Jaguar inangkin ang korona sa MARHO 3-YO

ni Green Lantern @Renda at Latigo | November 22, 2023

Nakitaan ng husay sa karera si Jaguar matapos nitong angkinin ang korona sa MARHO Breeders' 3-Year-Old Colt Mile na inilarga sa Metro Turf, Malvar sa Tanauan City, Batangas, noong Linggo ng hapon.

Nirendahan ni star jockey Jeffril Tagulao Zarate, ipinuwesto nito si Jaguar sa pang-apat habang nag-uubusan ng lakas sa unahan sina Save My Savings, Sonic Clay at Noble Touch.

Habang papalapit sa far turn ay unti-unti ng kumakapit sa unahan si Jaguar kaya naman bago sumapit ng home turn ay naagaw na niya ang bandera.

Lumayo ng todo si Jaguar sa rektahan, pina-abot ni Zarate ang lamang ni Jaguar hanggang anim na kabayo kaya naman magaan nitong tinawid ang meta.

Ipinasang tiyempo ni Jaguar ang 1:40.6 minuto sa 1,600 meter race sapat upang hamigin ng winning horse owner na si JM Arroyo ang P600,000 premyo.

Nasungkit ng second placer na Open Billing ang P225,000, tersero ang Sonic Clay na nag-uwi ng P125,000 habang pang-apat ang Save My Savings na nagbulsa ng P50,000.

Samantala, nagwagi si Istulen Ola sa MARHO - Petron Corporation trophy race na pinakawalan sa race 7.

Ginabayan ni class A rider John Alvin Guce si Istulen Ola upang ilista ang 1:25 minuto sa 1,400 meter race, pumangalawa si Bombay Nights.

Treasure Hunting nagpasaya sa AECMC

ni Green Lantern @Renda at Latigo | November 21, 2023

Pabibo si Treasure Hunting kaya napasaya nito ang kanyang mga tagahanga matapos manalo sa 2023 Philracom "Ambassador Eduardo M. Cojuangco, Jr. Memorial Cup" na inilarga sa Metro Turf, Malvar sa Tanauan City, Batangas, Linggo ng hapon.

Kumaskas sa largahan para makipagtagisan muna ng ilang metro sa unahan si Teasure Hunting kina Civics Class at In The Zone at pagkatapos ay saka dumiskarte si class A jockey John Alvin Guce.

Nang makita na maluwag na ang daanan ay tinutok na lang ni Guce ang sinasakyan nitong si Treasure Hunting sa nauunang si Civics Class.

Ilang kabayo naman ang nais makadikit sa unahan kaya naungusan pa nila ng bahagya si Treasure Hunting na napadpad sa pang-apat na puwesto. Subalit papalapit ng far turn ay pinakawalan na ni Guce si Treasure Hunting kaya naman nagsimula na itong umusad sa unahan.

Pagkakuha ng unahan ni Treasure Hunting ay sinabayan naman ito ng In The Zone hanggang sa pagsungaw ng rekta ay magkapanabayan ang dalawa.

Paremate naman si Righteous Ruby sa rektahan na dumaan a tabing balya pero hindi na maawat si Treasure Hunting at nanalo ito ng may apat na kabayong agawat sa pumangalawang si In The Zone.

Inirehistro ni Treasure Hunting ang 2:05.4 minuto sa 2,000 meter race sapat upang hamigin ng winning horse owner na si Den Tan ang P3-M premyo.

Nakopo ni In The Zone ang second place prize na P1,125,000. Tumersero si Righteous Ruby na nag-uwi ng P625,000 habang P250,000 ang kinubra ni Shastaloo.

Samantala, 12 races ang pinakawalan ng Metro Manila Turf Club Inc. (MMTCI) kaya naman masayang-masaya ang mga karerista sa kanilang paglilibang.

Senshi Spirit mahusay sa MARHO Sky Way 3

ni Green Lantern @Renda at Latigo | November 20, 2023

Nakitaan ng husay ng mga karerista si Senshi Spirit matapos nitong manalo sa MARHO - Sky Way 3 Trophy race na inilarga sa Metro Turf, Malvar - Tanauan City, Batangas noong Sabado ng hapon.

Kumaskas sa largahan si Senshi Spirit upang hawakan ang dalawang kabayong bentahe sa humahabol na si Eazacky habang nasa tersero naman si Sir William.

Paglapit sa far turn ay nasa unahan pa rin si Senshi Spirit at naka-lamang na ito ng tatlong kabayo sa mga nasa likuran niyang sina Bravo, Eazacky at Sir William.

Kumaripas lalo sa unahan si Senshi Spirit na sinakyan ni jockey JT Pabilic, halos wala ng humahabol kaya naman tinawid nito ang meta ng may 9 na kabayo ang agwat sa pumangalawang Chrome Bell.

Inukit ni Senshi Spirit ang tiyempong 1:23.6 minuto sa 1,400 meter, tumersero si Late Night Lady habang pumang-apat si Bravo sa event na suportado ng Philippine Racing Commission, (PHILRACOM) ni Chairman Reli de Leon. Boundary agad ang mga kareristang nakataya sa forecast na Senshi Spirit/Chrome Bell (8/2) dahil nasa P60.00 ang ibinigay na dibidendo para sa limang pisong taya.

Umabot sa 11 races ang pinakawalan ng Metro Manila Turf Club Inc. (MMTCI) kaya naman masaya ang mga karerista sa kanilang pananaya.

Isa pang hinahangaan ng mga karerista ay si Elegant Lady sa MARHO - TPLEX Trophy race na pinakawalan sa pangalawang karera. Inilista ni Elegant Lady ang tiyempong 1:26.6 sa 1,400 meter race.