2028 presidential race, malayo pa lang pero lamang na si VP Sara

ni Pablo Hernandez @Prangkahan | January 26, 2026

LIDER NG 'DILAWAN', TINABLA NG LIDER NG 'KAKAMPINK' TUNGKOL SA ISYU NG 2028 PRESIDENTIAL ELECTION – Nagtungo si Sen. Kiko Pangilinan, lider ng "Dilawan," sa Naga City, Camarines Sur upang hikayatin si Mayor at dating Bise Presidente Leni Robredo, lider ng "Kakampink," na muling kumandidato sa pagka-presidente sa 2028. Ngunit tinanggihan siya ni Mayor Leni.

Ayon sa kanya, "Tumaya na tayo sa iba sa 2028," na nangangahulugang ayaw na niyang muling tumakbo at magpo-pokus na lamang sa paglilingkod bilang alkalde ng Naga City.

XXX

WALA NANG TATALO KAY VP SARA KASI UMAYAW NA SI MAYOR LENI ROBREDO SA 2028 PRESIDENTIAL ELECTION – Sa totoo lang, wala nang ibang puwedeng ipantapat kay Vice Pres. Sara Duterte sa 2028 presidential election kundi si Mayor Leni Robredo.

Batay sa 2028 presidential survey ng WR Numero Research Firm noong January 26, 2024, nangunguna si VP Sara sa 35.6%, mas mataas kumpara kina Sen. Raffy Tulfo (22.5%) at Mayor Leni (9%). Subalit, matapos mabulgar ang confidential funds scam, flood control scandal, at pagkakasangkot ng magkapatid na ACT-CIS partylist Rep. Edvic Yap at Benguet Rep. Eric Yap — pati na rin ang kontrobersya ng anak ni Sen. Tulfo na si Quezon City 2nd Dist. Rep. Ralph Wendel Tulfo — kapansin-pansin ang pagbaba ng ratings nina VP Sara at Sen. Raffy Tulfo sa latest WR Numero survey noong December 3, 2025. Bumaba ang rating ni VP Sara ng 9.1%, naging 13.4% lamang, habang tumaas naman si Mayora Leni ng 4%, mula 9% naging 13%.

Ika nga, kung muling magdedeklara si Mayor Leni na kakandidato sa pagka-presidente sa 2028, malaki ang posibilidad na mas tataas pa ang kanyang rating dahil kilala siya sa pagtataguyod ng good governance. Ngunit dahil tinuldukan na niya ang kanyang planong muling tumakbo, tila wala nang tatalo kay VP Sara sa 2028. Period!

XXX

WALANG PANALO SINA SEN. TULFO AT SEN. HONTIVEROS KAY VP SARA SA 2028 PRESIDENTIAL ELECTION – Kung si Sen. Raffy Tulfo ang susuportahan ng Marcos administration at si Sen. Risa Hontiveros naman ang susuportahan ng "Dilawan" at "Kakampink" sa 2028 presidential election, walang kapana-panalo ang dalawang senador laban kay VP Sara.

Mas mababa ang rating ni Sen. Raffy Tulfo kumpara kay VP Sara, habang si Sen. Risa Hontiveros ay may napakababang rating na 1.5%, samantalang ang rating ng bise presidente ay 33.3%. Boom!

XXX

CONG. EDWIN GARDIOLA, GUMAGAWA NG KABALBALAN; NAHIHIYA KAPAG IBINUBULGAR NG MEDIA KANYANG KINITANG YAMAN SA FLOOD CONTROL — Hiniling ni CWS Partylist Rep. Edwin Gardiola sa Court of Appeals (CA) na magpalabas ng gag order laban sa Bilyonaryo News Channel (BNC) upang pigilan ang pag-uulat tungkol sa kanyang mga ari-arian na isinailalim sa freeze order ng Anti-Money Laundering Council (AMLC).

Kitang-kita ang kongresistang ito: gumagawa ng anomalya sa mga flood control projects, at kapag ibinabalita ng media ang kanyang kita mula sa scam, nahihiya at humihingi ng proteksyon sa CA upang pagbawalan ang mga mamamahayag na isiwalat ang kanyang kayamanan. Pwe

Curlee at Sarah Discaya, pa-victim sa sariling kasalanan!

ni Pablo Hernandez @Prangkahan | January 25, 2026

PAREHO ANG KAPALARAN NINA FPRRD AT EX-SEN. REVILLA, PAREHO NILANG SINUPORTAHAN ANG KANDIDATURA NI BBM, AT NANG MAGING PANGULO, PAREHO SILANG IPINAKULONG – Pareho ang sinapit nina dating Pangulong Rodrigo Roa Duterte at dating Senador Bong Revilla. Kapwa sila sumuporta sa kandidatura ni Pangulong Ferdinand “Bongbong” Marcos Jr., ngunit matapos maupo sa puwesto ang pangulo, kapwa rin sila nauwi sa pagkakapiit. Ang dating pangulo ay nasa kustodiya ng International Criminal Court (ICC) kaugnay ng kasong crimes against humanity, habang ang dating senador naman ay nakakulong sa Quezon City Jail dahil sa kasong malversation of public funds through falsification of public documents. Saklap! 

XXX

HINDI DAPAT MAKIPAGNEGOSASYON ANG MAGKAPATID NA REMULLA KAY ZALDY CO, ANG DAPAT NILANG GAWIN AY DUMISKARTE PARA MATIKLO ITO SA IBANG BANSA AT MAKULONG SA CITY JAIL – Inanunsyo ni Department of the Interior and Local Government (DILG) Secretary Jonvic Remulla na may mga nagpaabot umano sa kanya at sa kanyang kapatid na si Ombudsman Boying Remulla ng feelers na nais makipagnegosasyon sa kanila ang wanted na si dating Ako Bicol partylist Representative Zaldy Co. Si Co ay nahaharap sa mga kasong plunder, malversation of public funds through falsification of public documents, bribery, at graft.

Hindi dapat tanggapin ng magkapatid na Remulla ang anumang hirit ng negosasyon mula kay Zaldy Co, sapagkat isa itong puganteng pinaghahanap ng batas. Sa halip, nararapat na ituon ang kanilang lakas at kapangyarihan sa pagbalangkas ng malinaw at konkretong hakbang upang maaresto si Co, saan man siya naroroon sa ibang bansa, at maiharap sa hustisya sa Pilipinas.

Iyan ang dapat manaig—hindi ang pakikipag-usap, kundi ang pagpapatupad ng batas.

XXX

SINO KINA SEN. JINGGOY AT SEN. JOEL UNANG MAKAKASAMA NI EX-SEN. REVILLA SA CITY JAIL? – Inanunsyo ng Department of Justice (DOJ) na sa susunod na linggo ay posibleng isumite na sa Ombudsman at sa korte ang mga kasong non-bailable na malversation of public funds, falsification of public documents, at graft laban kina Sen. Jinggoy Estrada at Sen. Joel Villanueva.

Kaya't ang tanong: Sino kaya sa kanila ang unang makakasama ni ex-Sen. Revilla sa city jail? Abangan!

XXX

FEELING PA-VICTIM SI CURLEE DISCAYA GAYUNG SIYA AT ANG MISIS NIYA ANG NAMBIKTIMA SA TAUMBAYAN SA PAMAMAGITAN NANG PAGNANAKAW SA KABAN NG BAYAN – Hanggang ngayon, pinupuna si contractor Curlee Discaya dahil sa kanyang pahayag sa Senate Blue Ribbon Committee na pakiramdam daw niya ay nais silang nakawan. Ayon sa kanya, ang hinihinging restitution ng DOJ para mapasok siya at ang misis niyang si Sarah Discaya sa witness protection program ay parang modernong pagnanakaw.

Marami ang nagtuturo sa kanya dahil tila pa-victim ang tono ng kanyang pahayag, samantalang ang katotohanan ay silang mag-asawa ang nambiktima sa mamamayan sa pamamagitan ng pagnanakaw ng bilyon-bilyong piso mula sa kaban ng bayan. Period!

BI Comm. Viado, 3 beses nang natatakasan ng mga pugante, dapat nang sibakin!

ni Pablo Hernandez @Prangkahan | January 24, 2026

DOBLE-KAMALASAN INABOT NI BONG REVILLA, TALO NA SA ELEKSYON, NAKULONG PA! – Doble kamalasan ang sinapit ni dating Sen. Bong Revilla sa ilalim ng administrasyon ng itinuturing niyang kaibigan na si Pangulong Ferdinand “Bongbong” Marcos Jr. (PBBM).

Isa si Revilla sa mga kandidatong senador na sinuportahan ng administrasyon ngunit nabigo sa halalan noong Mayo 2025. Makalipas ang halos walong buwan, noong Enero 20, 2026, muli siyang dumanas ng matinding dagok matapos makulong sa city jail kaugnay ng kasong malversation of public funds through falsification of public documents, isang kasong walang piyansa.

Ang sunud-sunod na pagkatalo at pagkakakulong na ito sa ilalim ng Marcos administration ay tiyak na hindi niya malilimutan—natalo na sa eleksyon, nakulong pa. Tsk!

XXX

TILA MATINDI ANG NILALAMAN NG MGA IMPEACHMENT COMPLAINTS NG DUTERTE ALLIES LABAN KAY PBBM KAYA HINDI ITO TINANGGAP NG KAMARA – Ang unang impeachment complaint laban kay Pangulong Ferdinand “Bongbong” Marcos Jr. na isinampa ni Atty. Andre De Jesus at inindorso ni Pusong Pinoy partylist Rep. Jett Nisay, gayundin ang ikalawang reklamong isinampa ng Makabayan bloc, ay parehong tinanggap ng Office of the House Secretary General. Subalit ang ikatlong impeachment complaint na inihain ng mga kaalyado ng mga Duterte—kabilang sina dating Ilocos Sur Gov. Chavit Singson, dating Cong. Mike Defensor, at iba pa—ay hindi tinanggap ng Kamara, sa dahilang nasa Taiwan umano si House Secretary General Cheloy Garafil.

Sa totoo lang, kahit wala si House Sec. Gen. Garafil ay maaari pa ring tanggapin ng Kamara ang nasabing reklamo. Ngunit sa kabila ng pagpupumilit ng grupo nina Singson at Defensor, malinaw na walang intensiyong tanggapin ito.

Marahil ay batid ng liderato ng Kamara na mas mabigat at mas seryoso ang mga nilalaman ng impeachment complaints ng mga kaalyado ng Duterte kumpara sa mga naunang reklamo, kaya’t piniling hindi ito tanggapin ng Office of the House Secretary General. Period!

XXX

ONLI IN DA ‘PINAS, HEAD NG ETHICS COMMITTEE SINAMPAHAN NG ETHICS COMPLAINT – Dahil hindi agad inaksyunan ni Sen. JV Ejercito, chairman ng Senate Ethics Committee, ang ethics complaint na isinampa ni Atty. Marvin Aceron noong Oktubre 2, 2025 laban kay Sen. at dating Senate President Chiz Escudero kaugnay ng umano’y pagtanggap nito ng P30 milyon mula sa kontraktor na si Lawrence Lubiano, naghain din ang abogadong ito ng ethics complaint laban mismo kay Sen. JV sa Senado.

Only in the Philippines—na ang pinuno ng Ethics Committee ay nasasampahan din ng ethics complaint. Boom!

XXX

STRIKE 3 NANG NATATAKASAN NG MGA PUGANTE NA DUMAAN SA BACKDOOR EXIT KAYA DAPAT SIBAKIN NA NI PBBM SI BI COMM. VIADO – Kung totoo ang sinabi ni Sec. Jonvic Remulla na nakapuslit palabas ng bansa, dumaan sa backdoor ng Pilipinas, at ngayon ay nasa Cambodia na ang most wanted criminal na si Charlie “Atong” Ang, nararapat lamang na agad sibakin ni PBBM si Bureau of Immigration (BI) Commissioner Joel Anthony Viado.

Strike three na ito para sa BI. Una, ang pagtakas ni dating Bamban, Tarlac Mayor Alice Guo. Ikalawa, si dating presidential spokesperson Harry Roque, na tulad ni Guo ay nahaharap sa kasong non-bailable na human trafficking kaugnay ng ilegal na operasyon ng Philippine Offshore Gaming Operators (POGO). At ikatlo, si Atong Ang, na nahaharap sa mga kasong non-bailable na multiple counts ng kidnapping with homicide at illegal detention kaugnay ng pagkawala ng mga sabungero. Period!