Darleb sumungkit ng panalo sa Handicap Turf

ni Green Lantern @Renda at Latigo | November 13, 2023

Umarangkada sa umpisa hanggang sa finish line si Darleb upang sungkitin ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas, noong Sabado ng hapon.

Pagbukas ng aparato ay kumaskas agad si Darleb at kinuha ang unahan para makalamang ng isa't kalahating kabayong agwat sa humahabol na sina Summer Brew at Hamlet.

Pagsapit sa kalagitnaan ng karera ay nagpupumilit na makuha ni Summer Brew ang unahan kay Darleb pero hindi pumayag ang huli at nanatili itong tangan ang bandera.

Umabot sa far turn ang bakbakan at nasa dalawang kabayo na ang lamang ni Darleb kay Summer Brew kaya pagsungaw ng rekta ay unti-unti ng lumalayo ang winning horse.

Pagdating sa rektahan ay umalagwa na sa unahan si Darleb kaya naman nagwagi ito ng may siyam na kabayo ang agwat sa pumangalawang si Summer Brew.

Ginabayan ni jockey NC Lunar, inirehistro ni Darleb ang tiyempong 1:24. 6 sa 1,400 meter race sapat upang hamigin ng winning horse owner na si Aristeo Puyat ang P10,000 added prize.

Tumersero si Hamlet habang pumang-apat si Dragon Butterfly sa event na suportado ng Philippine Racing Commission, (PHILRACOM) ni Chairman Reli de Leon.

Samantala, ilalarga naman ang 2nd Philippine Horseracing and Breeding Expo sa Sta. Lucia East Grand Mall sa Cainta sa darating na Nobyembre 14 hanggang 16.

"The Philippine Horseracing and Breeding Expo intends to bring the industry closer to the general public and the kareristas in order to revive the glory of local horseracing," ayon sa organizer ng event.

Noong nakaraang taon ay sa San Lazaro Business and Leisure Park sa Carmona, Cavite ginanap kung saan ay maraming nakapuntang racing fans.

Malibu Princess larga sa 2-YO Maiden Race

ni Green Lantern @Renda at Latigo | November 12, 2023

Isa sa mamarkahan ng mga liyamadista ang kalahok na si Malibu Princess pagsalang nito sa 2-Year-Old Maiden Race na ilalarga sa Metro Turf, Malvar - Tanauan City, Batangas ngayong araw.

Sasakyan ni jockey Pabs Cabalejo si Malibu Princess kung saan makakalaban niya ang apat na tigasing batang kabayo sa distansiyang 1,400 meter race.

May nakalaan na added prize na P20,000 para sa winning horse owner, makakatagisan ng bilis ni Malibu Princess sina She's Royal, Maria's Legacy at magkakamping Be Smart at Star Of The Future.

Komento ng mga karerista, paniguradong magbibigay ng magandang laban kay Malibu Princess ay si She's Royal na sasakyan ni Christian Advincula. Makakatanggap ng P4,000 ang breeder ng winning local horse lamang, pakakawalan ang nasabing karera sa unang race.

Samantala, 7 races ang ikakasa ng Metro Manila Turf Club Inc. (MMTCI) ngayong araw ng Linggo kaya tiyak na masisiyahan ang mga karerista sa kanilang paglilibang.

Magandang karera rin ang ilalarga sa Race 2 kaya aabangan din ito ng mga karerista.

Anim na kabayo ang mag-uunahan sa meta sa PHILRACOM Rating Based Handicapping System sa distansiyang 1,400 meter race. Mag-uunahan sa finish line sina Dona Chichay, Dugong Bughaw, Iikot Lang, Seychelles, Speed revolution, Bocaue Ruvertown.

Mga Pili ni Green Lantern:

Race 1 - Malibu Princess (4), Be Smart/Star Of The Future (3/3A)

Race 2 - Dona Chichay (1), Seychelles (4)

Race 3 - Christiano (5), Lucky Lucy (4)

Race 4 - Innocare (6), Aly Yanna (3)

Race 5 - Es Oh Pee (4), Top Of The Mark (5)

Race 6 - Basket Of Gold (7), Raga Muffin (2), El Mundo (8)

Race 7 - Seven Of Diamonds (3), Manila Boy (4), Tears Of Joy (5)

Righteous Ruby tututukan sa Turf Memorial Cup

ni Green Lantern @Renda at Latigo | November 11, 2023

Paniguradong nakatutok ang ibang karerista kay Righteous Ruby sa ikakasang "Ambassador Eduardo M. Cojuangco Jr. Memorial Cup na ilalarga sa Metro Turf, Malvar sa Tanauan City, Batangas sa Nobyembre 19, (Linggo).

Gagabayan ni former Philippine Sportswriters Association, (PSA) - Jockey of the Year awardee Jonathan Basco Hernandez si Righteous Ruby sa distansiyang 2,000 meter race.

Nakalaan ang garantisadong premyo na P5-M., ang ibang kalahok ay sina Civics Class, In Thje Zone, Shastaloo, Speed Fantasy at Treasure Hunting na kagagaling lang sa panalo.

Posibleng magbigay ng magandang laban kay Righteous Ruby ay sina Civics Class at Treasure Hunting na nanalo lang nakaraan sa Special Invitational Race II ayon sa komento ng mga karerista.

Inaasahang itotodo ang paghahanda ng mga nagsaad ng paglahok dahil kukubrahin ng mananalong kabayo ang tumataginting na P3-M sa event na pagbibigay-pugay kay Eduardo Cojuangco.

Magbubulsa rin ng P1,125,000 ang second placer habang tig-P625,000 at P250,000 ang third at fourth ayon sa pagkakasunod.

Samantala, may mga balanseng regular races ang pakakawalan din ng Metro Manila Turf Club Inc. (MMTCI) sa araw mismo ng stakes race kaya tiyak na masisiyahan ang mga karerista sa kanilang paglilibang. Ang nasabing stakes race ay suportado ng Philippine Racing Commission, (PHILRACOM) ni Chairman Reli de Leon.