Aktres, ‘di sumipot sa Parade of Stars… VICE AT NADINE, MAY TAMPUHAN DAW

ni Reggee Bonoan @Sheet Matters | December 24, 2025

Photo: Call Me Mother - MMFF 2025 Parade of Stars via Bulgar

Nasa ibang bansa pala si Nadine Lustre kaya hindi nakadalo sa 51st Metro Manila Film Festival (MMFF) Parade of Stars bilang isa sa mga bida ng pelikulang Call Me Mother (CMM) noong Disyembre 19 na ginanap sa Makati City.

Maraming nagtaka kung bakit wala ang co-star ni Meme Vice Ganda kaya may nabuong tsika na may tampuhan ang dalawa at kung anu-ano pa.

May nakuha kaming impormasyon mula sa Viva na may prior commitment si Nadine bago pa niya tanggapin ang CMM project at aware raw ang Star Cinema, ABS-CBN Film Productions, IdeaFirst Company at si Vice na hindi siya makakasama sa parada dahil wala siya sa bansa.

“Ang ikinatataka namin, parang ‘di man lang naglabas ng release ang Star Cinema na kaya wala si Nadine ay nasa ibang bansa. Kaya nagtataka kami bakit may negative issues. Walang issue at all. Okay sina Nadine at Vice,” ayon sa aming kausap.

Nang makarating sa amin ang balitang hindi raw okay sina Vice Ganda at Nadine Lustre ay napakunot ang noo namin dahil alam naming magkasundo ang dalawa. Knowing Meme, kapag may ayaw siya ay sinasabi niya ito at so far ay wala kaming narinig mula sa kanya.

Anyway, abangan ang Call Me Mother simula December 25 sa mga sinehan nationwide sa direksiyon ni Jun Robles Lana.

---

KALIWA’T KANAN ang singhot na maririnig habang pinanonood namin ang Bar Boys 2: After School (BB2AS) nitong Lunes, Disyembre 22, sa ginanap na premiere night sa Robinsons Galleria Cinema 5.

Ang mga eksenang nagtutuluan ang mga luha at pasimpleng pinupunasan ay ang lahat ng eksena ni Will Ashley na hindi na namin ikukuwento para hindi ma-preempt. Nagkaisa ang lahat ng nanood na malaki ang laban ng aktor sa kategoryang Best Supporting Actor sa darating na MMFF Gabi ng Parangal sa Disyembre 27 na gaganapin sa Dusit Hotel.

Walang itulak-kabigin sa original Bar Boys na sina Carlo Aquino, Kean Cipriano, Enzo Pineda at Rocco Nacino pagdating sa acting dahil na-maintain nila ito at magaling na sila 10 years ago.

Napaka-powerful ng karakter ni Ms. Odette Khan bilang si Justice Hernandez dahil kahit nasa ospital na at may sakit ay sa kanya pa rin humihingi ng payo ang mga naging estudyante niyang sina Carlo, Enzo, Kean at Rocco habang salitan silang nagbabantay at inaayos ang mga kailangan niya. Isa ito sa highlight ng pelikula kaya deserving siyang manalo ng Best Supporting Actress.

Huwag palampasin ang Bar Boys 2: After School simula December 25, handog ng 901 Studios sa direksiyon ni Kip Oebanda.

---

NAKAKATUWA ang dalawang bida ng I’mPerfect na sina Jessica at Jiro dahil paakyat pa lamang sila sa second floor ng Robinsons Galleria ay marami na ang nagpa-picture sa kanila, patunay na nakilala na sila ng mga netizens.

Tuwang-tuwa rin ang dalawang may Down syndrome actors ng I’mPerfect at sabi nila, “Artista na kami,” at yes, marunong silang mag-pose lalo na si Jessica na mega-emote at malakas ang laban para sa kategoryang Best Actress.

Samantala, tuwang-tuwa sina Jessica at Jiro dahil nakapagpa-picture sila sa main cast ng Bar Boys 2: After School (BB2AS), lalo na kay Will Ashley na binati pa ni Jiro ng “Congratulations!” sabay pakilala ng sarili.

Iisa ang sinasabi ng lahat ng nakapanood, dapat ay si Sigrid Andrea Bernardo ang manalo ng Best Director.

Anyway, abangan ang I’mPerfect sa December 25 sa mga sinehan nationwide, handog ng Nathan Studios.

Feeling super blessed… WILL, 2 ANG PELIKULA SA MMFF

ni Reggee Bonoan @Sheet Matters | December 19, 2025

Photo: IG Will Ashley

Bago pumasok sa Bahay ni Kuya para sa Pinoy Big Brother Celebrity Collab Edition (PBBCCE), nakapag-audition na si Will Ashley para sa pelikulang Bar Boys 2: After School (BB2AS) at pumasa siya kay Direk Kip Oebanda.

Nang ma-extend nang ilang beses ang PBBCCE, nangamba ang batang aktor dahil baka palitan siya dahil binigyan siya ng target date ng shooting na hindi nasunod.

Nalaman niyang nagsimula na ang shooting, kaya lalo siyang naaligaga. Kaya pala nadaanan ko minsan na kausap niya si Big Brother at nabanggit niya na may project siya at baka hindi na niya magawa o mahintay. Gustung-gusto pa naman daw niya ang project na ito.

Kaya naman, nang makalabas ng PBB house si Will, kinabukasan ay may shoot na agad siya ng BB2AS bilang entry sa 51st Metro Manila Film Festival (MMFF) na mapapanood simula December 25.

Sadya namang hinintay si Will ni Direk Kip dahil para sa kanya talaga ang karakter na Arvin, na nag-aaral at nagtatrabaho sa isang coffee resto bar na pag-aari ni Emilio Daez, na dumaan din sa audition.

Unang nakatrabaho ni Direk Kip si Will sa Cinemalaya movie ni Marian Rivera na Balota na ipinalabas noong 2024 bilang anak ng aktres.

Ilang beses na-nominate si Will sa Balota, pero sa Star Awards for TV siya napansin bilang Best Supporting Actor, na hindi naman niya personal na natanggap dahil nasa shooting siya ng Love You So Bad (LYSB) mula sa Star Cinema, GMA Pictures, at Regal Entertainment na entry din sa MMFF.

Aniya, “Pangarap ko lang po dati na mapasama sa MMFF. Sino ba naman po ang mag-aakala na dalawa pa (ang entry). Sobrang blessed po talaga. Sobrang grateful lang sa mga nangyayari.”

Nang hingan ng reaksiyon ang aktor sa papuri sa kanya ni Direk Kip, sabi niya, “Happy 

naman po marinig ‘yun, pero teamwork po talaga ‘yung ginawa namin. Lahat po kami nag-compromise sa pelikulang ito. Lahat po, ibinigay ang puso namin para magawa itong pelikula na maganda.”

Dagdag pa niya, “Noong nabasa ko po ‘yung script, nagkaroon po s’ya ng impact sa puso ko, lalo na po ‘yung character ni Arvin. Para s’ya sa mga tao. Kumbaga, maraming makaka-relate rito. Ginagawa niya ito para sa mom niya, sa magulang n’ya. Malapit din po s’ya sa pagkatao ko.

“Siguro naging mahirap lang po para sa akin ‘yung maibalik ako sa pag-arte kasi ang tagal ko nga pong nawala pagkatapos ng Balota. Medyo nawala po ‘yung utak ko kasi sobrang overwhelming, pero tinulungan nila akong ma-ground, na maibalik kung sino ako.”

Na-star struck daw si Will kay Ms. Odette Khan.

“Pinapanood ko lang po s’ya. Sabi ko kay direk, gusto ko pagtanda ko, ‘yun ako. Sobrang goosebumps po talaga. Gusto ko po mag-iwan ng legacy dito sa industry na ito. Si Miss Odette po ‘yung isa sa magandang halimbawa,” malumanay na sabi ng binata.

Samantala, bukod kina Emilio at Will, kasama sa BB2AS sina Carlo Aquino, Kean Cipriano, Enzo Pineda, Rocco Nacino, Therese Malvar, Klarisse de Guzman, Bryce Fernandez, Sassa Gurl, at Glaiza de Castro.

Mula sa direksiyon ni Kip Oebanda at katuwang niyang nagsulat ng script sina Carlo Enciso Catu at Zig Dulay, produced ito ng 901 Studios nina Jon Galvez, Leo Liban, at Carlos Ortiz.

---

PINANGUNAHAN ni Movie and Television Review and Classification Board (MTRCB) Chairperson at CEO Lala Sotto ang panunumpa sa tungkulin ng dalawang bagong Board Members ng ahensiya noong Martes, Disyembre 16, 2025 na ginanap sa MTRCB Liezl Martinez Hall, Quezon City. Ito ay sina Nestor Cuartero at Evylene ‘Bing’ Advincula.

Pinalitan nila sina Jerry Talavera, na nagtapos na ng kanyang termino, at Michael Luke Mejares na nagbitiw noong Nobyembre 11, 2025.

Si Cuartero ay isang beterano at multi-awarded na mamamahayag na may ilang dekadang karanasan sa industriya ng media. Naging guro siya ng mahigit 20 taon sa Department of Communication and Media Studies ng Faculty of Arts and Letters ng University of Santo Tomas.

Samantala, si Advincula ay dating executive officer ng Robinsons Movieworld at naging Board Member ng Cinema Exhibitors Association of the Philippines (CEAP). Dala niya sa MTRCB ang malawak na karanasan at kaalaman sa operasyon ng mga sinehan at ugnayan sa industriya ng pelikula.

Tiwala si Sotto na ang mga bagong miyembro ay magbibigay ng mahahalagang pananaw at higit pang magpapatibay sa mandato ng ahensiya.

Aniya, “Kumpiyansa akong makatutulong sila sa aming mandato lalo na pagdating sa pakikipagtulungan sa industriya at sa pagtaas ng tiwala ng publiko. We thank President Ferdinand R. Marcos, Jr. for entrusting the MTRCB with leaders who bring integrity, expertise, and a deep understanding of the media and film industry.”

Nagpasalamat din si Chair Lala kina Talavera at Mejares sa kanilang serbisyo at dedikasyon sa ahensiya.

Aniya, “Lubos kaming nagpapasalamat kina dating Board Members Talavera at Mejares sa kanilang trabaho. Malaki ang naitulong nila sa pagsusulong ng misyon ng MTRCB.”

Pamilya nila, na-bash na rin, todo-hingi ng sorry… POKWANG, INAMING KAPATID NIYA ANG DRAYBER NA NAMBATOK SA MAGKAKARITON

ni Reggee Bonoan @Sheet Matters | December 17, 2025

Photo: IG @itspokwang27

Sa pamamagitan ng kanyang Instagram (IG) account ay nag-live ang TV host-comedienne na si Pokwang upang humingi ng dispensa sa nakaalitan ng kanyang kapatid na nambatok ng magkakariton kamakailan. 

Na-witness ito ng anak ng magkakariton na maliit pa kaya napaiyak nang malakas ang bata.

Ayon sa kumuha ng video, mabilis ang takbo ng nagmamaneho ng Toyota Hi-Lux at muntikan nang masagi ang batang babae. 

Nagkaroon umano ng sagutan, bumaba ang driver at binatukan ang magkakariton. Nakita ito ng batang babae kaya napaiyak.

May lumapit na lalaki upang umawat, pero hindi pa rin nagpaawat ang nagmamaneho ng pick-up truck. Sinabihan umano ng lumapit na lalaki ang isa na i-video ang driver at kunan ang plate number. Maging ang pag-iyak ng batang babae ay kinunan din at agad na ipinost.

Mabilis na nag-viral ang video at isa kami sa mga nag-share nito upang ipanawagan sa Land Transportation Franchising and Regulatory Board (LTFRB) at Land Transportation Office (LTO). Napansin ito ng mga ahensiya ng gobyerno at papatawan ng 90-day suspension ang lisensiya ng driver.

Base sa IG Live ni Pokwang, “Totoo po ‘yung nag-viral na video na isang lalaki na naka-Hilux na Toyota na puti. Opo, kapatid ko po ‘yun. Nag-viral s’ya. Ang galing.

“Ako po ay humihingi ng dispensa du’n po sa kanyang nakaalitan, lalung-lalo na po doon sa anak na babae. Pasens’ya ka na, hija. Dadalawin kita, ha? Wait lang, pupunta ang Tita Pokwang mo r’yan. Pasens’ya ka na.

“‘Di po ako natutuwa at ‘di ko po dapat kampihan ‘yung nangyari du’n sa kapatid ko. Kumbaga, s’yempre, nanay din naman po ako. Pero lagi po nating iisipin na may other side of the story. Pero sige po, sa amin na lang po ‘yun. At humihingi po ulit ako ng kapatawaran du’n po sa mag-ama.”

Pinaalalahanan din ng aktres ang mga nag-post ng larawan ng buo nilang pamilya para i-bash.

“Paalala ko lang din po du’n sa mga nag-post ng paulit-ulit ng mukha ng pamilya ko, may tinatawag po tayong cyberbullying at cyber libel.

“Doon po sa ibang pulitiko na nakisakay at ‘di naman taga-Antipolo, nakakaloka! Nag-post pa kayo, Sir. Alam n’yo na kung sino kayo.

“Alam ko, taga-Bicol kayo. Ingat po kayo kasi mambabatas pa naman kayo, so alam n’yo dapat kung ano ang tinatawag na cyberbullying at cyber libel.”

“Ipinost po ninyo ang mukha ng buong pamilya ko. Isa lang po ang may kasalanan, kapatid ko. Pero nasaan po ang privacy at protection ng pamilya ko? Hindi po ako kumakampi sa kapatid ko, pero sana nag-iingat po kayo sa mga posts at sa mga comments ninyo,” pahayag ni Pokwang.

Hindi rin niya nakalimutang pasalamatan si Antipolo City Mayor Junjun Ynares sa pag-aayos ng problema.

Aniya, “Humihingi rin po ako ng paumanhin sa aming mayor at pasens’ya na rin po kayo.”

Samantala, ang nakaalitang magkakariton ng kapatid ni Pokwang ay si Crispin Villamor at nangyari ang insidente sa Bgy. San Roque, Antipolo City.

Base rin sa police report, pumunta ang pick-up driver sa police station upang makipag-areglo.