swimming, women’s division. Maging ang Philippine bowling team na binubuo nina Merwin Tan, Patrick Neil Nuqui, Ivan Dominic Malig, and Christian Dychangco, naging daan din para muli tayong magkamit ng medalya sa bowling sa loob ng 11 taong paghihintay. Mas matindi sa Philippine Women’s Football Team dahil 37 taon tayong naghintay na magkamit ng medalya na naisakatuparan ng talunin ng ating koponan ang Myanmar para sa bronze medal.

Ang Olympian na si Carlos Yulo nagpakita ng isa na namang masterclass performance sa gymnastics matapos magwagi ng 5 ginto at 2 silver medals.

Iba rin ang ipinakitang galing ng 51-anyos na Army personnel na si Richard Gonzales sa men’s table tennis at makapanalo ng silver medal para sa bansa.

Matindi ang karangalang dala ng mga atletang Pinoy sa katatapos na SEA Games, kaya’t dapat lang naman na bigyan sila ng pabuya bilang pagkilala sa ipinamalas nilang galing. Ito ang dahilan kung bakit tumayo tayong sponsor ng RA 10699 of 2015, kung saan itinaas ang mga matatanggap na incentives ng national athletes and coaches.

Sa ilalim ng batas na ito, ang magwawaging atleta sa SEA Games ay tatanggap ng cash incentives mula sa halagang P60,000 hanggang P300,000, depende sa kanilang napanalunan.

Ang kani-kanilang coach naman ay tatanggap ng cash incentive na katumbas ng 50 percent ng cash reward na matatanggap ng manlalaro na nagwagi ng anumang medalya (gold, silver, bronze). Ang mga atleta naman na mas naungusan ang dati nilang record sa nilahukang kompetisyon ay tatanggap ng cash incentives na idedeklara ng Philippine Sports Commission (PSC). Kaugnay nito, nag-file rin tayo ng panibagong panukala — ang Senate Bill 1225 na mas lalo pang nagpapataas sa cash incentives na ibibigay sa ating mga atleta at coaches. Sa pagpasok ng bagong Kongreso (19th Congress), muli nating isusulong ang panukalang ito sa layuning mas mabigyan natin ng inspirasyon at motibasyon ang ating mga manlalaro at mapanatili ang kanilang momentum sa ipinakita nilang kakaibang gilas nitong katatapos na international competition.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Administrasyong Marcos, dapat ipagpatuloy ang daratnang economic policies ng gobyerno

ni Sonny Angara - @Agarang Solusyon | June 4, 2022

Halos mag-iisang buwan na mula nang sumailalim sa pambansang halalan ang Pilipinas. Kung nanalo ang mga ibinoto mo, congratulations. Pero kung hindi naman, ang masasabi lang natin, may mga darating pa namang eleksyon. Kung hindi ngayon, maaaring sa mga susunod na panahon.

Ano nga ba ang nangyayari sa atin pagkatapos ng eleksyon? Maliban sa naghihintay tayo ng pormal na salin-kapangyarihan, magkakaiba ang emosyon ng publiko: merong masaya at nag-aabang ng mga susunod na pangyayari at meron namang nakaramdam ng lungkot o parang pagkabigo.

Marami ang nagtatanong sa inyong lingkod kung ano ang mga posibleng mangyari sa Pilipinas sa mga darating na araw, base sa naging resulta ng halalan. Alam n’yo, hindi na bago sa atin ang mga panahon ng kampanya, lalo pa’t tayo ay nasa public service rin. Apat na pambansang halalan, kung saan kumandidato ang namayapa nating ama ang napagdaanan natin at nang pumasok nga tayo sa pulitika, sumabak din tayo sa napakahirap na kampanya.

At kahit pa dumaan tayo sa mga ganyang karanasan, hindi rin naman natin masasabing eksperto na tayo sa mga ganyang usapin — na kaya nating ipaliwanag lahat ang tungkol sa mundo ng pulitika lalo pa’t napaliligiran tayo ngayon ng iba’t ibang uri ng propaganda, social media at impormasyong kailangan nating suriing mabuti kung tama ba o mali.

Iisa lang naman ang hindi nabago sa pagdaan ng tatlong presidente — mula sa panahon ni dating Pangulong Gloria Arroyo, Noynoy Aquino at Rodrigo Duterte — ang ating economic policies. At dahil d’yan, nakapagpatupad ang gobyerno ng iba’t ibang reporma na nagpaangat sa bansa, kaagapay ang long-term investments sa ating mamamayan.

Nagsimula ito sa panahon ni dating Pangulong Gloria Arroyo — nang matagumpay niyang maisabatas ang mahihirap na fiscal reforms tulad ng E-Vat noong 2005 — panahon na dinaranas pa ng bansa ang epekto ng Asian Financial Crisis, kung saan ang consolidated budget deficit ay tumaas mula 1% ng ating Gross Domestic Product noong 1997 hanggang 5.8% noong 2003. Ang public debt and contingent liabilities natin ay umabot nang hanggang 13% ng ating GDP at higit sa lahat, tinatayang 30 porsiyento ng lahat ng ating government revenues ay ibinuhos sa pagbabayad ng interes sa ating mga utang, sa halip na ipinondo sa iba pang mga prayoridad ng pamahalaan.

Pikit-matang ipinatupad ng gobyernong Arroyo ang pagsasabatas ng mga bagong buwis dahil batid niyang hindi popular sa publiko ang bagay na ito. Pero sa kabila ng lahat, sa kanyang pagbaba sa puwesto, naging magandang pundasyon ang new taxes sa pagpasok naman ng administrasyon ni ex-P-Noy noong 2010. Nagamit ang kinita sa mga bagong buwis para sa edukasyon, kalusugan at imprastruktura.

Sa pag-upo naman ni ex-P-Noy, napalakas niya ang fiscal affairs ng gobyerno sa pamamagitan ng pagsasabatas sa ilang sin taxes na nakatulong din sa pagpapalawak sa PhilHealth coverage para sa mas maraming Pinoy. Sa panahon din ni ex-P-Noy mas naging bukas sa publiko ang tax laws.

Sa pagdating naman ng administrasyong Duterte, ipinagpatuloy ang mga naiwang improved revenues ng Aquino administration. Patunay d’yan ang naging paborableng epekto ng comprehensive tax reform packages. Naging daan ito upang mapondohan ang mahahalagang proyekto at programa ng pamahalaang Duterte, tulad ng Universal Access to Quality Tertiary Education Act o libreng pag-aaral ng kolehiyo sa state colleges and universities at ang Universal Healthcare Act na nagbibigay ng health insurance coverage sa lahat ng Pilipino, bagaman hindi pa ito lubusang naipatutupad sa kasalukuyan.

Dahil sa napakagaling na pangangasiwa sa macroeconomic affairs ng bansa sa loob ng dalawang dekada, 10-15 porsiyento na lamang ng ating national budget ang napupunta sa pagbabayad ng utang at ngayon ay nananatili tayong may good credit ratings.

Sinasabi natin ang mga bagay na ito, hindi para ipaniwala sa lahat na wala na tayong kakaharaping problema sa mga darating na araw sa ilalim ng bagong administrasyon.

Pero kung susuriin natin ang mga napiling economic managers ng incoming Marcos administration, may nakikita tayong pag-asa na hindi maliligwak ang ekonomiya ng Pilipinas. Tiwala lang.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com