Pharaoh's Fairy nanguna sa Turf

ni Green Lantern @Renda at Latigo | September 30, 2023

Pinasaya ni Pharaoh's Fairy ang mga dehadista matapos nitong angkinin ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Miyerkules ng gabi.

Sinakyan ni jockey O'Neal Cortez, pumuwesto muna sa pang-apat si Pharaoh's Fairy para panoorin ang nasa unahan na si Sandigan na pinapahirapan ni Luke Skywalker na nasa segundo.

Bakbakan ang nasilayan ng mga karerista mula far turn hanggang sa rektahan kung saan ay apat na kabayo ang nagkapanabayan sa unahan.

Sa huling 50 metro ng laban ay dikit-dikit pa rin sa unahan kaya nanalo si Pharaoh's Fairy ng may leeg lang ang pagitan sa pumangalawang si Sandigan.

Inirehistro ni Pharaoh's Fairy ang tiyempong 1:26. 2 sa 1,400 meter race sa event na suportado ng Philippine Racing Commission, (PHILRACOM) ni Chairman Reli de Leon.

Hinamig ng winning horse owner na si MF Mangaliman ang P10,000 karagdagang premyo, tumersero ang Full Control habang pumang-apat si Uncle Vhines.

Samantala, nasiyahan ang mga karerista dahil umabot sa walong races ang pinakawalan ng Metro Manila Turf Club Inc. (MMTCI).

Nasiyahan din ang mga racing aficionados sa pagkakapanalo ni Cash Is King sa isa pang PRBHS Class 5 na pinakawalan sa pangalawang karera.

Pangalawang tumawid sa meta si Lucky Hilda, pangatlo si Steady Cat habang pang-apat si Caloocan Girl.

Limang tigasin, sasalang sa PHILRACOM 3-YO Race

ni Green Lantern @Renda at Latigo | September 29, 2023

Mag-uunahan sa finish line ang limang tigasing batang kabayo sa pagsalang nila sa 2023 PHILRACOM 3-Year-Old & Above Maiden race na ilalarga ngayong araw sa Metro Turf, Malvar sa Tanauan City, Batangas.

Makikilatis ang husay ni Streisand na posibleng pagtuunan ng pansin ng mga dehadista laban sa inaasahang papatok sa takilya na sina Flywheel at Heavy Welght.

Rerendahan ni jockey JoL Siego si Streisand, maliban kina Flywheel at Heavy Weight ang mga kasali ay sina Hellguy at Ang Bigote sa distansiyang 1,400 meter race.

Komento ng mga karerista, pahirapan sa pagpili ng tatayaan kahit limang kabayo lamang ang tatakbo ito'y dahil mahuhusay ang mga kasali.

Paglalabanan ang P20,000 added prize sa event na suportado ng Philippine Racing Commission, (PHILRACOM) ni Chairman Reli de Leon, inaasahang magandang laban ang masisilayan ng mga karerista.

Pakakawalan ang nasabing karera sa unang race kung saan magsisimula rin doon ang winner take all (WTA) na isa sa paboritong tayaan ng mga karerista.

Pitong karera ang inihanda ng Metro Manila Turf Club Inc. (MMTCI) ngayong araw ng Biyernes.

Maliban sa nabanggit na karera, inaasahang aabangan din ng mga karerista ang bakbakan ng 10 kabayo sa huling race.

Paniguradong suportado ng mga liyamadista ang kalahok na si Sun Dance sa distansiyang 1,400 meter race.

Gagabayan ni class A rider John Alvin Guce, makakalaban ni Sun dance sina Melania, Mythic Layla, Antonio Delamugis, Lightning Lass, Rancheros, Blazing Bullet, El Mundo, Oradas Gray at Dugong Bughaw.

Mga Pili ni Green Lantern:

Race 1 - Streisand (3), Flywheel (4)

Race 2 - Happy Julliane (1), Sexy Love (5)

Race 3 - Hook The Hustler (5), Chef Kat (9), Che Che 91), Christiano (8)

Race 4 - Speak Easy (4), Black Magic Woman (3)

Race 5 - Rockaway (5), Fortress (9), Plus (2), Del Monte (1)

Race 6 - Buwayang Bato (4), Munich (1), Arimunding Munding (5), Maximum Speed (2)

Race 7 - Sun Dance (1), Melania (2), Mythic Layla (3), Blazing Bullet (7)

Sister Moon nanalo sa 3-YO Maiden Race

ni Green Lantern @Renda at Latigo | September 28, 2023

Nakipagbakbakan sa unahan si Sister Moon upang sikwatin ang panalo sa 3-Year-Old & Above Maiden Race na inilarga sa Metro Turf, Malvar sa Tanauan City, Batangas, Martes ng gabi.

Mainit ang naging bakbakan nina Sister Moon at Don Pedro pero hindi naubusan ng lakas ang una kaya tinawid nito ang meta ng walang kahirap-hirap.

Kumaskas sa arangkadahan si Sister Moon pero kinapitan agad siya ni Don Pedro at saka nito kinuha ang unahan.

Hindi naman nagpaiwan si Sister Moon, nakipagsabayan ito sa unahan at umabot ang labanan nila ng Don Pedro hanggang sa pagsungaw ng rektahan.

Nasa unahan si Sister Moon habang kinakapos na si Don Pedro, lumalapit naman ang Savawani na dumaan sa tabing balya.

Patuloy ang pagpapakitang gilas ni Sister Moon at nanalo ito ng may tatlong kabayong agwat sa pumangalawang si Savawani, tersero si Don Pedro sa event na suportado ng Philippine Racing Commission, (PHILRACOM) ni Chairman Reli de Leon.

Nirendahan ni EA Abrea, inirehistro ni Sister Moon ang tiyempong 1:11.4 minuto sa 1,200 meter race sapat upang hamigin ng winning horse owner na si Benjamin Abalos Jr. ang P20,000 added prize.

Samantala, inihahanda si Sister Moon ng kanyang connections para sa susunod na sasalihang karera.