Sarah Discaya, namimili pa ng kulungan, kapalmuks!

ni Pablo Hernandez @Prangkahan | December 27, 2025

SA MISMONG ARAW NG PASKO, BATIKOS ANG INABOT NI PBBM KASI SUMABLAY ANG IBINIDA NIYANG MAY MGA CORRUPT POLITICIANS NA MAGPA-PASKO SA KULUNGAN – Sa mismong araw ng Pasko, pinutakti ng batikos ng mga netizen si Pangulong Ferdinand “Bongbong” Marcos Jr. (PBBM).

Ugat ng pambabatikos ang madalas niyang pahayag na may mga kurakot na pulitiko umanong magpa-Pasko sa kulungan—isang pangakong hindi natupad, sapagkat sumapit ang Pasko na wala ni isang corrupt politician ang naipakulong ng kanyang administrasyon.

Dapat nang iwasan ni PBBM ang labis na pagpapabida kung hindi naman niya kayang tuparin ang kanyang mga pahayag, upang hindi siya patuloy na mabatikos ng publiko, period!

XXX

‘WAG NANG MAKI-JOIN SI CONG. PULONG SA PAG-ATAKE SA FLOOD CONTROL SCANDAL SA PANAHON NG MARCOS ADMIN, BINABATIKOS KASI NG MGA MARCOS VLOGGER ANG P51B FLOOD CONTROL PROJECT NIYA NOONG DUTERTE ADMIN – Dapat may magpayo kay Davao City 1st District Rep. Paolo Duterte na huwag nang makisali sa pag-atake kaugnay ng mga alegasyon ng korupsiyon sa flood control projects na naganap sa panahon ng Marcos admin.

Kapuna-puna raw kasi na sa tuwing umaatake siya sa Marcos administration, agad siyang nireresbakan ng mga Marcos-loyalist vloggers sa social media, na inuungkat ang umano’y P51 bilyong flood control projects sa kanyang distrito noong panahon na pangulo ang kanyang ama na si dating Pangulong Rodrigo Roa Duterte (FPRRD). Boom!

XXX

NATURETE, KANDAUTAL SI CONG. LEVISTE SA P1B INSERTION DAW NI SEN. LOREN LEGARDA, DEPENSA NIYA P1B LANG NAMAN DAW INSERTION NG MOMMY NIYANG SENADORA – Habang nagpapabida si Batangas 1st District Rep. Leandro Leviste sa panayam sa kanya ng broadcast journalist na si Antonio “Ka Tunying” Taberna kaugnay ng pagdadawit niya sa umano’y mga insertion ng ilan niyang kapwa mambabatas—na ayon sa kanya ay base sa tinatawag niyang “Cabral Files” (mga dokumento umano ng yumaong Department of Public Works and Highways [DPWH] Undersecretary Ma. Catalina Cabral)—ay bigla siyang nautal at tila ninerbiyos nang banggitin ni “Ka Tunying” na maging ang kanyang ina na si Sen. Loren Legarda ay may P1 bilyong insertion din sa 2025 national budget.

Marahil ay hindi inaasahan ni Cong. Leviste na “titirahin” ni “Ka Tunying” ang insertion ng kanyang sariling ina, kaya ang naging depensa na lamang niya ay maliit lang naman daw ang insertion ng kanyang mommy na senadora—P1 bilyon “lang” naman daw.

Mantakin n’yo, P1 bilyon ang insertion ng kanyang ina, ngunit tila minamaliit lamang ito ni Cong. Leviste nang sabihing P1B “lang” naman ang inilaan sa kanyang mommy na senador. Tsk!

XXX

WALANG KAHIHIYAN SI SARAH DISCAYA, KASI BILYUN-BILYON ANG NA-SCAM NILA SA KABAN NG BAYAN, MAY GANA PA SIYANG MAMILI KUNG SAAN SIYA DAPAT IKULONG – Matapos ikulong sa Lapu-Lapu City jail sa Cebu, humirit ang kontratistang si Sarah Discaya—sa pamamagitan ng kanyang mga abogado—na mailipat siya sa detention cell ng National Bureau of Investigation (NBI).

Wala talagang kahihiyan si Sarah Discaya dahil, mantakin n’yo, bilyun-bilyong piso ang umano’y na-scam nila ng kanyang mister na si Curlee Discaya mula sa kaban ng bayan, ngunit may kapal pa ng mukhang mamili kung saan siya dapat ikulong, pwe!

Akala ni Sec. Ralph Recto 'safe' na siya sa kaso, hindi pala, kasi kinasuhan siya ng 'Save the Philippines Coalition’

ni Pablo Hernandez @Prangkahan | December 23, 2025

PAGBUBULGAR LANG KASI ANG GINAWA NI PRRD LABAN KAY CONG. ERIC YAP, PERO KUNG PINAKASUHAN NA NIYA ITO NOON, MATAGAL NA SANA ITONG NAKAKULONG, ‘DI NA RIN SANA NAGING CONG. UTOL NIYANG SI EDVIC YAP – Noong Disyembre 28, 2020, ibinulgar ng noo’y Pangulong Rodrigo Roa Duterte (PRRD), batay sa ulat na isinumite sa kanya ng Presidential Anti-Crime Commission (PACC), na ang noo’y ACT-CIS party-list Representative na si Eric Yap—na siya ring House Committee on Appropriations chairman—ay sangkot umano sa mga katiwalian sa mga infrastructure project ng Department of Public Works and Highways (DPWH). Ang problema noon, hanggang pagbubulgar lamang ang ginawa ni PRRD. Wala siyang naging hakbang upang atasan ang noo’y Ombudsman Samuel Martires na sampahan ng kaso si Cong. Eric Yap.

Kung noon pa lamang ito kinasuhan, malamang ay matagal na siyang nakakulong, hindi na naging kongresista ng Benguet, at hindi na rin sana naging nominado—at kalaunan ay ACT-CIS representative—ang kanyang kapatid na si Cong. Edvic Yap. Boom!

XXX

KAHIT HINDI TUMESTIGO ANG MGA EMPLEYADO NG PAMILYA DISCAYA LABAN SA KANILA, SWAK NA SWAK PA RIN SA KASO MAG-ASAWANG DISCAYA – Ayon kay Pasig City Mayor Vico Sotto, may natanggap siyang impormasyon na umano’y pinagbabantaan ng mag-asawang Curlee at Sarah Discaya ang kanilang mga empleyado—na may mangyayaring masama sa kanila sakaling tumestigo laban sa mag-asawa.

Sa totoo lang, kahit hindi pa man tumestigo ang mga empleyado laban sa kanila, sapat na ang dami ng ebidensiya ng mga ghost, substandard, at unfinished flood control projects upang maisakdal ang mag-asawang Curlee at Sarah Discaya sa mga kasong malversation, bribery, at graft. Swak na swak. Period!

XXX 

MALI ANG AKALA NI SEC. RECTO NA SAFE NA SIYA SA KASO, KASI KINASUHAN SIYA NG SAVE THE PHILIPPINES COALITION – Bagamat ayon sa Supreme Court (SC) ay unconstitutional ang utos noon ng noo’y Finance Secretary at ngayo’y Executive Secretary Ralph Recto na ilagak ang P60 billion PhilHealth reserved fund sa national treasury—kaya’t inutusan ng Korte Suprema na ibalik ang pondong ito sa PhilHealth—sinabi rin ng SC na walang criminal liability ang kalihim sa naturang aksyon.

Akala ni Executive Secretary Recto na ligtas na siya sa kaso, pero mali ang akala niya. Nakakita ng “butas” ang grupong Save the Philippines Coalition sa naging aksyon niya noon, kaya’t isinampa ng koalisyon ang mga kasong plunder, graft, at technical malversation laban sa kalihim sa Office of the Ombudsman. Boom!

XXX

KUNG AKALA NG MGA NAULILANG PAMILYA NI CABRAL NA WALA NA ITONG KASO KASI PATAY NA, MALI SILA KASI KAHIT DEAD NA ITO TULOY PA RIN ANG KASO – Tiniyak ng Department of Justice (DOJ) na hindi nabubura ng kamatayan ng isang tao ang pananagutan nito sa batas. Kaya’t hahabulin ng pamahalaan ang yumaong former DPWH Usec. Ma. Catalina Cabral sa pamamagitan ng pagsasampa ng forfeiture case upang mabawi at maibalik sa kaban ng bayan ang mga ari-arian o kayamanan na nakaw.

Kaya’t kung akala ng mga naulilang pamilya ni Cabral na wala na itong kaso dahil patay na siya, nagkakamali sila. Mismong DOJ ang nagsabi na tuloy ang kaso kahit patay na ang former DPWH Usec. Period!

Hotel sa Baguio, patunay daw ng Yap’s “kongresista wealth”?

ni Pablo Hernandez @Prangkahan | December 22, 2025

PAGSAPIT NG JANUARY 2026 KUNG MAY MALASAKIT ANG LIDERATO NG SENADO AT KAMARA, DAPAT MAGSAGAWA SILA ULI NG LIVE INVESTIGATIONN SA MGA SANGKOT SA FLOOD CONTROL SCANDAL – Mula nang magsagawa ng closed-door investigation ang Independent Commission for Infrastructure (ICI), hindi na malaman ng taumbayan kung sino ang mga totoong sangkot at hindi sa flood control scandal. Sa huli na lang nalalaman kung sino ang mga sangkot kapag nagrerekomenda na ang komisyon kung sino ang dapat kasuhan ng Ombudsman.

Kaya, kung tunay na may malasakit sa mamamayan ang liderato ng Senado at ng Kamara, dapat sa susunod na taon, o pagsapit ng Enero 2026, ay magsagawa muli sila ng naka-live na imbestigasyon. Ito ay para mahubaran ng maskara at makilala ng taumbayan ang mga pulitiko at opisyal ng Department of Public Works and Highways (DPWH) na sangkot sa flood control scandal. Boom!

XXX

CONG. ERIC YAP, UBOD NA RAW NG YAMAN MULA NANG MAGING KONGRESISTA, KAYANG-KAYA NA RAW BUMILI NG HOTEL – Sina yumaong former Department of Public Works and Highways (DPWH) Usec. Ma. Catalina Cabral at Benguet Rep., dating ACT-CIS Partylist Rep. Eric Yap ay parehong nasasangkot sa flood control projects scam.

At kung totoo ang inihayag ni Department of Interior and Local Government (DILG) Sec. Jonvic Remulla na ang hotel sa Baguio City na tinuluyan ni Cabral ay dati raw nitong pag-aari at ibinenta kay Cong. Eric Yap, ay talagang ubod na pala siya ng yaman mula nang maging kongresista. Kayang-kaya na pala niyang bumili ng isang hotel. Boom!

XXX

SINUWERTE MAN SI CONG. ERIC YAP SA PAGDIKIT SA TULFO BROTHERS AT SA NOO'Y SPEAKER CAYETANO, MAMALASIN NAMAN SIYA SA MARCOS ADMIN DAHIL MAAARI SIYANG MAKULONG SA CITY JAIL – Sinuwerte lang si Eric Yap nang madikit siya sa Tulfo brothers, at nang maging ganap na ACT-CIS Partylist congressman. Mas lalo pa siyang pinalad nang madikit siya sa noo’y Speaker Alan Cayetano, kasi nang yumao si Benguet Rep. Nestor Fongwan Sr. noong Disyembre 2019, ay pagsapit ng Enero 2020 ay siya ang itinalagang caretaker congressman ng lalawigan. Pagsapit ng Marso 2020, lalo namang nadagdagan ang suwerte niya nang maitalaga siyang chairman ng House Committee on Appropriations.

Gayunman, kung sinuwerte man noon si Cong. Eric Yap sa pagdikit sa Tulfo brothers at noo’y Speaker Alan Cayetano, tila mamalasin siya sa panahon ng Marcos administration. Kabilang siya sa mga maaaring makulong sa city jail sa kasong no bail dahil sa pagkakasangkot niya sa flood control scam. Period!

XXX

PINAGNAKAWAN NA NGA NILA ANG TAUMBAYAN, NAGAWA PA NI SARAH DISCAYA MAG-DIRTY FINGER SA PUBLIKO – Matapos maisyuhan ng warrant of arrest at dalhin ng mga otoridad sa korte, tinanong ng mga mamamahayag ang kontratistang si Sarah Discaya kung may plano itong isoli sa kaban ng bayan ang ninakaw nilang pera ng taumbayan. Ngunit ang itinugon niya ay simpleng pag-dirty finger.

Ganyan kawalang-hiya si Sarah Discaya: nagawa na nilang pagnakawan ang taumbayan, at ngayon ay nagagawa pa niyang mag-dirty finger. Pwe!