Dapat lumikha pa ang gobyerno ng trabahong may malaking suweldo

ni Sonny Angara - @Agarang Solusyon | August 27, 2022

Sa kasalukuyan, palawak nang palawak ang trade deficit na nakakaapekto sa takbo ng ating ekonomiya. Sa ating palagay, kailangang-kailangang mapagtuunan ng pansin ng gobyerno ang assessment sa mga industriya at matulungan silang mas lumakas.

Sa ngayon, hindi talaga kagandahan ang lagay ng budget deficit, kumpara sa mga kapitbahay nating Vietnam at Indonesia na may surpluses.

Kamakailan, nakaharap natin sa pagdinig ng Senate Committee on Trade, Commerce and Entrepreneurship ang Department of Trade and Industry sa hearing ng Committee on Trade, Commerce and Entrepreneurship sa pangunguna ni Trade Secretary Alfred Pascual.

Sa hearing, nakiusap tayo sa kanila na kung maaari ay busisiin kung nakalilkha ba talaga tayo ng higher paying jobs at higher value industries. Dahil kung hindi, sabi nga natin kay Secretary Pascual, kung hindi ganun ang lumalabas sa mga datos, mas makabubuti sigurong baguhin nila ang sistema. We have to reverse track.

Ayon kay Secretary Pascual, sa ngayon, sinusubukan ng gobyerno na sumabak sa industrialization. Isang paraan ito para masustina natin ang paglakas ng ekonomiya na mas magiging kapakinabangan para sa lahat.

Sabi nga ni Secretary, kung industrialized tayo, mas maraming trabaho ang malilikha, mas darami ang trabahong mataas magpasuweldo at hindi na tayo puro sandal sa remittances ng ating OFWs para mapagalaw ang ekonomiya.

Ipinunto natin sa pagdinig na dapat masilip ang datos ng mga industriya, lalo na 'yung mga pinanggagalingan ng mga produktong ini-export natin para makita natin kung may mga pagbabago ba sa kinikita ng kani-kanilang manggagawa mula noon.

Dapat alam natin kung ano ang galaw ng income sa mga industriya natin, lalo na 'yung masasabi nating malalakas, tulad ng mga nasa processing at value adding. Dito kasi natin malalaman kung nasa tamang landas ba tayo at kung tumataas ba talaga ang per capita income ng industriya.

Siguro naman, marami na ang nakababatid na tayo ay may isinusulong na adbokasiya — ang Tatak Pinoy. Dito, layunin natin na maiangat ang kakayahan ng ating mga lokal na industriya na makalikha ng mga de-kalidad na produkto. Kung magkakagayon, may kakayahan din silang makalikha ng mga trabahong may magandang pasuweldo at tiyak na makatutulong pa sa posibleng pagsabak natin sa industrialization.

Sa palagay natin, nasa tamang paggabay ng gobyerno ang pagpapalakas sa ating mga industriya na sa kalaunan, magiging daan para makapag-produce tayo ng mga high value at complex products. Dito, tiyak na madaragdagan ang ating kita dahil lalakas ang pag-export, darami ang magagawa nating trabaho na disente ang pasahod at tiyak ding hindi na tayo nakasandal masyado sa importasyon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Social pension para sa indigent seniors, dinoble!

ni Sonny Angara - @Agarang Solusyon | August 20, 2022

Noong kabataan at kalakasan ng ating mga nakatatanda, tulad ng mga magulang ng inyong lingkod, ang inyong lolo at lola o kung sino pa mang senior members ng pamilya, naging malaking bahagi sila sa pagpapalakas ng ating ekonomiya. Naging malaking ambag sila sa pagpapaunlad ng lipunan.

Ang nakalulungkot — meron tayong indigent senior citizens — mga nakatatandang nagdarahop, walang masandigan o maasahan at walang natatanggap na tulong mula sa mga kaanak o maging sa pamahalaan.

Kamakailan, nag-lapse into law o awtomatiko nang naging batas ang Senate Bill 133 na napagtibay bilang Republic Act 11916 na naglalayong itaas ang social pension ng ating indigent seniors. Ang ibig sabihin, kung dati ay tumatanggap lamang sila ng P500 kada buwan, ito ay itinaas na sa P1,000 o nangangahulugang P12,000 sa buong taon.

Ang social pension for indigent seniors ay bahagi ng Republic Act 9994 o ang Expanded Senior Citizen’s Act of 2010 na amended version naman ng Senior Citizen’s Act o RA 7432. Mas kilala ito sa tawag na Angara Law dahil ang orihinal na awtor ng batas ay ang aking namayapang ama, si dating Senate President Edgardo Angara. Ang dalawang batas na nabanggit ay pawang likha ni dating senador Ed Angara.

Isinasaad ng RA 9994 na mabigyan ng diskwento ang ating seniors sa kanilang mga pangunahing pangangailangan tulad ng gamot at exempted din sa mga ipinapataw ng value-added tax o VAT.

Masasabing indigent ang senior citizen kung siya ay iginugupo na ng karamdaman, napakahina na ng pangangatawan at wala nang kakayahang makapagtrabaho; kung sila ay may kapansanan, walang anumang pension mula sa SSS o GSIS, walang natatanggap na tulong-pinansyal mula sa gobyerno o sa mga pribadong ahensya, walang pinagkakakitaan, walang kompensasyon at walang anumang tulong na natatanggap sa mga kaanak nito. Base ito sa paliwanag ng Department of Social Welfare and Development na siyang mangangasiwa sa guidelines o sa pagpapatupad ng RA 11916.

Maging ang Department of Trade and Industries, may hakbang ding palawigin hanggang sa online stores ang ipinatutupad na discounts para sa ating seniors.

***

At napag-uusapan na rin lang natin ang pangangalaga sa ating senior citizens, may karampatang parusa, tulad ng pagkakulong ng ilang buwan ang mga mapatutunayang nagpabaya, nang-abuso at nagkakait ng suportang-pinansyal sa ating mga nakatatanda.

'Yan ang nilalaman ng isinusulong nating panukala sa Senado, ang Anti-Senior Citizens Abuse Act na naglalayong protektahan ang ating mga lolo at lola.

Sa ating panukala, ituturing na isang uri ng pang-aabuso ang pagpapabaya sa kanilang sitwasyon, tulad ng pagkakait sa kanila ng pagkain, tirahan, healthcare at anumang uri ng proteksyon.

Ituturing namang economic abuse sa senior citizens ang pagbawi sa kanilang financial support, ang pagkontrol, ang hindi awtorisado at maling paggamit ng kanilang pera at ari-arian.

Psychological abuse naman ang pagbibitaw sa kanila ng masasakit na salita, tulad ng pagmumura, pang-iinsulto, pananakot, pamamahiya, harassment at social isolation o ang pagkakait sa kanila ng kalayaang makalabas at makipag-usap sa ibang tao. Ang mga kaanak na mapatutunayang gumagawa ng mga naturang pang-aabuso sa senior citizen ay maaaring makulong nang mula isa hanggang anim na buwan. Ang hindi kaanak na mang-aabuso sa nakatatanda ay papatawan ng maximum penalty.

Hindi kikilalanin ang mga rason na lasing o naka-droga ang isang taong mang-aabusong pisikal at seksuwal sa senior citizen at maaaring makasuhan nang naaayon sa batas.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Public-Private Partnerships, oks sa pagpapaunlad ng lokal na ekonomiya

ni Sonny Angara - @Agarang Solusyon | August 13, 2022

Nitong nakalipas na buwan, nakipagpulong si Pangulong Ferdinand "Bongbong" Marcos, Jr. sa sektor ng pamahalaang lokal o LGUs at hiniling sa kanila na makipag-partner sa mga pribadong sektor tungkol sa kani-kanilang lokal na proyekto.

Para sa atin, napapanahon ang pagkakaroon ng public-private partnerships (PPPs) para epektibong maipatupad ang mga development projects sa kani-kanilang nasasakupan. Suportado natin ang implementasyon nito dahil tiyak na makatutulong ito sa pagpapaunlad ng mga lokalidad.

Dalawang taon tayong pinadapa ng pandemya, kaya’t dumanas ng matinding pagsubok ang mga lokal na ekonomiya. Ito ang maaaring makatulong sa kanila sa muling pagbangon.

Para sa atin, napakahalagang ipagpatuloy ang mga development infrastructure, lalo na sa mga pagkakataong ito dahil ang mga proyektong ito ang natatanging paraan upang muli tayong makalikha ng trabaho at muling mapaglaw ang ekonomiya.

Pinakamagandang halimbawa sa PPP ang lease agreement sa pagitan ng SM Prime Holdings Inc. at ng Iloilo city government sa pangunguna ni Mayor Jerry Trenas. Ang proyektong ito ay may kaugnayan sa development ng central at terminal markets sa lungsod na maaaring mapakinabangan ng halos 3,000 market vendors.

Sa proyekto pong ito, naglaan ang SM Prime Holdings ng P3B, daan para hindi na balikatin pa ng pamahalaang lungsod ng Iloilo ang gastusin. Pero malinaw sa kanilang kasunduan na ang pamamahala o pangangasiwa sa dalawang pamilihang ito ay mananatili sa city government.

Ano nga ba ang kahalagahan ng PPP? Ito ay para matulungan ang kinikita ng mga local government sa pamamagitan ng mga proyekto na magiging kapaki-pakinabang din sa kanilang constituents.

Kakailanganin lang na dapat dumaan sa maayos na transaksyon ang ugnayang ito ng local government at ng pribadong sektor para masigurong walang aberya ang paggulong ng proyekto. Ito ang tamang panahon para mapalawak natin ang ating traditional sources at matulungan ang local governments na lubhang naapektuhan ng dalawang taong krisis dulot ng pandemya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com