Laging nananaginip ng barya, sign na iniismol ang sarili

ni Seigusmundo Del Mundo - @Panaginip, salamin ng inyong buhay | July 7, 2020

Salaminin natin ang panaginip ni Dorothy na ipinadala sa Facebook Messenger.

Dear Professor,

Madalas akong makapanaginip ng mga barya. Noong nakaraang gabi, napanaginipan ko na may barya sa bulsa ko, pero wala namang barya roon dahil alam ko na ipinambayad ko ‘yun sa binili ko. Minsan naman, barya ang nakalagay sa wallet ko at walang perang papel. Sabi ko, puro pangati ang laman ng wallet ko, tapos nagising na ako. Ano’ng ibig sabihin nito?

Naghihintay,

Dorothy

Sa iyo Dorothy,

Kadalasan, ang malaking pagkakamali ng tao ay minamaliit niya ang kanyang sarili kaya halos hindi siya umaaseno na ang isa pang ibig sabihin, hindi malayo ang kanyang mararating. Ang pahabol na kahulugan ay maliliit lang ang kanyang magiging achievements sa buhay.

Minsan kasi, akala ng tao, kapag minamaliit niya ang kanyang sarili, siya ay nakakasunod sa Banal na Utos na “Magpakababa kayo,” ito kasi ang bilin ni Lord bago Siya umangat sa langit.

Marami ang hindi nakakuha ng tunay na kahulugan na kaya ito ibinilin ni Lord ay para magpakababa ang matataas. Kaya ang utos na ito ay hindi para sa mga taong wala pang nararating sa buhay o hindi pa umangat ang kalagayan.

Madali lang naman itong maunawaan, bakit mag-uutos na magpakababa kung ang isang tao ay nasa ibaba na, kaya malinaw na ang Banal na Utos na ito ay para sa matataas na ang kalagayan sa buhay.

Ayon sa iyong panaginip, minamaliit mo ang sarili mo, kaya dapat mong maunawaan na ang bilin ng iyong panaginip ay huwag mong maliitin ang iyong sarili nang sa gayun ay umasenso ka nang todo.

Kapag asensado ka na, saka mo isabuhay ang utos na ang tao ay dapat na magpakababa.

Hanggang sa muli,

Professor Seigusmundo del Mundo

Halamang nasa loob ng bahay pero mabilis lumaki...

sign na dapat nang harapin ang mga hamon ng kapalaran

ni Seigusmundo Del Mundo - @Panaginip, salamin ng inyong buhay | July 6, 2020

Salaminin natin ang panaginip ni Edna Jambalos na ipinadala sa Facebook Messenger.

Dear Professor,

Napanaginipan ng anak ko na mabilis lumaki at kumapal ang dahon ng halaman sa loob ng bahay nang maarawan. Kitang-kita raw niya kaya tinawag niya ako para kunan ‘yun ng picture.

Ano ang ibig sabihin nito?

Naghihintay,

Edna Jambalos

Sa iyo Edna Jambalos,

Sa haba ng lockdown dahil sa COVID-19, ang mga tao nasanay na nasa bahay. Kaya kahit puwede nang lumabas, marami ang hindi maglalabasan dahil kung wala ka namang gagawing mahalaga sa labas, sa loob ka na lang.

Ito ay hindi dahil takot pa rin sila sa COVID-19, kumbaga, may takot pa rin pero ang tunay na hindi nakikitang dahilan ay kapag nasanay ang tao, hindi agad siya makakabalik sa dating buhay.

Saka ang nakakagulat, ang kababaihan at kalalakihan ay nagsiputi na hindi na kailangan pa ang mga whitening lotion. Ang nakakamangha pa, ang kanilang kaputian ay original o natural dahil hindi sila nagsiputi dahil sa chemical na sangkap ng mga whitening product. Bukod sa pagiging maputi, sila rin ay nagsikinis.

Pero sabi ng gobyerno, kailangan nang maghanapbuhay ng mga tao. Kumbaga, dapat na ang ilagay sa isipan at tutukan ay kung paano ang pagpapaganda ng kinabukasan.

Tulad ng halaman, gumaganda ito dahil sa sikat ng araw. Mabilis ang paglago hanggang sa tuluyan nang mamulaklak at magkaroon ng sangkatutak at matatamis na bunga.

Kaya makikitang ipinaaalala ng panaginip ng iyong anak na siya ay kailangan na ring makipagsapalaran at harapin ang mga hamon ng kanyang kapalaran. Sa ganitong paraan, bibilis ang paglago hindi lang ng kanyang pagkatao kundi ng kanyang kabuhayan o kayamanan.

Hanggang sa muli,

Professor Seigusmundo del Mundo

Nagpakasal sa iba ang mister, puwedeng magkatotoo

ni Seigusmundo Del Mundo - @Panaginip, salamin ng inyong buhay | July 4, 2020

Salaminin natin ang panaginip ni Jacob na ipinadala sa Facebook Messenger.

Dear Professor,

Napakalinaw ng panaginip ko na nagpakasal sa ibang babae ‘yung asawa ko.

Madaling-araw ko ‘yun napanaginipan, pero hindi ko naman nakita na ikinakasal sila. Sinabi lang sa ‘kin nu’ng babae na nagpakasal sila at ilang araw ko raw siyang hinahanap. Ma-pera raw ‘yung babae. Magkakatotoo ba ‘yun?

Naghihintay,

Jacob

Sa iyo Jacob,

Wala kang napanaginipan na kasalan. Ang malinaw ay sinabi lang pala sa iyo ng babae na siya ay ikinasal sa asawa mo. Sa biglang tingin, mukhang naniwala ka sa babae, pero bakit nga ba mukhang naniwala ka? Ito ay dahil sa katotohanang kayo ng asawa mo ay mahirap at isa sa sumasagi sa isip mo ay puwede pang mag-asawa ang mister mo at payag ka kapag mayaman ang babae.

Kaya puwedeng magkatotoo ang panaginip mo dahil mukhang payag ka.

Nakakatakot ang ganu’ng pangyayari dahil puwedeng tuluyan nang mawala sa iyo ang asawa mo. Kaya ang payo, sa susunod na hihiling ka, dapat ay mas malinaw o magpaliwanag ka kung ano talaga ang gusto mong wish.

Ganito ang puwede mong maging hiling, babaeng mayaman, pero matanda na, mabait at tanggap ka.

Mas okey ito kaysa sa simpleng wish na nasa malalim mong kamalayan na payag ka na mag-asawa ng ibang babae ang mister basta mayaman ang babae.

Muli, delikado ang ganu’ng hiling, kaya ang madalas na payo ay “Think twice before making a wish.”

Hanggang sa muli,

Professor Seigusmundo del Mundo