Nakaambang taas-presyo ng mga de-lata, sakit na sa ulo, sakit pa sa bulsa

ni Ryan Sison @Boses | June 24, 2025

Kasunod ng nakaambang pagsirit ng presyo ng langis ngayong linggo, inaasahan naman ang pagtaas ng presyo ng mga produkto tulad ng de-latang pagkain, processed food, at inumin. 

Ayon sa Philippine Amalgamated Supermarkets Association (PASA), direktang maaapektuhan ang gastusin sa distribusyon kaya’t posibleng magpatong na rin ng dagdag-presyo ang mga supermarket sa mga bilihin. 

Paliwanag ng PASA president na si Steven Cua, ang dagdag-gastos mula sa fuel hike ay ipapasa ng mga supplier at distributor sa mga retailer. Bagaman walang itinatakdang halaga ng pagtaas, nasa diskarte pa rin umano ng bawat supermarket kung paano ito ipatutupad. 

Ang bawat galaw sa presyo ng langis ay may domino effect sa iba’t ibang sektor, lalo na sa presyo ng pangunahing bilihin. Ang oil price hike ay posibleng maganap ngayong Martes at ito’y pangunahing sanhi ng patuloy na tensyon sa Gitnang Silangan, na nagdudulot ng pangamba at pagtaas sa pandaigdigang merkado ng langis. 

Sa gitna ng patuloy na inflation, dagdag-pasanin na naman ito sa mga mamimili — lalo na sa mga ordinaryong pamilyang umaasa sa murang de-latang pagkain at processed goods. 

Ang pagtaas ng presyo ng langis ay tila isa nang makalumang kasabihan na may awtomatikong kasunod na taas-presyo sa lahat ng bagay. Mula sa pamasahe, kuryente, at ngayon, pati pagkain. Habang nauunawaan nating kailangang sumabay ang mga negosyo sa pagtaas ng operational cost, dapat ding pag-isipan kung paano mapapangalagaan ang kapakanan ng konsyumer. 

Ang gobyerno, lalo na ang Department of Trade and Industry (DTI), ay may mahalagang papel sa pagbabantay at pagsigurong hindi maaabuso ang mga mamimili. 

Ang pagtaas ng presyo ng langis ay may malawak na epekto sa pang-araw-araw na buhay o pamumuhay ng bawat Pilipino. Dito nasusubok ang tamang diskarte ng gobyerno para sa metatag na ekonomiya, at kung gaano kahusay nitong naipapaliwanag ang mga polisiyang dapat sana’y nagbibigay-gaan, hindi dagdag-pahirap sa mga mamamayan. 

Marahil sa ngayon ay kinakailangan nating magtipid o maghigpit ng sinturon, maging mapanuri sa mga bilihin, habang patuloy ang ating panawagan para sa maayos na solusyon sa paulit-ulit na problemang ito. Dahil sa bawat taas ng presyo, hindi lang bulsa ang tinatamaan — pati ang kalidad ng ating pamumuhay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas maluwag na pasahe sana sa MRT at LRT para sa mga lolo’t lola

ni Ryan Sison @Boses | June 23, 2025

Kung kalahati na lamang ang pamasahe ng mga estudyante sa LRT at MRT, bakit hindi rin kaya gawin sa mga senior citizen? 

Sa gitna ng patuloy na pagtaas ng mga bilihin, bayarin at gastusin sa transportasyon, ang desisyon ng gobyernong pag-aralan ang 50% discount para sa mga nakatatanda ay magiging makatwiran para sa kanila. 

Ayon sa Malacañang kasalukuyang pinag-iisipan ng pamahalaan ang posibilidad na gawing 50 percent ang diskuwento sa pamasahe ng mga senior citizen sa LRT-1, LRT-2, at MRT-3 — katulad ng bagong ipinatutupad na benepisyo sa mga estudyante. 

Batay din sa Palasyo, hinahangad ni Pangulong Ferdinand Marcos, Jr. na mapalawak ang saklaw ng mga benepisyo sa mga sektor na higit na nangangailangan. 

Nauna nang ipinahayag ng Department of Transportation (DOTr) na simula na ang pagpapatupad ng 50% fare discount para sa mga estudyante sa tatlong linya ng tren. Sakop lamang ng diskuwento ang mga bumibili ng single journey ticket sa mismong ticket counter. Hindi ito maaaring gamitin sa Beep Cards o stored-value cards. 

Sa kasalukuyang batas, kabilang ang Expanded Senior Citizens Act at Magna Carta for Persons with Disability ang mga senior citizens ay may 20% discount sa lahat ng pampublikong transportasyon. 

Subalit, sinabi ng Pangulo sa isang podcast na marapat lamang na dagdagan pa ang ayuda o benepisyo para sa mga matatanda, lalo’t karamihan sa kanila ay wala nang regular na kita.

Sa bawat biyahe ng isang estudyante ay may pag-asa. Sa bawat biyahe naman ng isang senior citizen, naroroon ang sakripisyo ng mga naunang henerasyon. 

Batid ng lahat na marami sa mga lolo’t lola ang matagal na ring nagsilbi at nagtrabaho para sa kanilang pamilya, habang malaki ang naging kontribusyon nila sa ekonomiya ng bansa, kaya marapat na maibalik natin sa kanila ang mga pinaghirapan. 

Kung kayang igawad ang malaking diskuwento sa mga mag-aaral na nagtataguyod ng kinabukasan, nararapat din sigurong ibigay ito sa mga matatandang minsang naging pundasyon ng kasalukuyan. 

Marahil, ang 50% discount sa pamasahe para sa senior citizens ay hindi lamang ayuda — ito ay pagkilala, pagrespeto, at pagmamalasakit sa kanila. Isang hakbang para tiyakin na ang ating mga lolo at lola ay hindi na kailangang mamroblema pa sa simpleng pamasahe.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

DSWD at DHSUD, sanib-puwersa para sa mga Pilipinong walang tirahan

ni Ryan Sison @Boses | June 22, 2025

Sa gitna ng matinding kahirapan, ang tirahan na isa sa mga pinakakailangan ay madalas na nakakaligtaan. 

Kaya naman ang planong pagtutulungan ng Department of Social Welfare and Development (DSWD) at ng Department of Human Settlements and Urban Development (DHSUD) para sa housing support o maayos na pabahay sa mga mahihirap ay hindi lang magandang balita — ito ay simbolo ng pagsisimula ng mga magagandang programa ng pamahalaan. 

Kung magtatagumpay, maaaring ito na ang tulay patungo sa mas makatao at pangmatagalang solusyon para sa mga kababayang walang tahanan. 

Sa naganap na pulong kamakailan, napagkasunduan ng DSWD at DHSUD na magsanib-puwersa upang mapalawak ang pagbibigay ng pabahay para sa mga mahihirap na Pilipino — lalo na sa mga walang permanenteng tirahan at mga benepisyaryo ng Pantawid Pamilyang Pilipino Program (4Ps). 

Ayon kina DHSUD Secretary Jose Ramon Aliling at DSWD Secretary Rex Gatchalian, layon ng kolaborasyon na tiyaking makararating ang housing assistance sa mga tunay na nangangailangan. Kabilang dito ang mga pamilyang matagal nang naninirahan sa mga lansangan at ang mga nasa listahan ng DSWD na kasama sa “indigent households.” 

Humingi naman ang DHSUD ng komprehensibong listahan mula sa DSWD upang matukoy ang mga pamilyang maaari nang isailalim sa programa. Bahagi ng kanilang plano ang pag-aalok ng transition shelters at, kalaunan, mga permanenteng tahanan na maituturing na mas matibay na solusyon sa problemang paninirahan. 

Sinabi rin ni Aliling na kailangang maipantay ang urban development policies sa realidad ng kahirapan upang hindi lamang pormalidad ng batas ang masunod, kundi ang diwa ng katarungan at pagmamalasakit. 

Ang naturang kasunduan ay hindi lang isang administratibong hakbang — isa itong paalala na ang pagkakaroon ng tirahan ay hindi lang pribilehiyo kundi karapatan ng bawat mamayan. 

Sa ganitong programa ng ating gobyerno, maaaring maging simula ito ng sistematikong pagbuwag sa tinatawag na “cycle of poverty” na paulit-ulit na binabalikan ng milyun-milyong Pilipino. 

Marahil ang tagumpay nito ay hindi lamang masusukat sa rami ng mga naipapatayong bahay kundi sa rami ng pamilyang maiaalis sa mga lansangan, masasagip sa kahihiyan at kawalan ng pag-asa, at maitatawid mula sa kahirapan. 

Dahil ang tunay na pag-unlad ay nagsisimula sa loob ng tahanan, at kung bibigyang puwang ang ganitong inisyatiba, wala nang kababayang maiiwan at maninirahan pa sa kung saan-saan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com