Dapat ang kakandidatong VP ay bukal sa loob, hindi 'yung inutusan lang ni FPRRD!

ni Pablo Hernandez @Prangkahan | February 22, 2026

NAGSALITA NA SI MAYOR LENI NA NAGA CITY LANG ANG POKUS NIYA, KAYA MALAMANG SASABLAY ANG MARCOS ADMIN NA KUMBINSIHIN ITONG LABANAN SI VP SARA SA 2028 PRESIDENTIAL ELECTION – Nang ianunsyo ni Presidential Communication Officer (PCO) Usec. Claire Castro na makikipagkita si Pangulong Ferdinand “Bongbong” Marcos Jr. (PBBM) kay Mayor at dating Bise Presidente Leni Robredo sa Naga City para sa programang "Kontra-Baha," napansin ng mga mamamahayag ang suot na pink na damit ni Usec. Claire. Nang magkita naman sina PBBM at Mayor Leni, ipinakita rin ng presidente na ang kanyang medya ay kulay pink.

Kung ito man ay unang hakbang ng administrasyong Marcos upang himukin si Mayor Leni na tumakbo sa pagka-presidente at palakasin ang posisyon ni Vice Pres. Sara Duterte-Carpio sa 2028, malamang ay hindi ito magtatagumpay. Mula sa pahayag ng mayora, malinaw na naka-pokus siya sa paglilingkod sa kanyang mga kababayan sa Naga City at wala siyang intensyong sumali sa pambansang eleksyon. Period!

XXX

HINDI KATANGGAP-TANGGAP SA PUBLIKO ANG SINABI NI SEN. PADILLA NA KAKANDIDATO SIYANG VP KUNG IUUTOS SA KANYA NI FPRRD, DAPAT ‘PAG KAKANDIDATONG BISE PRESIDENTE, BUKAL SA LOOB AT HINDI MAY NAG-UTOS LANG – Ayon kay Sen. Robin Padilla, handa siyang tumakbo bilang bise presidente sa tabi ni VP Sara Duterte kung ito raw ang utos ni dating Pangulong Rodrigo Roa Duterte.

Hindi katanggap-tanggap sa publiko ang pahayag ni Sen. Padilla, dahil ang desisyon na tumakbo sa pagka-bise presidente ay dapat bukal sa kanyang sariling kagustuhan at hangaring maglingkod sa bayan, hindi lamang dahil sa utos ng kanyang “Tatay Digong.” Boom!

XXX

MALAMANG IABSUWELTO NG COMELEC SI SEN. MARCOLETA SA TAKOT NA I-BASH SILA NG MILYON-MILYONG BOMOTO SA SENADOR – ‘Wag nang umasa ang mga anti-Marcoleta na papatawan ng parusa ng Comelec si Sen. Rodante Marcoleta dahil sa umano’y misdeclaration sa Statement of Contributions and Expenditures (SOCE) niya.Alam ng Comelec na kung parurusahan nila si Marcoleta, puputaktihin sila sa social media ng mga pro-Marcoleta, lalo na’t mahigit 15 milyong Pilipino ang bumoto sa kanya. Kaya’t para makaiwas sa bash, mas pinili ng Comelec na iabsuwelto ang senador. Period!

XXX

DAPAT LANG TULUYANG KASUHAN AT IPAKULONG NG MALACAÑANG ANG MGA FAKE NEWS VLOGGERS PARA MABAWASAN ANG MGA NAGPAPAKALAT NG PEKENG IMPORMASYON SA SOCMED – Sinabi ni Usec. Claire na hindi tatanggapin ng Malacañang ang anumang paghingi ng paumanhin mula sa mga Duterte Diehard Supporters (DDS) vlogger na nag-post ng pekeng medical record ni PBBM, na nag-uulat ng malubhang karamdaman ng presidente. Dapat tuluyang kasuhan at ikulong ang mga vlogger na ito upang mabawasan ang pagkalat ng pekeng impormasyon sa social media at maprotektahan ang mga netizens mula sa panloloko. Boom!

Political dynasty, hindi na dapat magpatuloy, bayan ang dapat gawing prayoridad!

ni Pablo Hernandez @Prangkahan | February 21, 2026

284 KONGRESISTANG NAG-ABSUWELTO KAY PBBM SA IMPEACHMENT, MALAMANG SILA NAMAN ANG MAG-I-IMPEACH KAY VP SARA – Nang pagbotohan sa plenaryo ng House of Representatives noong Pebrero 11, 2026, sa mga impeachment cases laban kay Pangulong Ferdinand “Bongbong” Marcos Jr. (PBBM), 284 kongresista ang bumoto na ibasura ang mga reklamo dahil sa kakulangan ng ebidensya. Walo lamang ang bumotong pabor sa impeachment at apat ang nag-abstain.

Dahil dito, malamang na ang parehong 284 kongresista na nag-abswelto kay PBBM ang siyang boboto sa plenaryo kung isusulong ang impeachment laban kay Vice President Sara Duterte-Carpio. Abangan!

XXX

MGA PULITIKONG HINDI NASINDAK SA 'SARA FOR PRESIDENT', LAGOT SILA KAPAG SI VP SARA ANG NANALO SA 2028 ELECTION – May ilang pulitiko na hindi nasindak sa pahayag ni VP Sara na kakandidato siya sa 2028 presidential election, dahil patuloy pa rin nilang inaatake ang bise presidente tungkol sa isyu ng confidential funds anomaly sa Office of the Vice President (OVP) at Department of Education (DepEd) na kanyang pinamunuan noon.

Ngunit kapag nanalo si VP Sara sa 2028, siguradong may kahihinatnan ang mga pulitikong hindi naniwala o kumampi laban sa kanya. Boom!

XXX

KAPAG ANG ISINULONG NI CONG. SANDRO MARCOS NA FREE ELECTRICITY SA MGA MAHIHIRAP AY HINDI NATUPAD, TIYAK TALO SA 2028 PRESIDENTIAL ELECTION ANG 'MANOK' NI PBBM – Nagsulong si Ilocos Norte 1st District Rep. Sandro Marcos, anak ng Pangulo, ng panukalang batas na nagbibigay ng libreng kuryente sa mga pamilyang may mababang konsumo. Magandang balita ito para sa mga mahihirap. Kapag naging batas, maaaring magbigay ito ng kalamangan kay VP Sara bilang magiging kandidato ng administrasyong Marcos sa 2028 presidential election. Ngunit kung ito ay gagamitin lamang para sa “papogi points” at walang tunay na benepisyo, asahan na mahihirapan sa laban ang presidential candidate ng Marcos administration. Period!

XXX

DAPAT ISA LANG KADA ANGKAN ANG PAYAGANG KUMANDIDATO PARA ANG BUDGET AY MAPUNTA SA MAMAMAYAN, HINDI SA BULSA NG 'KAMAG-ANAK INC. – Patuloy ang mga public consultations ng mga lawmakers sa iba't ibang bahagi ng bansa tungkol sa mga panukalang batas laban sa political dynasty.

Karamihan sa mamamayan ay nagpahayag ng pagnanais na limitahan sa isa lamang ang kinakatawan ng bawat angkan, dahil maraming pamilya ang napakayaman habang ang kanilang constituents ay naghihirap. Marami sa pondo para sa mga programa at proyekto ng gobyerno ang napupunta sa bulsa ng mga corrupt na “Kamag-anak Inc.” Tsk!

'Suntok sa buwan' na manalo si PBBM sa pagka-VP kasi lagi raw sadsad ang ratings niya

ni Pablo Hernandez @Prangkahan | February 20, 2026

KAHIT MALAKAS NA KANDIDATO, ‘DI PA RIN SURE NA MAGIGING PRESIDENTE SI VP SARA KASI MAY MATINDI PA SIYANG KALABAN, ITO ANG IMPEACHMENT AT PLUNDER – Matapos ideklara ni Vice President Sara Duterte ang kanyang kandidatura para sa pagka-presidente, kahit na siya ay itinuturing na frontrunner para sa 2028 presidential election, hindi pa rin tiyak na siya ay magiging pangulo ng Pilipinas. Dalawa ang pinakamalalaking hadlang sa kanya: ang impeachment at plunder cases.

Kapag na-impeach si VP Sara, matatanggal siya sa posisyon bilang bise presidente at hindi na puwede kumandidato sa anumang pampublikong posisyon. Kung malalampasan man niya ang impeachment, nakabinbin pa rin ang plunder case na, kung mapatunayang guilty, ay magreresulta sa pagkakakulong nang walang posibilidad ng bail.

Ang punto: kung malampasan ni VP Sara ang parehong impeachment at plunder cases, doon lamang maituturing na malakas na kandidato siya para maging susunod na presidente ng Pilipinas. Period!

XXX

RATING NI PBBM, LAGI RAW SADSAD SA MGA SURVEY KAYA KAPAG KUMANDIDATO SIYA SA PAGKA-VP 'SUNTOK SA BUWAN' NA MANALO SIYA – Sa Pilipinas, isang termino lang ang puwedeng paglingkuran ng isang presidente, kaya’t hindi na maaaring kumandidato si PBBM bilang pangulo. Maaari naman siyang tumakbo bilang bise-presidente. Ngunit tanong: mananalo kaya siya sa pagka-VP sa 2028?

Ayon sa iba't ibang survey tungkol sa mga high-ranking officials ng bansa, mababa at hindi umaangat ang ratings ni PBBM. Kaya’t kung siya’y tatakbo bilang bise-presidente, malaki ang posibilidad na hindi siya manalo—mas malaki ang talo kaysa panalo. Boom!

XXX

MGA OPISYAL NG CICC, DAPAT SIBAKIN NI PBBM KASI TULOY PA RIN DAW ANG ILLEGAL ONLINE GAMBLING SA SOCIAL MEDIA – Ikinadismaya ni Sen. Sherwin Gatchalian ang kahinaan ng Cybercrime Investigation and Coordination Center (CICC) sa pagpigil sa illegal online gambling, dahil patuloy pa rin ang ganitong uri ng raket sa social media.

Aniya, isang solusyon lamang: dapat palitan ni PBBM ang kasalukuyang opisyal ng CICC at lagyan ng mga taong may tapang na haharap sa mga illegal online gambling lords. Boom!

XXX

DAHIL SA DILG-ANTI-EPAL RULES, TAGILID SA 2028 ELECTION ANG MGA EPAL NA PULITIKO – Dahil sa anti-epal rules ng Department of Interior and Local Government (DILG), magiging mahirap para sa mga incumbent na pulitiko ang kanilang kandidatura sa 2028 elections. Hindi na nila maaaring gamitin ang mga programa at proyekto ng gobyerno, na ginastusan mula sa public funds, bilang paraan ng propaganda dahil maaari silang makasuhan. Boom!